AKP ភ្នំពេញ ថ្ងៃទី០៨ ខែកុម្ភៈ ឆ្នាំ២០២៥-- បើគិតត្រឹមថ្ងៃទី១០ ខែកុម្ភៈ ឆ្នាំ២០២៥ ខានស្អែកនេះ «លំផាត់» បានផ្លាស់លំនៅមកស្នាក់អាស្រ័យនៅមជ្ឈមណ្ឌលសង្គ្រោះសត្វព្រៃភ្នំតាម៉ៅបាន២ខែគត់។ នេះបើតាមការបញ្ជាក់ពីសំណាក់លោកជំទាវ អ៊ឹម រចនា មន្រ្តីអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ។

តាមរយៈបណ្តាញសង្គមហ្វេសប៊ុកនៅថ្ងៃទី០៨ ខែ កុម្ភៈ ឆ្នាំ ២០២៥នេះ លោកជំទាវ អ៊ឹម រចនា មន្រ្តីអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ដោយសារការថែរក្សា និងព្យាបាលយ៉ាងយកចិត្តទុកដាក់ពីមន្ត្រីជំនាញរបស់យើង សហការជាមួយអង្គការដៃគូ របួសជើងរបស់លំផាត់ មានសភាពធូរស្រាលជាងមុនច្រើន និងឈានទៅជាសះស្បើយទាំងស្រុងនាពេលខាងមុខដ៏ខ្លីនេះ។ មិនដល់២ខែស្រួលបួលផង លំផាត់ឡើងទម្ងន់ពី១៣៨គីឡូក្រាម ដល់១៧២គីឡូក្រាម។

លោកជំទាវបានបន្តឱ្យដឹងថាក្រសួងកសិកម្ម រុក្ខាប្រមាញ់ និងនេសាទ និងមជ្ឈមណ្ឌលសង្គ្រោះសុត្វព្រៃភ្នំតាម៉ៅ សូមថ្លែងអំណរគុណយ៉ាងជ្រាលជ្រៅ ជូនចំពោះថ្នាក់សម្តេច ទ្រង់ ឯកឧត្តម លោកជំទាវ លោក លោកស្រី នាងកញ្ញា នឹងអ៊ុពូមីងបងប្អូនគ្រប់មជ្ឈដ្ឋាន ដែលអាណិតស្រឡាញ់លំផាត់ និងបានជួយឧបត្ថម្ភថវិកា ទឹកដោះគោ និងសម្ភារបរិក្ខាផ្សេងៗ ដើម្បីសម្រួលដល់ដំណើរការព្យាបាល និងការសម្របខ្លួនរបស់លំផាត់ ដែលផ្លាស់មករស់នៅកន្លែងថ្មី។

មន្រ្តីអ្នកនាំពាក្យក្រសួងកសិកម្មបានលើកឡើងដែរថា ការអញ្ជើញទៅទស្សនាលំផាត់ និងសត្វព្រៃដទៃទៀត ដែលកំពុងស្ថិតនៅក្រោមការសង្គ្រោះ ថែរក្សារបស់មជ្ឈមណ្ឌលសង្គ្រោះសត្វព្រៃភ្នំតាម៉ៅ របស់អ៊ំពូមីង ក៏ជាកម្លាំងចិត្តសម្រាប់មន្ត្រីទាំងអស់ និងជាការគាំទ្រមួយដ៏សំខាន់មិនអាចខ្វះបានសម្រាប់ទ្រទ្រង់ដំណើរការទូទៅរបស់មជ្ឈមណ្ឌលយើង”។

ទាក់ទិនក្នុងរឿងនេះ លោកជំទាវបានឱ្យដឹងបន្ថែមថា តាមរយៈករណីលំផាត់ ក្រសួង និងមជ្ឈមណ្ឌល សង្ឃឹមថា ប្រជាពលរដ្ឋទាំងអស់បានយល់កាន់តែច្បាស់អំពីធនធានសត្វព្រៃនៅកម្ពុជា និងការប្រឈមមួយចំនួនដែលទាមទារការយកចិត្តទុកដាក់ និងរួមគ្នាលុបបំបាត់ឱ្យខាងតែបាន ដើម្បីថែរក្សាសត្វព្រៃកម្រនៅកម្ពុជាឱ្យមាននិរន្តរភាពជារៀងដរាប៕

ដោយ៖ ដេប៉ូ