AKP ភ្នំពេញ ថ្ងៃទី០៨ ខែកុម្ភៈ ឆ្នាំ២០២៥-- ក្នុងដំណើរបេសកកម្មនៅខេត្តកំពង់ស្ពឺ នាព្រឹកថ្ងៃទី០៨ ខែកុម្ភៈ ឆ្នាំ២០២៥ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងវត្តមានចូលរួមពីឯកឧត្តម ទ្រី វ៉ាន់ឌី អនុប្រធានគណៈកម្មាធិការសាខា ក្រុមប្រតិបត្តិសាខា និងមន្ត្រីថ្នាក់កណ្តាល អញ្ជើញចុះសួរសុខទុក្ខ និងនាំយកអំណោយមនុស្សធម៌របស់កាកបាទក្រហមកម្ពុជា ទៅចែកជូនដល់ប្រជាពលរដ្ឋងាយរងគ្រោះបំផុតចំនួន៧គ្រួសារនៅតាមខ្នងផ្ទះ ស្ថិតក្នុងសង្កាត់រកាធំ ក្រុងច្បារមន ខេត្តកំពង់ស្ពឺ។

នាឱកាសនោះ លោកជំទាវអគ្គលេខាធិការរងទី១ កាកបាទក្រហមកម្ពុជា បានពាំនាំការផ្ដាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចតែងតែមានក្ដីនឹករលឹក អាណិតអាសូរចំពោះប្រជាពលរដ្ឋទាំងអស់ និងបានបន្ថែមថា «កាកបាទក្រហមកម្ពុជា ដែលមានហ្លួងម៉ែ នរោត្តម មុនិនាថ សីហនុ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន តែងតែផ្តាំផ្ញើដល់មន្ត្រីក្រោមឱវាទពេលមានដំណើរបេសកកម្មទៅទីណាកន្លែងណា ត្រូវឆ្លៀតពេលចុះមើល និងសួរសុខទុក្ខចំពោះចាស់ជរាឥតទីពឹង ស្រ្តីមេម៉ាយ កុមារកំព្រា អ្នករស់នៅជាមួយមេរោគអេដស៍ និងជនងាយរងគ្រោះគ្រប់ប្រភេទនៅទូទាំងប្រទេសដែលមានការលំបាកខ្វះខាតផ្នែកជីវភាព ដែលត្រូវការឱ្យជួយ។»

ទន្ទឹមនឹងនេះ លោកជំទាវបានពាំនាំនូវការផ្តាំផ្ញើពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានអំពាវនាវសូមឱ្យបងប្អូនប្រជាពលរដ្ឋទាំងអស់ ត្រូវថែរក្សាអនាម័យបរិស្ថានឱ្យបានល្អ សម្អាតជុំវិញផ្ទះឱ្យបានស្អាត ដោយប្រកាន់យកការហូបស្អាត ផឹកស្អាត និងរស់នៅស្អាត ដើម្បីឱ្យការរស់នៅស្អាតមានសុខភាពល្អ ចៀសផុតពីជំងឺផ្សេងៗ និងមិនខាតបង់ថវិកាក្នុងការព្យាបាលជំងឺ។

សូមជម្រាបជូនថាប្រជាពលរដ្ឋងាយរងគ្រោះទទួលបានអំណោយមនុស្សធម៌ពីកាកបាទក្រហមកម្ពុជា ក្នុងមួយគ្រួសារទទួលបានអង្ករ ២៥គីឡូក្រាម ឃីត១កញ្ចប់ មី១កេស ត្រីខ១០កំប៉ុង ទឹកស៊ីអ៊ីវ១យួរ និងថវិកា៥ម៉ឺនរៀល។ ដោយឡែកគ្រួសារលោកតា៩៥ឆ្នាំ និងលោកយាយ៨៥ឆ្នាំ និងគ្រួសារដែលមានកូនភ្លោះពិកាទទួលបានថវិកា១០ម៉ឺនរៀលក្នុងមួយគ្រួសារផងដែរ៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)