AKP ភ្នំពេញ ថ្ងៃទី២៩ ខែមករា ឆ្នាំ២០២៥ -- ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និង កីឡា ក្នុងកិច្ចប្រជុំស្តីពីការពិនិត្យសម្រេចលើសេចក្តីព្រាង «ព្រះរាជក្រឹត្យស្តីពីលក្ខន្តិកៈដោយឡែកនៃអង្គគ្រូបង្រៀន» នៅវិទ្យាស្ថានជាតិអប់រំ នាថ្ងៃទី២៩ ខែមករា ឆ្នាំ២០២៥ បានរំលឹកឡើងវិញពីគោលបំណង  និងភាពចាំបាច់ នៃការកំណត់ឱ្យបានអំពីមុខតំណែងរបស់មន្ត្រីផ្អែកលើកិច្ចព្រមព្រៀងការងារ និងចំនួនមន្ត្រីសម្រាប់មុខតំណែងនីមួយៗ ដែលជាតម្រូវការការងារក្នុងរចនាសម្ព័ន្ធរដ្ឋបាល ប្រតិបត្តិការការងារ និងការបំពេញបេសកកម្ម និងមុខងាររបស់ខ្លួនប្រកបដោយប្រសិទ្ធភាព  និងប្រសិទ្ធផល។

ឯកឧត្តមបណ្ឌិតសភាចារ្យ ឧបនាយករដ្ឋមន្ត្រីបានលើកឡើងថា ក្នុងន័យនេះ ក្រុមការងារបាន និងកំពុងបន្តពិនិត្យពិភាក្សាលម្អិតបន្ថែមទៀតលើរបាយការណ៍សង្ខេបអំពីវឌ្ឍនភាពនៃការរៀបចំសេចក្តីព្រាងព្រះរាជក្រឹត្យស្តីពីលក្ខន្តិកៈដោយឡែក នៃអង្គគ្រូបង្រៀន ដែលបានព្រាងដោយក្រុមការងារបច្ចេកទេស ដើម្បីប្រមូលធាតុចូលក្នុងគោលដៅកែលម្អ មុនឈានដល់ការធ្វើសេចក្តីសម្រេចអនុម័ត។ ព្រះរាជក្រឹត្យនេះមានគោលបំណងរៀបចំលក្ខន្តិកៈដោយឡែកនៃអង្គគ្រូបង្រៀន ដើម្បីប្រមូលផ្តុំ និងគ្រប់គ្រងមន្ត្រីរាជការស៊ីវិលដែលទទួលការអប់រំ ការបណ្តុះបណ្តាល មានបទពិសោធន៍ការងារ និងចំណេះដឹងបំពេញការងារក្នុងវិស័យអប់រំ។ មុខតំណែងក្នុងអង្គគ្រូបង្រៀន រួមមាន មុខតំណែងវិជ្ជាជីវៈ និងមុខតំណែងគ្រប់គ្រង ដែលតម្រូវឱ្យមានការពិពណ៌នាមុខតំណែងដោយបញ្ជាក់អំពីឧបនិស្ស័យ និងគុណវុឌ្ឍិសម្រាប់មុខតំណែងនីមួយៗឱ្យបានច្បាស់លាស់ ដែលទាមទារនូវជំនាញ ឯកទេស ដែលកំណត់បានតាមរយៈកម្រិតសញ្ញាបត្រ ឬវិញ្ញាបនបត្រដោយការបញ្ជាក់ទទួលស្គាល់ពីក្រសួងអប់រំ យុវជន និងកីឡា។ មុខតំណែងវិជ្ជាជីវៈនៃអង្គគ្រូបង្រៀន ត្រូវទទួលការអភិវឌ្ឍវិជ្ជាជីវៈជាប្រចាំ ផ្អែកតាមតម្រូវការនៃមុខតំណែងនីមួយៗ និងផែនការអភិវឌ្ឍសមត្ថភាពរបស់ក្រសួង ស្ថាប័ន រដ្ឋបាលថ្នាក់ក្រោមជាតិ និងស្របតាមគន្លងអាជីពគ្រូបង្រៀន។

ដើម្បីបង្កើនប្រសិទ្ធភាពការងារឆ្លើយតបនឹងចក្ខុវិស័យរបស់រាជរដ្ឋាភិបាល ឯកឧត្តមបណ្ឌិតសភាចារ្យ ហង់ជួន ណារ៉ុន បានផ្តល់អនុសាសន៍ជូនក្រុមការងារឱ្យបន្តពិនិត្យ និងប្រមូលផ្តុំឯកសារពាក់ព័ន្ធដើម្បីរៀបចំជាគោលនយោបាយគាំទ្រដោយត្រូវកំណត់ឱ្យច្បាស់ពីបច្ចេកទេសក្របខណ្ឌ ដែលឆ្លុះបញ្ចាំងនូវការអនុវត្តជាក់ស្តែង ហើយក៏ជាឱកាសមួយក្នុងការរៀបចំដាក់បញ្ចូលគោលការណ៍ចាំបាច់ជាច្រើនទៅក្នុងឯកសារបទដ្ឋានគតិយុត្តផងដែរ។ ជាមួយនេះក៏ត្រូវរៀបចំក្រុមការងារត្រួតពិនិត្យអក្ខរាវិរុទ្ធ និងបញ្ជាក់ខ្លឹមសារឱ្យបានត្រឹមត្រូវ ព្រោះថាការកំណត់មុខតំណែងវិជ្ជាជីវៈ បច្ចេកទេសអប់រំ លិខិតបទដ្ឋានគតិយុត្តពាក់ព័ន្ធ និងការរៀបចំគោលការណ៍ច្បាស់លាស់ ជាផ្នែកមួយដ៏សំខាន់ក្នុងការពង្រឹងអភិបាលកិច្ច និងគុណភាពអប់រំនៅតាមគ្រឹះស្ថានសិក្សាអប់រំចំណេះទូទៅសាធារណៈ ឆ្លើយតបការអនុវត្តកម្មវិធីកំណែទម្រង់វិស័យអប់រំ៕

ដោយ៖ ចាន់ សុភឿន (ប្រភព៖ ក្រសួងអប់រំ)