AKP ភ្នំពេញ ថ្ងៃទី០៨ ខែកុម្ភៈ ឆ្នាំ២០២៥-សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភានៃព្រះរាជាណាចក្រកម្ពុជា និងឯកឧត្តម ថងលុន ស៊ីសូលីត អគ្គលេខាធិការនៃគណៈកម្មាធិការមជ្ឈិម និងជាប្រធានរដ្ឋឡាវ បានលើកទឹកចិត្ត និងជំរុញដល់រដ្ឋាភិបាលនៃប្រទេសទាំងពីរ ចាត់ចែងអនុវត្តន៍សេចក្តី ប្រកាសរួមរបស់នាយករដ្ឋមន្ត្រី កាលពីខែធ្នូ ឆ្នាំ២០២៤ ក្នុងការពន្លឿនជ្រើសរើសទីតាំងសម្រាប់សាងសង់ស្ពាន ឆ្លងកាត់ទន្លេរពៅ (ខេត្តព្រះវិហារ) ទន្លេសេឡាំប៉ាវ (ខេត្តចំប៉ាសាក់) ឱ្យបានឆាប់តាមដែលអាចធ្វើទៅបាន និង បន្តពិភាក្សា និងសិក្សាលើទីតាំងជាក់ស្តែង ដើម្បីតភ្ជាប់ខេត្តទាំងពីរ ហើយទៅថ្ងៃអនាគត ថ្នាក់ដឹកនាំគណបក្ស ទាំងពីរលើកទឹកចិត្តឱ្យអាជ្ញាធរពាក់ព័ន្ធធ្វើការពិនិត្យលទ្ធភាព នៃការតភ្ជាប់ហេដ្ឋារចនាសម្ព័ន្ធបន្ថែមទៀតសម្រាប់ ខេត្តអត្តពើ និងខេត្តរតនគិរី។ នេះបើតាមសេចក្ដីប្រកាសព័ត៌មានរបស់គណបក្សប្រជាជនកម្ពុជា ចេញផ្សាយថ្ងៃទី០៧ ខែកុម្ភៈ ឆ្នាំ២០២៥។

ក្នុងសេចក្តីប្រកាសព័ត៌មានបានឱ្យដឹងថា នៅថ្ងៃទី០៧ ខែកុម្ភៈ ឆ្នាំ២០២៥ គណៈអចិន្ត្រៃយ៍ គណៈកម្មាធិការកណ្តាល នៃគណបក្សប្រជាជនកម្ពុជា ដឹកនាំដោយ សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស និងជាប្រធានព្រឹទ្ធសភានៃ ព្រះរាជាណាចក្រកម្ពុជា និងការិយាល័យនយោបាយ គណៈកម្មាធិការមជ្ឈិមបក្ស នៃគណបក្សប្រជាជនបដិវត្តន៍ឡាវ ដឹកនាំដោយឯកឧត្តម ថងលុន ស៊ីសូលីត អគ្គលេខាធិការនៃគណៈកម្មាធិការមជ្ឈិម និងជាប្រធានរដ្ឋឡាវ បានជួបប្រជុំកំពូលលើកទី១៥ នៅរដ្ឋធានីវៀងចន្ទន៍ សាធារណរដ្ឋប្រជាធិបតេយ្យប្រជាមានិតឡាវ។ កិច្ចប្រជុំបានប្រព្រឹត្តទៅក្នុងបរិយាកាសកក់ក្តៅ ស្និទ្ធស្នាល យោគ យល់គ្នា និងក្នុងស្មារតីជឿទុកចិត្តគ្នា ដើម្បីបន្តពូនជ្រុំនូវចំណងសាមគ្គីភាព មិត្តភាពជាប្រពៃណី និងកិច្ចសហប្រតិបត្តិការលើគ្រប់វិស័យរវាងគណបក្ស និងប្រទេសទាំងពីរឱ្យកាន់តែស៊ីជម្រៅ និងប្រកបដោយផ្លែផ្កា។ ភាគីទាំងពីរបានវាយតម្លៃខ្ពស់ និងសម្តែងនូវការអបអរសាទរយ៉ាងក្រៃលែង ចំពោះការរីកចម្រើន ឥតឈប់ឈរនៃចំណងសាមគ្គីភាព មិត្តភាពជាប្រពៃណី និងកិច្ចសហប្រតិបត្តិការរវាងប្រទេសទាំងពីរដែល បានលើកកម្ពស់ដល់កម្រិត ភាពជាដៃគូយុទ្ធសាស្ត្រគ្រប់ជ្រុងជ្រោយ គង់វង្ស និងយូរអង្វែង។
ភាគីទាំងពីរបានជូនព័ត៌មានគ្នាទៅវិញទៅមកអំពីសភាពការណ៍រួមនៅក្នុងតំបន់ និងអន្តរជាតិ សភាពការណ៍ លេចធ្លោនៃគណបក្ស និងប្រទេសនីមួយៗ ទំនាក់ទំនងទ្វេភាគីនិងកិច្ចសហប្រតិបត្តិការក្នុងក្របខណ្ឌតំបន់ និងអន្តរជាតិ ព្រមទាំងទិសដៅនៃកិច្ចសហប្រតិបត្តិការរវាងគណបក្សទាំងពីរ។

ភាគីឡាវបានអបអរសាទរដល់កម្ពុជាដែលបានធ្វើជាម្ចាស់ផ្ទះ និងធ្វើជាប្រធានដឹកនាំ ប្រកបដោយ ភាពជោគជ័យចំពោះកិច្ចប្រជុំអន្តរជាតិចំនួន៤ នៅឆ្នាំ២០២៤ មានជាអាទិ៍ ១. កិច្ចប្រជុំគណៈកម្មាធិការ ប្រតិបត្តិនៃអង្គការអ្នកប្រជាធិបតេយ្យនិយមកណ្តាលអន្តរជាតិ (CDI-IDC) ២. មហាសន្និបាត សន្និសីទអន្តរជាតិ នៃបណ្តាគណបក្សនយោបាយនៅអាស៊ីលើកទី១២ (12th GA ICAPP) ៣. សម័យប្រជុំពេញអង្គនៃសភា អន្តរជាតិដើម្បីភាពអត់ឱននិងសន្តិភាពលើកទី១១ (11th IPTP) និង ៤.

កិច្ចប្រជុំកំពូលសៀមរាប-អង្គរ ស្តីពី ពិភពលោកមួយដែលគ្មានមីន។ សម្តេចតេជោ បានថ្លែងអំណរគុណដល់ ឯកឧត្តមអគ្គលេខាធិការបក្ស និងថ្នាក់ដឹកនាំឡាវទាំងអស់ ដែលបានគាំទ្រ និងបញ្ជូនគណៈប្រតិភូជាន់ខ្ពស់មកចូលរួមកិច្ចប្រជុំខាងលើ និងថ្លែងអបអរសាទរដល់ភាគីឡាវ ចំពោះភាពជោគជ័យនៅចុងបញ្ចប់នៃអាណត្តិ ក្នុងការអនុវត្តសេចក្តីសម្រេចមហាសន្និបាតគណបក្សលើកទី១១ រួមទាំងការរៀបចំមហាសន្និបាតគណបក្សទាំង៣ ថ្នាក់ ដើម្បីឆ្ពោះទៅកាន់មហាសន្និបាតតំណាងទូទាំងប្រទេស នៅដើមឆ្នាំ២០២៦ ការធ្វើជាម្ចាស់ផ្ទះនៃសន្និសីទអន្តរជាតិ ដូចជា កិច្ចប្រជុំកំពូលអាស៊ានលើកទី៤៣-៤៤ និងមហាសន្និបាតអន្តរសភាអាស៊ានលើកទី៤៥ នៅប្រទេសឡាវនាឆ្នាំ២០២៤។ សម្តេចតេជោក៏បានជម្រាបជូន អំពីជោគជ័យនៃសន្និបាតគណៈកម្មាធិការកណ្តាលលើកទី៤៥ អាណត្តិទី៥ របស់គណបក្សប្រជាជនកម្ពុជា។ភាគីទាំងពីរបានវាយតម្លៃខ្ពស់ ចំពោះលទ្ធផលនៃការចាត់តាំងអនុវត្តស្មារតីនៃកិច្ចប្រជុំកំពូល លើកទី១៤ រវាងគណបក្សទាំងពីរ នៅរាជធានីភ្នំពេញ ថ្ងៃទី២៤ ខែមេសា ឆ្នាំ២០២៤ ដែលបានរួមចំណែកយ៉ាងធំធេង ដល់ការលើកកម្ពស់ចំណងសាមគ្គីភាព មិត្តភាពជាប្រពៃណីល្អ និងកិច្ចសហប្រតិបត្តិការ និងការជួយគាំទ្រគ្នា ទៅវិញទៅមករវាងគណបក្ស រដ្ឋ និងអង្គការមហាជន ក៏ដូចជារវាងអាជ្ញាធរមូលដ្ឋាននៅតាមព្រំដែននៃប្រទេស ទាំងពីរ ដើម្បីបុព្វហេតុការពារជាតិនិងអភិវឌ្ឍន៍ប្រទេសនីមួយៗ និងការលើកកម្ពស់តួនាទីប្រទេសទាំងពីរនៅ ក្នុងតំបន់ និងអន្តរជាតិ។ ភាគីទាំងពីរបានឯកភាពខ្ពស់ក្នុងការបន្តពង្រឹងពង្រីកនូវទំនាក់ទំនងមិត្តភាព សាមគ្គីភាព និងកិច្ច សហប្រតិបត្តិការរវាងគណបក្សទាំងពីរ ដើម្បីឧត្តមប្រយោជន៍ជូនជាតិ និងប្រជាជននៃប្រទេសទាំងពីរ ក្នុងការចូលរួមចំណែកដល់បុព្វហេតុសន្តិភាព ស្ថិរភាព មិត្តភាព កិច្ចសហប្រតិបត្តិការ និងការអភិវឌ្ឍនៅក្នុងតំបន់ និងពិភពលោក។ ថ្នាក់ដឹកនាំនៃគណបក្សទាំងពីរបានឯកភាពគ្នាជួបប្រជុំកំពូលលើកទី១៦ នៅព្រះរាជាណាចក្រកម្ពុជា នៅឆ្នាំ២០២៦ ខាងមុខ៕

ដោយ៖  ជឹម ណារី