AKP ភ្នំពេញ ថ្ងៃទី០៤ ខែកុម្ភៈ ឆ្នាំ២០២៥-- ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានអញ្ជើញជាអធិបតីក្នុងពិធីបើកសិក្ខាសាលាពិគ្រោះយោបល់ស្តីពីរបាយការណ៍លទ្ធផលបឋមលើការវាយតម្លៃស្ថានភាពអនុវត្ត និងការគ្រប់គ្រងប្រព័ន្ធទិន្នន័យមូលដ្ឋានឃុំ សង្កាត់ (CDB) នៅភោជនីយដ្ឋានទន្លេបាសាក់២ រាជធានីភ្នំពេញ កាលពីថ្ងៃទី០៣ ខែកុម្ភៈ ឆ្នាំ២០២៥ ដោយមានការអញ្ជើញចូលរួមពីលោកបណ្ឌិត Anirban Chatterjee នាយករងប្រចាំប្រទេសនៃអង្គការយូនីសេហ្វ ឯកឧត្តមរដ្ឋលេខាធិការ អនុរដ្ឋលេខាធិការក្រសួងផែនការ លោក លោកស្រី អភិបាលរងរាជធានីខេត្ត ប្រធានមន្ទីរផែនការរាជធានីខេត្ត តំណាងក្រសួងស្ថាប័នពាក់ព័ន្ធ និងដៃគូអភិវឌ្ឍ។

ក្នុងឱកាសនោះ ឯកឧត្តមរដ្ឋមន្ត្រីបានសម្តែងការស្វាគមន៍ចំពោះលោកបណ្ឌិត Anirban Chatterjee នាយករងប្រចាំប្រទេសនៃអង្គការយូនីសេហ្វ ព្រមទាំងឯកឧត្តម លោកជំទាវ លោក លោកស្រីទាំងអស់ ដែលមានវត្តមានក្នុងពិធី និងចំពោះអង្គការយូនីសេហ្វ (UNICEF) ដែលបានជួយគាំទ្រដល់សកម្មភាពការងារនានារបស់ក្រសួងផែនការនាពេលកន្លងមក ក៏ដូចជាជួយគាំទ្រសម្រាប់ការរៀបចំសិក្ខាសាលានាពេលនេះ។

ឯកឧត្តមរដ្ឋមន្ត្រី បានគូសបញ្ជាក់ថា សិក្ខាសាលាត្រូវបានរៀបចំឡើងដើម្បីពិនិត្យ និងពិគ្រោះយោបល់លើព័ត៌មាន និងធាតុចូលដែលបានរកឃើញពីការវាយតម្លៃស្ថានភាពអនុវត្ត និងការគ្រប់គ្រងប្រព័ន្ធទិន្នន័យមូលដ្ឋានឃុំ សង្កាត់ (CDB) ក្នុងរបាយការណ៍បឋម ដើម្បីស្វែងរកដំណោះស្រាយសមស្រប និងមានប្រសិទ្ធភាព សម្រាប់ការដោះស្រាយបញ្ហាប្រឈម ដែលបានជួបប្រទះនាពេលកន្លងមក និងដើម្បីធានាដល់ការរៀបចំរបាយការណ៍ចុងក្រោយ ប្រកបដោយខ្លឹមសារពេញលេញ និងគ្រប់ជ្រុងជ្រោយ ដែលនឹងក្លាយជាទិន្នន័យមានគុណភាព និងជឿទុកចិត្តបាន ព្រមទាំងជំរុញការប្រើប្រាស់ទិន្នន័យនេះ ឱ្យកាន់តែមានភាពទូលំទូលាយ។

ទន្ទឹមនឹងនេះ ឯកឧត្តមរដ្ឋមន្ត្រីបានបន្ថែមថា កន្លងមកទិន្នន័យមូលដ្ឋានឃុំ សង្កាត់ CDB នេះ ត្រូវបានប្រើប្រាស់ដោយក្រសួង ស្ថាប័ន និងរដ្ឋបាលថ្នាក់ក្រោមជាតិ សម្រាប់ការរៀបចំផែនការអភិវឌ្ឍន៍ កម្មវិធីផែនការថវិកា និងគោលដៅផ្សេងទៀត។ យ៉ាងណាក្តី បន្ទាប់ពីការសិក្សាវាយតម្លៃរួច តាមរបាយការណ៍លទ្ធផលបឋម បានរកឃើញនូវចំណុចមួយចំនួនដែលត្រូវធ្វើការពិភាក្សានិងកែសម្រួល ដើម្បីឆ្លើយតបទៅនឹងការប្រែប្រួលស្ថានភាពសេដ្ឋកិច្ច-សង្គម នាពេលបច្ចុប្បន្ន និងដើម្បីជាមូលដ្ឋានរឹងមាំក្នុងការដាក់ចេញជាអនុសាសន៍នានា នាពេលអនាគត ដែលតម្រូវឱ្យមានការរៀបចំសិក្ខាសាលានេះឡើង។ ដូច្នេះ ដើម្បីឱ្យទិន្នន័យមូលដ្ឋានឃុំ សង្កាត់ (CDB) ក្លាយជាឧបករណ៍ដ៏មានសារៈសំខាន់សម្រាប់ការរៀបចំគោលនយោបាយ កម្មវិធី ផែនការអភិវឌ្ឍន៍ និងគម្រោងនានា ដែលគាំទ្រដល់កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ (២០២១-២០៣០) ការផ្តល់ជាធាតុចូលពីក្រសួង ស្ថាប័ន ដៃគូអភិវឌ្ឍ និងភាគីពាក់ព័ន្ធ គឺមានសារៈសំខាន់ណាស់។

ជាមួយគ្នានេះដែរ ឯកឧត្តមរដ្ឋមន្ត្រីបានគូសបញ្ជាក់ពីការយកចិត្តទុកដាក់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលសម្តេចបានផ្តល់តម្លៃខ្ពស់លើការងារទិន្នន័យ ផែនការ និង ការតាមដានត្រួតពិនិត្យ និងវាយតម្លៃ (M&E)។ ទិន្នន័យជាមូលដ្ឋានគ្រឹះនៃកម្មវិធីកំណែទម្រង់ការគ្រប់គ្រងរដ្ឋបាលរបស់រាជរដ្ឋាភិបាលផងដែរ ក្នុងបរិការណ៍នៃការផ្លាស់ប្តូរពីប្រព័ន្ធគ្រប់គ្រងតាមបែបមជ្ឈការ ទៅជាប្រព័ន្ធអភិបាលកិច្ចមូលដ្ឋានតាមបែបវិមជ្ឈការរបស់រាជរដ្ឋាភិបាល ស្របទៅនឹងគោលបំណងដែលធ្វើឱ្យអាជ្ញាធរមូលដ្ឋានមានម្ចាស់ការ គ្រប់គ្រង ដោះស្រាយរាល់ភារកិច្ចនៅមូលដ្ឋានបានឆាប់រហ័ស ទាន់ពេលវេលា និងចំទិសដៅ និងអាចប្រើប្រាស់អស់លទ្ធភាពនូវសក្តានុពលរបស់ខ្លួន និងដោយមានការឧបត្ថម្ភគាំទ្រពីរាជរដ្ឋាភិបាល និងសហគមន៍ផ្តល់ជំនួយដើម្បីអភិវឌ្ឍមូលដ្ឋាន ចាក់គ្រឹះលទ្ធិប្រជាធិបតេយ្យឱ្យដល់មូលដ្ឋាន និងធានានិរន្តរភាពនៃការអភិវឌ្ឍ និងកាត់បន្ថយភាពក្រីក្ររបស់ប្រជាពលរដ្ឋ។

ឯកឧត្តមរដ្ឋមន្ត្រីបានបង្ហាញជំនឿជឿជាក់ថា តាមរយៈសិក្ខាសាលាពិគ្រោះយោបល់នេះនឹងប្រមូលបានព័ត៌មាន ធាតុចូល និងការចែករំលែកនូវបទពិសោធន៍ និងឧត្តមានុវត្តន៍នានា សម្រាប់ការពង្រឹង និងពង្រីកទិន្នន័យមូលដ្ឋាន ឃុំ សង្កាត់ (CDB) ឱ្យកាន់តែប្រសើរឡើងថែមទៀត៕

ដោយ ពេជ្រ សំអឿន (ប្រភព៖ ក្រសួងផែនការ)