AKP ព្រះសីហនុ ថ្ងៃទី៣១ ខែមករា ឆ្នាំ២០២៥-- លោក ឡុង ឌីម៉ង់ អភិបាលរងនៃគណៈអភិបាលខេត្តព្រះសីហនុ អញ្ជើញសំណេះសំណាលជាមួយមន្ត្រីរាជការ មន្រ្តីកិច្ចសន្យា និវត្តន៍ជន និងអ្នកសារព័ត៌មានក្នុងខេត្តព្រះ សីហនុ ក្នុងឱកាសបុណ្យឆ្លងឆ្នាំសកល និងបុណ្យចូលឆ្នាំចិន វៀតណាម នារសៀលថ្ងៃសុក្រ ទី៣១ ខែមករា ឆ្នាំ២០២៥។

ក្នុងឱកាសនោះ លោកអភិបាលរងក៏បានពាំនាំការផ្តាំផ្ញើសួរសុខទុក្ខ និងសេចក្តីនឹករលឹកពីឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ ជូនចំពោះមន្ត្រីរាជការ ថ្វីត្បិតតែឯកឧត្តមមានភារកិច្ចមិនបានចូលរួមនាពេលនេះ ក៏ប៉ុន្តែឯកឧត្តមបានឱ្យរូបខ្ញុំពាំនាំសួរសុខទុក្ខជូនចំពោះមន្ត្រីរាជការ មន្ត្រីកិច្ចសន្យា និងអ្នកសារព័ត៌មានក្នុងខេត្តព្រះសីហនុ ដែលយើងសុទ្ធសឹងតែបានបំពេញការងារតាមតួនាទី ភារកិច្ចរៀងខ្លួនក្នុងការចូលរួមកសាង និងអភិវឌ្ឍខេត្តព្រះសីហនុ មានការអភិវឌ្ឍរីកចម្រើននាពេលកន្លងមក ក៏ដូចនាពេលបច្ចុប្បន្នផងដែរ។

លោកអភិបាលរងខេត្តបានថ្លែងអំណរគុណមន្ត្រីរាជការ មន្ត្រីកិច្ចសន្យា និវត្តន៍ជន និងអ្នកសារព័ត៌មានខេត្តព្រះសីហនុ ដែលបានចូលរួមដើម្បីបង្កើនភាពស្និទ្ធស្នាលរវាងថ្នាក់ដឹកនាំខេត្ត ជាមួយមន្ត្រីរាជការក្រោមឱវាទ និងអ្នកសារព័ត៌មាន ពិសេសទាក់ទងទៅនឹងការបំពេញការងារ ការគោរពវិន័យ របៀបរបបបំពេញការងារ កន្លងមកយើងបានបំពេញការងារបានល្អ ដូច្នេះត្រូវបង្កើនកែលម្អនូវអ្វីដែលថ្មីៗបន្ថែមទៀត ដើម្បីឱ្យប្រសិទ្ធភាពការងាររបស់យើងកាន់តែល្អប្រសើរជាងឆ្នាំកន្លងមក។ ទន្ទឹមនោះយើងត្រូវធ្វើការបណ្តុះបណ្តាល ការសិក្សារៀនសូត្របន្ថែម ដើម្បីបង្កើនបាននូវចំណេះដឹង បំណិនជីវិតស្របទៅនឹងបរិបទបច្ចេកវិទ្យាឌីជីថល ព្រមទាំងបានលើកទឹកចិត្តដល់មន្ត្រីរាជការ ថ្នាក់ដឹកនាំទាំងអស់ត្រូវព្យាយាមដុសខាត់ សម្រួច សម្រង់ បំពាក់បំប៉ន អភិវឌ្ឍធនធានចំណេះដឹងរបស់ខ្លួន ខិតខំសិក្សារៀនសូត្រស្របតាមបច្ចេកវិទ្យាឌីជីថល ដោយ ផ្តោតសំខាន់ទៅលើគោលនយោបាយរបស់រាជរដ្ឋាភិបាលកម្ពុជា ក្នុងការអភិវឌ្ឍធនធានមនុស្ស ទឹក ភ្លើង ផ្លូវ និងបច្ចេកវិទ្យា អាណត្តិទី៧ នៃរដ្ឋសភា ដើម្បីប្រសិទ្ធភាព ប្រសិទ្ធផលការងាររបស់យើងទាំងអស់គ្នា បើទោះបីបរិយាកាសកន្លែងការងាររបស់យើងមិនសូវល្អ ក៏ប៉ុន្តែបងប្អូនបានខិតខំបំពេញកិច្ចការរបស់ខ្លួនបានល្អជូនថ្នាក់ដឹកនាំឈានទៅសម្រេចបានការអភិវឌ្ឍខេត្តព្រះសីហនុរបស់យើងបានល្អបន្ថែមទៀត ស្របតាមឆន្ទ និងបំណងប្រាថ្នារបស់យើងទាំងអស់គ្នាដោយត្រូវគិតថា ថ្ងៃនេះ ត្រូវតែល្អជាងថ្ងៃម្សិល ត្រូវតាំងចិត្តថា ថ្ងៃស្អែកធ្វើបានល្អជាងថ្ងៃនេះ។

លោកអភិបាលរងខេត្តបានបន្តថា យើងជាមន្ត្រីរាជការត្រូវធ្វើខ្លួនឱ្យបានល្អ ជាមន្ត្រីបម្រើសេវាជូនប្រជាពលរដ្ឋប្រកបដោយប្រសិទ្ធភាព តាមរយៈស្នាដៃដែលយើងបានបំពេញការងារដោយការយកចិត្តទុកដាក់តាមតួនាទី ភារកិច្ចរបស់ខ្លួន ព្រោះយើងមានឱកាសចាប់យកការងារធំៗជាច្រើនបន្ថែមទៀតនៅពេលខាងមុខ ដោយការទំនួលខុសត្រូវក្នុងការបំពេញការងាររៀងៗខ្លួន។

លោកអភិបាលរងខេត្ត បានបញ្ជាក់ថា អនុប្រធាន ប្រធានការិយាល័យ នាយកទីចាត់ការ ក៏ដូចនាយករដ្ឋបាល ជាសេនាធិការឱ្យរដ្ឋបាលខេត្តព្រះសីហនុ ដូច្នេះយើងត្រូវចេះសង្កេតស្វែងរកមន្ត្រីបន្តវេន យើងត្រូវចេះប្រើប្រាស់មន្ត្រីរបស់យើងឱ្យអស់ពីលទ្ធភាពប្រកបដោយឆន្ទ: មនសិការការងារ ត្រូវចេះប្រើប្រាស់វិធីសាស្ត្រ និងសិល្បៈដឹកនាំចាត់ចែងបម្រើការងារក្នុងអង្គភាពដោយតម្លាភាព ប្រសិទ្ធភាព ពិសេសបង្កើននូវចំណេះដឹងស្របតាមប្រព័ន្ធបច្ចេកវិទ្យាឱ្យបានគ្រប់គ្នា៕

ដោយ ងូ សុមុនី