AKP កណ្ដាល ថ្ងៃទី០១ ខែកុម្ភៈ ឆ្នាំ២០២៥ -- ឯកឧត្តម គួច ចំរើន អភិបាលខេត្តកណ្ដាល បានណែនាំដល់មេឃុំ និងចៅសង្កាត់ទាំងអស់ក្នុងខេត្តកណ្ដាល ត្រូវធ្វើការពិនិត្យឱ្យបានច្បាស់លាស់នូវប្រជាពលរដ្ឋរបស់ខ្លួនដែលបានមកដាក់ពាក្យស្នើសុំដី ក្នុងកម្មវិធីផ្ដល់ដី ការពារព្រៃឈើដើម្បីរូបគ្នាអភិវឌ្ឍន៍ដោយចីរភាព ដែលបានដាក់ចេញដោយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដោយធានាបានថា ប្រជាពលរដ្ឋដែលបានដាក់ពាក្យស្នើសុំដីទាំងអស់ គឺជាប្រជាពលរដ្ឋដែលក្រីក្រគ្មានដីសម្រាប់សាងសង់លំនៅឋាន និងគ្មានដីសម្រាប់ធ្វើអាជីវកម្ម។ ឯកឧត្តមអភិបាលខេត្តកណ្ដាលបានធ្វើការណែនាំបែបនេះ ក្នុងកិច្ចប្រជុំបូកសរុបលទ្ធផលការងារប្រចាំខែមករា និងលើកទិសដៅការងារ ខែកុម្ភៈ ឆ្នាំ២០២៥ របស់រដ្ឋបាលខេត្តកណ្តាល កាលពីរសៀលថ្ងៃទី៣១ ខែមករា ឆ្នាំ២០២៥ នៅសាលប្រជុំសាលាខេត្តកណ្ដាល។

ឯកឧត្តមបានបន្តថា រាជរដ្ឋាភិបាលនីតិកាលទី៧នៃរដ្ឋសភា ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បាន និងកំពុងដាក់ឱ្យដំណើរការ “កម្មវិធីផ្តល់ដី ការពារព្រៃដើម្បីរួមគ្នាអភិវឌ្ឍដោយចីរភាព” ក្នុងគោលបំណងបង្កើនការការពារ និងអភិរក្សធនធានធម្មជាតិប្រកបដោយចីរភាពសម្រាប់កូនចៅតជំនាន់ផង និងបង្កើនប្រសិទ្ធភាព ផលិតភាពនៃការប្រើប្រាស់ដីរដ្ឋផង តាមរយៈការផ្តល់ដីក្រោមទម្រង់សម្បទានដីសង្គមកិច្ចជូនដល់ ប្រជាពលរដ្ឋក្រីក្រគ្មានដីសម្រាប់សង់លំនៅឋាន និងក្រីក្រគ្មានដីសម្រាប់ធ្វើកសិកម្មជាលក្ខណៈគ្រួសារ និងគាំទ្រគម្រោងអភិវឌ្ឍសហគមន៍ ព្រមទាំងការពារព្រៃនៅជិតទីតាំងផ្តល់ដីប្រកបដោយចីរភាព។

ទន្ទឹមនឹងនេះ ឯកឧត្តមអភិបាលខេត្តបានបន្ថែមថា កម្មវិធីនេះនឹងផ្តល់ដីនៅក្នុងតំបន់មួយចំនួនដល់អ្នកក្រីក្រគ្មានដីពិតប្រាកដ ប្រកបដោយសមធម៌ ដើម្បីរួមគ្នាកសាងសហគមន៍ក្នុងការប្រើប្រាស់អាស្រ័យផល និងការការពារព្រៃ និងដីរដ្ឋសម្រាប់ការអភិវឌ្ឍដោយចីរភាព។ ហើយការដាក់ពាក្យស្នើសុំដីដោយឥតគិតថ្លៃ នៅសាលាឃុំ សង្កាត់ដែលរបស់ប្រជាពលរដ្ឋរស់នៅ។ រដ្ឋបាលឃុំ សង្កាត់ ត្រូវបង្កើតក្រុមការងារចំពោះកិច្ចថ្នាក់ឃុំសង្កាត់ ដឹកនាំដោយមេឃុំ-ចៅសង្កាត់ និងមាន ការចូលរួមពីក្រុមប្រឹក្សាឃុំ សង្កាត់ មេភូមិ ចាស់ព្រឹទ្ធាចារ្យ និងអ្នកពាក់ព័ន្ធ ដើម្បីពិនិត្យភាពសមស្រប និងជ្រើសរើសបុគ្គលមានសិទ្ធិទទួលដីឱ្យបានត្រឹមត្រូវតាមគោលការណ៍ជាធរមាន៕

ដោយ ណយ នឿន (ប្រភព៖ រដ្ឋបាលខេត្តកណ្តាល)