AKP ភ្នំពេញ ថ្ងៃទី០៦ ខែកុម្ភៈ ឆ្នាំ២០២៥--
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាបានគូសបញ្ជាក់ថា   បច្ចេកវិទ្យាឌីជីថលកំពុងទម្លុះរបាំងប្រពៃណី ដើម្បីបើកផ្លូវឆ្ពោះទៅរកកាលានុវត្តភាពថ្មីៗ ដោយយើងសង្កេតឃើញថាពលរដ្ឋគ្រប់រូបទោះនៅទីតាំងណាក៏ដោយ ក៏សុទ្ធតែមានលទ្ធភាពប្រើប្រាស់សេវាទូរសព្ទចល័ត និងអ៊ីនធ័រណិត ព្រមទាំងឧបករណ៍ឌីជីថលដែលមានតម្លៃសមរម្យ ហើយថាបច្ចេកវិទ្យាឌីជីថលវាបានក្លាយជាផ្នែកមួយសម្រាប់ជីវិតប្រចាំថ្ងៃរបស់យើងទៅហើយ។ ការគូសបញ្ជាក់របស់សម្តេចមហាបវរធិបតី នាយករដ្ឋមន្ត្រីបែបនេះធ្វើឡើងក្នុងពិធីបិទសន្និបាតបូកសរុបលទ្ធផលការងារ ៥ឆ្នាំ ២០២០-២០២៤ នៃដំណើរឆ្ពោះទៅបរិវត្តកម្មឌីជីថល និងទិសដៅការងារបន្តរបស់ក្រសួងប្រៃសណីយ៍ និងទូរគមនាគមន៍ នារសៀលថ្ងៃទី០៦ ខែកុម្ភៈ ឆ្នាំ២០២៥ នៅសណ្ឋាគារសុខាភ្នំពេញ ។

សម្តេចធិបតី ហ៊ុន ម៉ាណែត បានដាក់ជាសំណួរថា អ្វីទាំងអស់នេះតើវាកើតមានដោយចៃដន្យនៅកម្ពុជាឬ? ចម្លើយគឺមិនមែនទេ វាបានកើតឡើងដោយសារកត្តាលទ្ធភាព គឺពលរដ្ឋមានលទ្ធភាពក្នុងការទិញ ស្មាតហ្វូនប្រើប្រាស់ ថែមទាំងមានលុយបញ្ចូលកាតទូរសព្ទថែមទៀតផង ហើយកត្តាមួយទៀតនោះគឺ កត្តានៃការគ្រប់បណ្តប់នៃសេវា ដែលសូម្បីតែទៅដល់ព្រំដែនបច្ចុប្បន្នកងទ័ពរបស់យើងមិនចាំបាច់រាយការណ៍តាមវិទ្យុទាក់ទងទៀតទេ គាត់អាចថតបញ្ជូនរូបភាព និងរាយការណ៍បានយ៉ាងលឿន។ សម្ដេចធិបតីបានថ្លែងបញ្ជាក់ថា៖ «អីចឹងការវិនិយោគលើសេវាទូរស័ព្ទឌីជីថលគឺកើតឡើងដោយសារការគ្របបណ្តប់នៃហេដ្ឋារចនាសម្ព័ន្ធ ដែលអ្វីៗទាំងអស់នេះមិនមែនកើតឡើងដោយចៃដន្យនោះទេ វាកើតឡើងដោយសារការដាក់ចេញនូវគោលនយោបាយដោយច្បាស់លាស់របស់រាជរដ្ឋាភិបាលនៅក្នុងរយៈពេលជាងពីរទសរត្សរ៍កន្លងមកនេះដែលយើងចាប់ផ្តើមផ្តោតខ្លាំងទៅលើវិស័យឌីជីថល។ យើងគិតថានៅកម្ពុជាឌីជីថលកំពុងតែរីកដូចនេះគឺ ក្រោយពីយើងបានបង្កើតស្ថាប័នណៃដា (NIDA) ស្ថិតក្រោមទីស្តីការគណៈរដ្ឋមន្ត្រីនៅឆ្នាំ២០០០ ដែលពេលនោះស្ថាប័នមួយនេះមានឈ្មោះថា អាជ្ញាធរជាតិទទួលបន្ទុកកិច្ចការអភិវឌ្ឍន៍វិស័យបច្ចេកវិទ្យា ទូរគមនាគមន៍ និងព័ត៌មានវិទ្យា ដែលចក្ខុវិស័យរបស់សម្តេចអគ្គមហាសេនាបតីតេជោ ហ៊ុន សែន ក្នុងនាមជានាយករដ្ឋមន្ត្រីនៅពេលនោះ ក៏ដូចជាថ្នាក់ដឹកនាំក្រសួង ស្ថាប័នជំនាញ សម្តេចវិបុលបញ្ញា សុខ អាន ក៏បានរៀបចំនូវការគិតគូនេះឡើង ដោយកិច្ចការមួយនេះមិនមែនធ្វើមួយថ្ងៃចេញនោះទេ គឺត្រូវការពេលវែង។ ប៉ុន្តែវាត្រូវចាប់ផ្តើមជាមួយនឹងចក្ខុវិស័យច្បាស់លាស់ និងគោលនយោបាយត្រឹមត្រូវ រួមទាំងផែនការនៃការអនុវត្តផងដែរ ដែលធ្វើឱ្យក្នុងរយៈពេលជាង២០ឆ្នាំ មកនេះការធ្វើសកម្មភាពលើផែនការមេក្នុងការអភិវឌ្ឍវិស័យឌីជីថលរបស់យើងទទួលបានជោគជ័យ»៕

ដោយ៖ ចាន់ សុភឿន