AKP សៀមរាប ថ្ងៃទី០៤ ខែកុម្ភៈ ឆ្នាំ២០២៥-- អាជ្ញាធរជាតិអប្សរា នារសៀលថ្ងៃទី០៤ ខែកុម្ភៈ ឆ្នាំ២០២៥នេះ បានប្រកាសថា ក្នុងរយៈកាលថ្មីៗនេះ ចំនួនសត្វស្វានៅក្នុងតំបន់រមណីយដ្ឋានអង្គរ មានការកើនឡើងគួរឱ្យកត់សម្គាល់។ បច្ចុប្បន្ន តាមរយៈការផ្តល់ចំណីជាប្រចាំរបស់ក្រុមបុគ្គលមួយចំនួនតូច ក្នុងគោលបំណងផលិតមាតិកាជាប្រយោជន៍ផ្ទាល់ខ្លួន បានផ្លាស់ប្តូរនូវទម្លាប់រស់នៅបែបធម្មជាតិរបស់សត្វស្វា ពីសត្វព្រៃ ទៅជាសត្វស្រុក ដែលមានចរិតកាច ចេះដណ្ដើមចំណី និងឈានរហូតដល់ការបង្កជារបួសស្នាមទៅលើមនុស្សជាដើម។

ក្នុងគោលដៅដើម្បីស្វែងរកដំណោះស្រាយពាក់ព័ន្ធនឹងករណីខាងលើនេះ អាជ្ញាធរជាតិអប្សរា ក្រោមកិច្ចសហការជិតស្និទ្ធជាមួយស្ថាប័នជំនាញនានារបស់ក្រសួងកសិកម្ម រុក្ខាប្រមាញ់ និងនេសាទ ដូចជា រដ្ឋបាលព្រៃឈើ និងមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាបជាដើម បានប្រជុំពិភាក្សាគ្នាជាបន្តបន្ទាប់ឈានទៅរកការអនុវត្តវិធានការចាំបាច់នានា នាពេលខាងមុខ។ មួយវិញទៀត នាពេលកន្លងមក ទាំងអាជ្ញាធរជាតិអប្សរា និងស្ថាប័នជំនាញខាងលើ បានចេញជាសេចក្តីប្រកាសព័ត៌មានអំពីបញ្ហានេះ អមដោយការអំពាវនាវជាសាធារណៈ ស្នើសាធារណជនទាំងអស់ មេត្តានៅឱ្យឆ្ងាយពីសត្វស្វា បញ្ឈប់ការផ្តល់ចំណី ចៀសវាងប៉ះពាល់ ឬលេងជាមួយសត្វស្វា ជាដើម។ល។

ជាថ្មីម្តងទៀត អាជ្ញាធរជាតិអប្សរាសូមស្នើសាធារណជន ភ្ញៀវទេសចរជាតិ-អន្តរជាតិ មគ្គុទ្ទេសក៍ទេសចរណ៍ និងប្រតិបត្តិករវិស័យទេសចរណ៍ក្នុងខេត្តសៀមរាបទាំងអស់ មេត្តាជួយផ្សព្វផ្សាយនូវខ្លឹមសារនេះ ក៏ដូចជាណែនាំ និងបញ្ឈប់នូវសកម្មភាពណាមួយដែលអាចនាំមកនូវបញ្ហាបង្កឡើងដោយសត្វស្វាជាយថាហេតុ។

ជាមួយគ្នានេះ អាជ្ញាធរជាតិអប្សរានឹងបន្តកិច្ចសហការជាមួយផ្នែកជំនាញពាក់ព័ន្ធនៃក្រសួងកសិកម្ម រុក្ខាប្រមាញ់ និងនេសាទ ដើម្បីស្វែងរកដំណោះស្រាយសមរម្យ ក្នុងការបញ្ចៀសនូវបញ្ហាផ្សេងៗក្នុងឧទ្យានអង្គរ ដែលបង្កឡើងដោយសត្វស្វា។

សូមបញ្ជាក់ថា នៅក្នុងស្ថានភាពនៃសត្វស្វាទាំងនោះបានរស់នៅជាហ្វូងផ្សេងៗគ្នាទៅតាមប្រាសាទនីមួយៗ ដើម្បីស្វែងរកចំណីទៅតាមតំបន់ខុសៗគ្នា ដោយក្នុងនោះមាន ៣ទីតាំង ក្នុងនោះ ១. ទីតាំងបរិវេណក្នុង និងក្រៅអង្គរវត្ត (២ហ្វូង) ចំនួនស្វាសរុបប្រហែល ១៣០ ក្បាល ២. ទីតាំងបរិវេណអតិតរាជាធានីអង្គរធំ(៤ហ្វូង) ចំនួនស្វាសរុបប្រហែល ៣៣០ ក្បាល និង៣. ទីតាំងបរិវេណប្រាសាទធម្មនន្ទ (១ហ្វូង) ចំនួនស្វាសរុបប្រហែល ៣០ ក្បាល។ ដោយនៅក្នុងទីតាំងសត្វស្វាដែលកំពុងរស់នៅទាំងនេះ ក្នុងនោះមានទីតាំងប្រាសាទអង្គរវត្ត និងទីតាំងបរិវេណអតីតរាជធានីអង្គរធំ តែងមានសត្វស្វាបង្កផលប៉ះពាល់ដល់ប្រាសាទ និងភ្ញៀវទេសចរច្រើនជាងគេ៕

ដោយ ឃុត សៅ