AKP កំពង់ចាម ថ្ងៃទី២៣ ខែមករា ឆ្នាំ២០២៥ -- ឯកឧត្តម អ៊ុន ចាន់ដា អភិបាលខេត្តកំពង់ចាម បានណែនាំដល់គណៈគ្រប់គ្រងសាលាទាំងអស់នៅទូទាំងកំពង់ចាម ត្រូវតែយកចិត្តទុកដាក់ខ្ពស់លើបញ្ហាសុខភាពរបស់សិស្សានុសិស្សនៅតាមសាលារបស់ខ្លួនជាចម្បង រួមមានតាមរយៈកម្មវិធីអាហារូបត្ថម្ភដល់កុមារ ការត្រួតពិនិត្យគុណភាពចំណីអាហារនៅតាមសាលារៀន ដោយចុះត្រួតពិនិត្យឱ្យបានជាប់ជាប្រចាំដល់ការលក់ដូរចំណីអាហាររបស់ក្រុមអាជីវករលក់តាមសាលាដែលនាំឱ្យមានផលប៉ះពាល់សុខភាពសិស្សានុសិស្ស ដែលបានហាមឃាត់ នៅក្នុងសាលារៀន ក៏ដូចនៅជុំវិញបរិវេណសាលា សំដៅចូលរួមទប់ស្កាត់ និងបង្ការជំងឺផ្សេងៗ លើកកម្ពស់សុខុមាលភាពដល់យុវជនជាសិស្ស-សិស្សានុសិស្សតូចៗនៅតាមសាលា ព្រោះពួកគេជាជាទំពាំងស្នងឫស្សី និងជាកម្លាំងសសរទ្រូងសម្រាប់ប្រទេសជាតិនៅអនាគត។

ឯកឧត្តមអភិបាលខេត្តលើកឡើងដូច្នេះក្នុងពិធីបើកសន្និបាតបូកសរុបការងារមន្ទីរអប់រំ យុវជន និងកីឡាខេត្ត ឆ្នាំសិក្សា២០២៣-២០២៤ និងលើកទិសដៅឆ្នាំសិក្សា២០២៤-២០២៥ របស់មន្ទីរអប់រំ យុវជន និងកីឡាខេត្ត នាព្រឹកថ្ងៃទី ២៣ ខែមករា ឆ្នាំ២០២៥ នៅសាលប្រជុំមន្ទីរអប់រំ យុវជន និងកីឡាខេត្ត។

ឯកឧត្តម អ៊ុន ចាន់ដា បានបញ្ជាក់ថា កត្តាសុខភាពសំខាន់ណាស់ចំពោះមនុស្សយើង។ កាលណាយើងមានសុខភាពល្អហើយយើងអាចធ្វើអ្វីបានគ្រប់ក្នុងការអភិវឌ្ឍខ្លួនឯង សេដ្ឋកិច្ចគ្រួសារ និងសង្គមជាតិ។ រីឯក្មួយជាសិស្សានុសិស្សដែលកំពុងសិក្សាបញ្ហាសុខភាពជាកត្តាចម្បងបំផុត ដែលត្រូវយកចិតទុកដាក់ ដើម្បីឱ្យពួកគេបានសម្រេចគោលដៅសិក្សារៀនសូត្ររបស់ខ្លួនទទួលបាននូវចំណេះដឹងល្អ សម្រាប់ខ្លួនឯង គ្រួសារ និងសង្គមជាតិ ព្រោះក្មួយៗជាទំពាំងស្នងឬស្សីរបស់ប្រទេសជាតិនា ថ្ងៃអនាគតខាងមុខនេះ។

ទន្ទឹមនឹងនេះ ឯកឧត្តមក៏បានធ្វើការណែនាំដល់រដ្ឋបាលខេត្ត មន្ទីរអប់រំ យុវជន និងកីឡាខេត្ត ត្រូវយកចិត្តទុកដាក់វត្តមានសិស្សានុសិស្សក្នុងម៉ោងសិក្សា។ គណៈគ្រប់គ្រងសាលា លោកគ្រូ អ្នកគ្រូបន្ទុកថ្នាក់ ត្រូវមានទំនាក់ទំនង និងមាតាអាណាព្យាបាលសិស្ស ដើម្បីគ្រប់គ្រង កំណត់មុខសញ្ញាសិស្សានុសិស្សគេចវេះម៉ោងសិក្សាទៅប្រមូលផ្តុំ ប្រើប្រាស់អំពើអបាយមុខផ្សេងៗដូចជាការជក់បារីអេឡិចត្រូនិក ហ្គេមនៅតាមតូបកាហ្វេនៅតាមម៉ាតជាដើម ត្រូវបង្កើនការអប់រំផ្សព្វផ្សាយអំពីផលប៉ះពាល់នៃគ្រឿងញៀន ការចូលរួមការអនុវត្តគោលនយោបាយ “ភូមិ-ឃុំ-សង្កាត់មានសុវត្ថិភាព»  និងផ្សព្វផ្សាយច្បាប់ចរាចរណ៍ផ្លូវគោកដល់សិស្សានុសិស្ស អាណាព្យាបាលត្រូវគោរពច្បាប់ចរាចរណ៍ទាំងអស់គ្នា ត្រូវពាក់មួកសុវត្ថិភាព កុំបើកបរលឿនក្នុងទីក្រុង ទីប្រជុំជន ត្រូវគោរពស្លាកសញ្ញាចរាចរណ៍ ជិះប្រកាន់ស្តាំ និងគោរពសិទ្ធអាទិភាពក្នុងពេលបើកបរ។ល។ ដើម្បីចៀសផុតពីគ្រោះថ្នាក់នាំភាពសុខសាន្តក្នុងជីវិតរបស់យើង៕

ដោយ ឆាយ ម៉ុត