AKP ព្រះវិហារ ថ្ងៃទី០១ ខែកុម្ភៈ ឆ្នាំ២០២៥ -- ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ អមដំណើរប្រតិភូ ដោយឯកឧត្តម គីម រិទ្ធី អភិបាលនៃគណៈអភិបាលខេត្ត កាលពីថ្ងៃទី៣១ ខែមករា ឆ្នាំ២០២៥ បានអញ្ជើញធ្វើទស្សនកិច្ចនៅទីតាំងសម្បទានដីសង្គមកិច្ច និងពិនិត្យពីជីវភាពរស់នៅរបស់គ្រួសារយោធិននៅក្នុងភូមិសាស្ត្រស្រុកជាំក្សាន្ត ខេត្តព្រះវិហារ ដោយមានការអញ្ជើញចូលរួមពីសំណាក់ឧត្តមសេនីយ៍ឯក ស្រី ឌឹក មេបញ្ជាការកងពលធំអន្តរាគមន៍លេខ៣  មេបញ្ជាការមេបញ្ជាការរងកងកម្លាំងទាំងបី ប្រធានមន្ទីរ អង្គភាពពាក់ព័ន្ធ ព្រមទាំងអាជ្ញាធរមូលដ្ឋានជាច្រើនរូបទៀត។ ដំណើរទស្សនកិច្ចនេះមានគោលបំណងស្ដាប់ពីការលំបាក និងសំណូមពររបស់ប្រជាពលរដ្ឋ ក៏ដូចជាពិនិត្យមើលការប្រើប្រាស់ដីសម្បទានជាក់ស្ដែង។

ឯកឧត្តម សាយ សំអាល់ បានពិនិត្យមើលការអនុវត្តគម្រោងទីតាំងដីសម្បទានជាក់ស្ដែងដើម្បីវាយតម្លៃពីការអនុវត្តគម្រោង និងដោះស្រាយបញ្ហាប្រឈមដែលអាចកើតមាន និងមានប្រសាសន៍ថា គោលដៅសំខាន់គឺធានាថាដីសម្បទានត្រូវបានប្រើប្រាស់ប្រកបដោយប្រសិទ្ធភាព និងស្របតាមគោលដៅនៃគម្រោង។

ទន្ទឹមនឹងនេះ ឯកឧត្តមបានបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលចំពោះជីវភាពរស់នៅរបស់គ្រួសារយោធិន និងប្រជាពលរដ្ឋដែលកំពុងរស់នៅលើដីសម្បទានសង្គមកិច្ច និងបានសង្កត់ធ្ងន់ថារាជរដ្ឋាភិបាលតែងតែខិតខំដោះស្រាយ និងលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង។

ជាមួយគ្នានេះដែរ ឯកឧត្តមរដ្ឋមន្ត្រីក៏បានមានប្រសាសន៍ណែនាំដល់អាជ្ញាធរមូលដ្ឋាន និងមន្ត្រីពាក់ព័ន្ធឱ្យយកចិត្តទុកដាក់លើការអនុវត្តគម្រោងដីសម្បទានសង្គមកិច្ចឱ្យមានតម្លាភាព និងប្រសិទ្ធភាពដើម្បីធានាថាប្រជាពលរដ្ឋទទួលបានអត្ថប្រយោជន៍ពិតប្រាកដពីគម្រោងនេះ និងជំរុញឱ្យប្រជាពលរដ្ឋដែលកំពុងរស់នៅលើដីសម្បទានសង្គមកិច្ចប្រើប្រាស់ដីឱ្យមានប្រយោជន៍ សម្រាប់ជាប្រយោជន៍ដល់គ្រួសារ និងសង្គមជាតិ៕

ដោយ ទិត ស្រ៊