AKP ភ្នំពេញ ថ្ងៃទី ០៤ ខែកុម្ភៈ ឆ្នាំ ២០២៥៖ នាយកដ្ឋានព័ត៌មាន នៃវិទ្យាស្ថានស្ដង់ដារកម្ពុជា នៅព្រឹកថ្ងៃទី៤ ខែកុម្ភៈ ឆ្នាំ២០២៥នេះ បានរៀបចំវគ្គបណ្ដុះបណ្ដាលស្ដីពី "ការស្វែងរកព័ត៌មានអំពីរបាំងបច្ចេកទេសចំពោះពាណិជ្ជកម្ម"ដោយមានការអញ្ជើញចូលរួមពីតំណាងក្រសួង-ស្ថាប័នរាជរដ្ឋាភិបាលពាក់ព័ន្ធ សមាគម និងតំណាងពីវិស័យឯកជន ចំនួន ៦០រូបចូលរួម។ 

វគ្គបណ្ដុះបណ្ដាលនេះ រៀបចំឡើងមានគោលបំណងដើម្បីពង្រឹងនូវចំណេះដឹង ដល់ក្រសួង-ស្ថាប័នពាក់ព័ន្ធនិងវិស័យឯកជនឱ្យយល់កាន់តែច្បាស់អំពីរបាំងបច្ចេកទេស ចំពោះពាណិជ្ជកម្ម (Technical Barrier to Trade - TBT) ដែលជាផ្នែកដ៏សំខាន់មួយក្នុងកិច្ចសម្រួលពាណិជ្ជកម្ម ជាពិសេសសិក្ខាកាមបានសិក្សាស្វែងយល់ពីព័ត៌មានពាក់ព័ន្ធ នឹងការអនុវត្តច្បាប់ ស្តង់ដារ បទប្បញ្ញត្តិបច្ចេកទេស និងនីតិវិធីវាយតម្លៃភាពអនុលោមនៅតាមបណ្ដាប្រទេសផ្សេងៗ តាមរយៈប្រព័ន្ធ ePingAlert Platform របស់អង្គការពាណិជ្ជកម្មពិភពលោក (WTO) ដើម្បីឈានទៅធ្វើការប្រកួតប្រជែងលើទីផ្សារក្នុងនិងក្រៅប្រទេស។

ទន្ទឹមនឹងនេះដែរ អ្នកចូលរួមអាចនឹងធ្វើការសិក្សាស្វែងយល់ស៊ីជម្រៅអំពីវិធីសាស្ត្រ ឬរបៀបក្នុងការស្វែងរកព័ត៌មាន ដែលពាក់ព័ន្ធនឹង ស្តង់ដារ បទប្បញ្ញត្តិបច្ចេកទេស និងនីតិវិធីវាយតម្លៃភាពអនុលោមដោយបើកចំហ និងងាយស្រួល ដែលជាគោល ការណ៍តម្លាភាព នៃកិច្ចព្រមព្រៀងស្តីពីរបាំងបច្ចេកទេសចំពោះពាណិជ្ជកម្ម របស់អង្គការពាណិជ្ជកម្មពិភពលោក៕

ដោយ៖ ចរិយា