AKP ភ្នំពេញ ថ្ងៃទី០១ ខែកុម្ភៈ ឆ្នាំ២០២៥ -- ឯកឧត្តម ហ៊ែល តូនី អនុប្រធានក្តាប់រួម អាជ្ញាធរទន្លេសាប ឯកឧត្តម សរ គឹមសាន្ត អគ្គលេខាធិការអាជ្ញាធរទន្លេសាប កាលថ្ងៃទី៣០-៣១ ខែមករា ឆ្នាំ២០២៥ នៅសាលប្រជុំអាជ្ញាធរទន្លេសាប បានអញ្ជើញជាអធិបតីដឹកនាំកិច្ចប្រជុំពិភាក្សាពិនិត្យលើតារាងម៉ាទ្រិចចង្កោមសកម្មភាពការងារអាទិភាព របស់អគ្គលេខាធិការដ្ឋានអាជ្ញាធរទន្លេសាប ប្រចាំឆ្នាំ២០២៥ ដោយមានការអញ្ជើញចូលរួមពីឯកឧត្តមអគ្គលេខាធិការរង ប្រធាន-អនុប្រធាននាយកដ្ឋាន ប្រធាន-អនុប្រធានការិយាល័យ និងមន្រ្តីក្រោមឱវាទនាយកដ្ឋាននីតិកម្ម និងផ្សព្វផ្សាយ នាយកដ្ឋានត្រួតពិនិត្យការធ្វើអាជីវកម្ម និងអភិរក្ស នាយកដ្ឋានធនធានធម្មជាតិ និងនាយកដ្ឋានរដ្ឋបាល ផែនការ និងសហប្រតិបត្តិការនៃអគ្គលេខាធិការដ្ឋានអាជ្ញាធរទន្លេសាប។ 

ក្នុងឱកាសនោះ ឯកឧត្តមបានឯកភាពផ្តល់ជូននាយកដ្ឋានរៀបចំផែនការលម្អិតនៃសកម្មភាពនីមួយៗ ដោយបញ្ជាក់ឱ្យបានច្បាស់លាស់ពីGoal Objective Output and Outcome និងតារាងលម្អិតពេលវេលាអនុវត្តន៍ (Time Frame) និងផ្តល់ជូននាយកដ្ឋានត្រូវបន្តអនុវត្តន៍ឱ្យសម្រេចបាននូវលទ្ធផលការងារកាន់តែល្អប្រសើរ ទាន់ពេលវេលា ទាំងលើការអនុវត្តតួនាទី ភារកិច្ចស្នូលរបស់នាយកដ្ឋាន និងការអនុវត្តការងារចំពោះមុខដែលថ្នាក់ដឹកនាំប្រគល់ជូន ការគ្រប់គ្រង ចាត់ចែង ព្រមទាំងសាមគ្គីភាពផ្ទៃក្នុងរបស់នាយកដ្ឋាន។ សេចក្តីព្រាងតារាងម៉ាទ្រិចចង្កោមសកម្មភាពអាទិភាពការងារប្រចាំឆ្នាំ២០២៥ របស់អគ្គលេខាធិការដ្ឋាន អាជ្ញាធរទន្លេសាប មានកម្មវិធីអាទិភាពចំនួន ១១ ដើម្បីគាំទ្រដល់ផែនការយុទ្ធសាស្រ្ត ២០២៤-២០២៨ របស់អាជ្ញាធរទន្លេសាប ដែលនឹងត្រូវអនុវត្តដោយនាយកដ្ឋាននីតិកម្ម និងផ្សព្វផ្សាយ នាយកដ្ឋានត្រួតពិនិត្យការធ្វើអាជីវកម្ម និងអភិរក្ស នាយកដ្ឋានធនធានធម្មជាតិ និងនាយកដ្ឋានរដ្ឋបាល ផែនការ និងសហប្រតិបត្តិការ។

កិច្ចប្រជុំនេះមានគោលបំណងពិនិត្យ និងពិភាក្សាផ្តល់យោបល់ណែនាំបន្ថែមទៅលើសកម្មភាពអាទិភាពនីមួយៗ ដែលនាយកដ្ឋានបានដាក់ស្នើឡើងក្នុងតារាងម៉ាទ្រិចសម្រាប់សកម្មភាពប្រចាំឆ្នាំ២០២៥ ដើម្បីស្នើសុំគោលការណ៍ខ្ពង់ខ្ពស់ពីឯកឧត្តមប្រធាន ពិនិត្យអនុម័តដាក់ឱ្យដំណើរការអនុវត្តរួម ជាផែនការ របស់អគ្គលេខាធិការដ្ឋានអាជ្ញាធរទន្លេសាប ឆ្នាំ២០២៥៕

ដោយ ណយ នឿន (ប្រភព៖ អាជ្ញាធរទន្លេសាប)