AKP កំពង់ធំ ថ្ងៃទី៣០ ខែមករា ឆ្នាំ២០២៥-- ឯកឧត្តមទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានណែនាំដល់អាជ្ញាធរមូលដ្ឋានត្រូវតាមដាន និងសង្គ្រោះស្រូវប្រាំងរបស់ប្រជាកសិករដែលខ្វះខាតទឹកឱ្យអស់លទ្ធភាព ក្នុងឱកាសអញ្ជើញចុះពិនិត្យផលប៉ះពាល់ដំណាំស្រូវរបស់កសិករដែលខ្វះទឹកស្រោចស្រព និងខូចខាតជាង៣០០ហិកតាស្ថិតក្នុងឃុំសំព្រោជ ស្រុកស្ទោង ខេត្តកំពង់ធំ កាលពីរសៀលថ្ងៃទី២៩ ខែមករា ឆ្នាំ២០២៥។

ឯកឧត្តមទេសរដ្ឋមន្ត្រី គន់ គីម បានមានប្រសាសន៍ថា អាជ្ញាធរគ្រប់មូលដ្ឋានត្រូវធ្វើការតាមដាន និងបូមទឹកស្រោចស្រពសង្គ្រោះស្រែស្រូវរបស់ប្រជាកសិករឱ្យបានទាន់ពេលវេលានៅពេលដែលមានប្រភពទឹកស្រោចស្រពគ្រប់គ្រាន់ ដើម្បីសង្គ្រោះ និងបង្កើនទិន្នផលស្រូវកសិករថែមទៀតហើយមិនត្រូវឱ្យស្រែកសិករណាម្នាក់រងការខូចខាតដែលមានប្រភពទឹក ហើយអាជ្ញាធរពុំបានដឹង ឬមិនបានជួយបូមទឹកសង្គ្រោះនោះឡើយ។

ទន្ទឹមនឹងនេះ ឯកឧត្តមទេសរដ្ឋមន្ត្រី គន់ គីម បានសម្ដែងការសោកស្ដាយយ៉ាងខ្លាំងជាមួយប្រជាកសិករ៤ភូមិ នៅក្នុងឃុំសំព្រោជ ដែលមានស្រែសរុបជាង៣០០ហិកតា ដែលកំពុងខ្វះខាតទឹកស្រោចស្រពហើយពុំមានប្រភពទឹកក្នុងការបូមសង្គ្រោះឱ្យបានទាន់ពេលវេលាដែល ប្រឈមនឹងការខូចខាត ឬស្វិតស្រពោនពុំទទួលបានផល ដែលធ្វើឱ្យប៉ះពាល់ដល់សេដ្ឋកិច្ច និងជីវភាពពួកគាត់យ៉ាងខ្លាំង។

ទន្ទឹមនឹងនេះ ឯកឧត្តមបានណែនាំដល់អាជ្ញាធរភូមិ/ឃុំ/ស្រុក ត្រូវបង្កើតគណៈកម្មការចម្រុះក្នុងការគ្រប់គ្រងអាងទឹកនិងធ្វើការណែនាំដល់ម្ចាស់អាងស្តុកទឹកទាំងអស់ ត្រូវទុកអាងសម្រាប់ស្តុកទឹក និងបញ្ឈប់ការធ្វើស្រូវប្រាំងនៅក្នុងអាងដែលជាហេតុនាំឱ្យខ្វះខាតទឹកក្នុងការដាក់ស្រោចស្រែស្រូវយ៉ាងច្រើនថែមទៀត និងបានសន្យាថានឹងផ្ដល់ពូជដល់កសិករទាំង៤ភូមិ សម្រាប់ព្រោះស្ដារឡើងវិញនៅពេលដែលមានប្រភពទឹកស្រោចស្រពគ្រប់គ្រាន់ដើម្បីជួយទ្រទ្រង់សេដ្ឋកិច្ចប្រជាកសិករបានឡើងវិញ។

សូមបញ្ជាក់ថា ប្រជាកសិករទាំង៤ភូមិនោះគឺភូមិពៃ ចំបក់ខ្ពស់ ដូនល្អ និងភូមិអូររំចេក សរុបផ្ទៃដីស្រែចំនួន៣៤០ហិកតា ដែលទើបមានអាយុកាល៦០ថ្ងៃដែលសរុបចំនួន២២៣គ្រួសារ៕

ដោយ ស៊ុម វណ្ណា