AKP ភ្នំពេញ ថ្ងៃទី៣១ ខែមករា ឆ្នាំ២០២៥-- ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតីក្នុងពិធីសន្និបាតបូកសរុបលទ្ធផលការងារ និងប្រកាសដាក់ឱ្យអនុវត្តជាផ្លូវការផែនការយុទ្ធសាស្ត្រ៥ឆ្នាំ នៃវិទ្យាស្ថានគរុកោសល្យបាត់ដំបង (វ.គ.ប) និងមានការចូលរួមពីឯកឧត្តម លោកជំទាវថ្នាក់ដឹកនាំក្រសួងអប់រំ យុវជន និងកីឡា ក្រុមប្រឹក្សាភិបាលប្រចាំវ.គ.ប តំណាងដៃគូអភិវឌ្ឍន៍ជាតិ និងអន្តរជាតិ តំណាងមន្ទីអប់រំ សាលាគរុកោសល្យនៅជុំវិញខេត្តបាត់ដំបង នាយក នាយិកាសាលាសហការ បុគ្គលិកអប់រំ គរុនិស្សិត លោកគ្រូ អ្នកគ្រូ និងអ្នកពាក់ព័ន្ធ សរុបចំនួនប្រមាណ ៦០០នាក់ នារសៀលថ្ងៃសុក្រ ទី៣១ ខែមករា ឆ្នាំ២០២៥។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានចូលរួមអបអរសាទរគណៈគ្រប់គ្រង បុគ្គលិកអប់រំ គរុនិស្សិតទាំងអស់នៃវិទ្យាស្ថានគរុកោសល្យបាត់ដំបងដែលសម្រេចបាននូវសមិទ្ធិផលជាច្រើននាឆ្នាំកន្លងទៅ និងវាយតម្លៃខ្ពស់ចំពោះកិច្ចខិតខំប្រឹងប្រែងបំពេញការងារប្រកបដោយស្មារតីទទួលខុសត្រូវខ្ពស់របស់មន្ត្រីអប់រំគ្រប់លំដាប់ថ្នាក់ ដើម្បីចូលរួមជាមួយក្រសួងក្នុងការអនុវត្តកម្មវិធីកំណែទម្រង់គ្រឹះស្ថានបណ្តុះបណ្តាលគ្រូ ប្រកបដោយប្រសិទ្ធភាពខ្ពស់ ព្រមទាំងបង្ហាញការគាំទ្រចំពោះទិសដៅការងារបន្តរបស់វិទ្យាស្ថានសម្រាប់ឆ្នាំ២០២៥ ក្នុងការប្រែក្លាយវិទ្យាស្ថានជាមជ្ឈមណ្ឌលឧត្តមភាព សម្រាប់ការបណ្តុះបណ្តាលគ្រូសតវត្សទី២១នៅភូមិភាគពាយ័ព្យនៃកម្ពុជា។

ជាមួយគ្នានេះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី កោតសរសើរ និងថ្លែងអំណរគុណដ៏ជ្រាលជ្រៅដល់រដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន (JICA) ដែលបានចូលរួមគាំទ្រដល់ក្រសួងអប់រំ យុវជន និងកីឡា ក្នុងការបង្កើតវិទ្យាស្ថានគរុកោសល្យបាត់ដំបង និងរាជធានីភ្នំពេញ ដោយការផ្តល់ជំនួយហិរញ្ញប្បទានឥតសំណង បានកសាងហេដ្ឋារចនាសម្ព័ន្ធរឹងប្រកបដោយគុណភាព និងសោភណភាព គាំទ្របច្ចេកទេស ការកសាងកម្មវិធីសិក្សា និងការអភិវឌ្ឍសមត្ថភាពគណៈគ្រប់គ្រង គ្រូឧទ្ទេសរបស់វិទ្យាស្ថាន ដែលជាមូលដ្ឋានគ្រឹះចាំបាច់ក្នុងការបណ្តុះបណ្តាលគ្រូបង្រៀនសតវត្សទី២១ ប្រកបដោយគុណភាព និងឧត្តមភាព ទន្ទឹមនឹងនេះ ក៏បានថ្លែងអំណរគុណដល់ដៃគូអភិវឌ្ឍន៍ជាតិ-អន្តរជាតិជាច្រើនទៀត ដែលបានចូលរួមយ៉ាងសកម្មក្នុងដំណើរការកសាងសមត្ថភាពវិទ្យាស្ថានគរុកោសល្យបាត់ដំបង។

តាមរយៈបាឋកថាគន្លឹះស្ដីពី "កំណែទម្រង់គ្រឹះស្ថានបណ្ដុះបណ្ដាលគ្រូដើម្បីឆ្ពោះទៅរកមជ្ឈមណ្ឌលបណ្ដុះបណ្ដាលប្រកបដោយឧត្ដមភាព" ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានឱ្យដឹងថា ក្រសួងអប់រំ យុវជន និងកីឡាបានដាក់ចេញនូវទិសដៅអាទិភាពចំនួន០៨ចំណុច ក្នុងការធ្វើកំណែទម្រង់វិស័យអប់រំ ដើម្បីបន្តឈានទៅសម្រេច ចក្ខុវិស័យកម្ពុជានៅឆ្នាំ ២០៣០ និងឆ្នាំ២០៥០ ក៏ដូចជាគោលដៅអភិវឌ្ឍន៍ប្រកបដោយចីរភាព ក្នុងការអភិវឌ្ឍធនធានមនុស្ស និងភាពជាពលរដ្ឋសកលឱ្យឆ្លើយតបទៅនឹងបរិបទនៃការអភិវឌ្ឍកម្ពុជា ក្នុងនោះ៖ (១) កំណែទម្រង់សាលារៀន (២) ការអភិវឌ្ឍគ្រូបង្រៀនតាមរយៈកំណែទម្រង់គ្រឹះស្ថានបណ្តុះបណ្តាលគ្រូ (៣) ការអប់រំឌីជីថល (៤) ការអប់រំវិទ្យាសាស្ត្រ និងបច្ចេកវិទ្យា (៥) ការលើកកម្ពស់សុខភាពសិក្សា (៦) ការអភិវឌ្ឍយុវជនដើម្បីលើកកម្ពស់បំណិនសតវត្សរ៍ ២១ (៧) ការបង្កើតមជ្ឈមណ្ឌលឧត្តមភាពនៅគ្រឹះស្ថានឧត្តមសិក្សា និង(៨) ការកសាងប្រព័ន្ធ និងការអភិវឌ្ឍសមត្ថភាពស្ថាប័ន។ ក្រសួងបាននិងកំពុងយកចិត្តទុកដាក់ក្នុងការអភិវឌ្ឍគ្រូបង្រៀនឱ្យមានគុណភាពខ្ពស់ តួយ៉ាងការកែលម្អកម្មវិធីបណ្តុះបណ្តាល និងវិក្រឹតការគ្រូបង្រៀន ការអភិវឌ្ឍសមត្ថភាពវិជ្ជាជីវៈគ្រូឧទ្ទេស ការអភិវឌ្ឍហេដ្ឋារចនាសម្ព័ន្ធ ការពង្រឹងភាពជាអ្នកដឹកនាំ ការផ្សារភ្ជាប់ទ្រឹស្តីទៅនឹងការអនុវត្តកម្មវិធីសិក្សាគរុកោសល្យ និងការធានាគុណភាព។

ក្នុងឱកាសនោះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានបំពាក់គ្រឿងឥស្សរិយយសការងារជូនបុគ្គលិកអប់រំវិទ្យាស្ថានចំនួន ២០រូប និងបំពាក់មេដាយកិត្តិយសជូនគ្រូឧទ្ទេសឆ្នើមចំនួន ៥រូប របស់វិទ្យាស្ថានគរុកោសល្យបាត់ដំបង និងបានផ្តល់អនុសាសន៍ សូមឱ្យបន្តខិតខំប្រឹងប្រែងបញ្ចេញអស់ពីសមត្ថភាពក្នុងការផ្តល់ចំណេះដឹង ជំនាញ និងបទពិសោធន៍ដល់សិស្សានុសិស្ស បន្តធ្វើការស្រាវជ្រាវ និងអភិវឌ្ឍវិជ្ជាជីវៈជាប្រចាំ ពិសេសបំណិនបច្ចេកវិទ្យា និងភាសាបរទេស ដើម្បីអភិវឌ្ឍចំណេះដឹង ជំនាញ និងឥរិយាបថក្នុងការបង្រៀនប្រកបដោយគុណភាព ដើម្បីឆ្លើយតបនឹង ស្តង់ដាវិជ្ជាជីវៈគ្រូបង្រៀន ក៏ដូចជាគោលនយោបាយស្តីពីគ្រូបង្រៀន ដោយគូសបញ្ជាក់ថា ក្នុងបរិបទនៃការរីកចម្រើនយ៉ាងឆាប់រហ័សនៃបច្ចេកវិទ្យាឌីជីថល ពិសេសបច្ចេកវិទ្យាបញ្ញាសប្បនិម្មិត (AI) បច្ចេកវិទ្យាអប់រំ (EdTech) និងបរិបទពិភពលោកហ៊ុព័ទ្ធដោយប្រព័ន្ធពហុប៉ូលសេដ្ឋកិច្ច ការធ្វើទំនើបកម្ម និងបរិវិត្តកម្មក្នុងវិស័យអប់រំជារបៀបវារៈអាទិភាពដែលត្រូវគិតគូរជាប្រព័ន្ធ និងគ្រប់ជ្រុងជ្រោយដែលទាមទារចាំបាច់នូវការចូលរួមពីគ្រប់ភាគីពាក់ព័ន្ធទាំងអស់៕

ដោយ៖ ពេជ្រ សំអឿន (ប្រភព៖ ក្រសួងអប់រំ យុវជន និងកីឡា)