ទីភ្នាក់ងារសារព័ត៌មានកម្ពុជា

បទយកការណ៍៖ ៧ មករា គឺជាថ្ងៃនៃការចងចាំនូវមហាវីរភាព ដឹងគុណការតស៊ូរបស់យុវជនជំនាន់មុន បន្សល់ទុកមរតក សម្រាប់ជីវិតប្រជាជនខ្មែរ

ចែករំលែក ៖

AKP ភ្នំពេញ ថ្ងៃទី០៧ ខែមករា ឆ្នាំ២០២៥--ប្រជាជនកម្ពុជាចាំមិនភ្លេចឡើយ ថ្ងៃ៧មករា គឺជាថ្ងៃមហាជ័យជម្នះជាប្រវត្តិសាសស្រ្តរបស់ប្រជាជនកម្ពុជា ដែលបានផ្ដួលរំលំរបបប្រល័យពូជសាសន៍ ប៉ុល ពត សង្រ្គោះជាតិ និងអាយុជីវិតប្រជាជនពីរណ្តៅជ្រោះមរណៈបានទាន់ពេលវេលា។ មហាជ័យជម្នះ ៧មករានេះបានបើកឡើងនូវទំព័រសករាជថ្មីរបស់កម្ពុជា គឺឯករាជ្យ សន្តិភាព សេរីភាព ប្រជាធិបតេយ្យ និងវឌ្ឍនភាពសង្គម។

ជ័យជម្នះ ៧មករា បានដណ្តើមមកវិញនូវសិទ្ធិសេរីភាពគ្រប់យ៉ាងដែលត្រូវបាត់បង់ទាំងស្រុងក្នុងរបបប្រល័យពូជសាសន៍ ប៉ុល ពត ហើយផ្តើមចេញពីមហាជ័យជម្នះនេះ ប្រជាជនកម្ពុជារួបរួមគ្នាប្រមូលកម្លាំងមហាសាមគ្គីជាតិក្រោមការដឹកនាំរបស់គណបក្សប្រជាជនកម្ពុជា ឆ្លងកាត់ការលំបាក និងឧបសគ្គជាច្រើនឥតគណនា សម្រេចបានជោគជ័យក្នុងការស្ដារ កសាង និងការពារមាតុភូមិ ការស្វែងរកសន្តិភាព និងការផ្សះផ្សាជាតិ ធ្វើឱ្យប្រទេសជាតិបានរួចផុតពីស្ថានភាពដែលវិនាសខ្ទេចខ្ទី និងសង្គ្រាមរ៉ាំរ៉ៃ ឈានដល់ដំណាក់កាលអភិវឌ្ឍន៍លើគ្រប់វិស័យក្រោមម្លប់នៃសុខសន្តិភាព។

ការប្រារព្ធខួបនៃទិវាជ័យជម្នះ៧មករាជាប្រវត្តិសាស្ត្រជារៀងរាល់ឆ្នាំ ក្នុងស្មារតីចងចាំជានិច្ចនូវមហាឧក្រិដ្ឋកម្ម ដែលរបបប្រល័យពូជសាសន៍ ប៉ុល ពត បានប្រព្រឹត្តមកលើមាតុភូមិ និងប្រជាជនកម្ពុជា និងចងចាំជានិច្ចនូវគុណូបការៈដ៏ថ្លៃថ្លាបំផុតរបស់កម្មាភិបាល វីរយុទ្ធជន យុទ្ធនារីសាមគ្គីសង្រ្គោះជាតិកម្ពុជា និងវីរកងទ័ពស្ម័គ្រចិត្តវៀតណាម ដែលបានប្រយុទ្ធនិងធ្វើពលិកម្មយ៉ាងអង់អាចលើសមរភូមិ ដើម្បីវាយរំលំរបបប្រល័យពូជសាសន៍ និងទប់ស្កាត់មិនឱ្យរបបដ៏យង់ឃ្នង់នេះអាចវិលត្រឡប់មកវិញបាន។

សម្រាប់មេរៀនបទពិសោធន៍ប្រវត្តិសាស្រ្តដ៏ជូរចត់បានបង្ហាញឱ្យយើងទាំងអស់គ្នាឃើញថា ដោយសាររដ្ឋប្រហារ ថ្ងៃ ១៨ មីនា ឆ្នាំ ១៩៧០ របស់ពួក លន់ នល់ តាមខ្សែញាក់របស់បរទេសបានបំផ្លាញសន្តិភាពនៅកម្ពុជា ធ្វើឱ្យប្រទេសជាតិត្រូវធ្លាក់ក្នុងភ្លើងសង្គ្រាមយ៉ាងសន្ធោរសន្ធៅបំផុត ដែលបានសម្លាប់ប្រជាជនកម្ពុជាអស់ជិត ១លាននាក់ និងបានបំផ្លាញរចនាសម្ព័ន្ធជាតិឱ្យវិនាសខ្ទេចខ្ទី។ បន្ទាប់ពីរបបសាធារណរដ្ឋខ្មែររបស់ពួក លន់ នល់ ដួលរំលំនាថ្ងៃ ១៧ ខែ មេសា ឆ្នាំ១៩៧៥ ប្រជាជនកម្ពុជាសង្ឃឹមថា នឹងបានរស់នៅក្នុង ឯករាជ្យ សន្តិភាព សេរីភាព វិញហើយ ប៉ុន្តែក្តីសង្ឃឹមនេះត្រូវរលាយសូន្យតែមួយប៉ព្រិចភ្នែក អាស្រ័យដោយពួកប៉ុល ពតដែលក្បត់នឹងឆន្ទៈ និងផលប្រយោជន៍របស់ប្រជាជន បានប្លន់យកសមិទ្ធផលនៃការតស៊ូរបស់ប្រជាជន ហើយអនុវត្តនយោបាយប្រល័យពូជសាសន៍យ៉ាងឃោរឃៅបំផុត ដែលពុំធ្លាប់មានក្នុងប្រវត្តិសាស្ត្ររបស់កម្ពុជាក៏ដូចប្រវត្តិសាស្ត្ររបស់មនុស្សជាតិ។ ក្រោមរបបកម្ពុជាប្រជាធិបតេយ្យរបស់ពួក ប៉ុល ពត កម្ពុជាត្រូវបានប្រែក្លាយជាគុកឥតជញ្ជាំង និងជាវាលពិឃាតដែលក្រាលជោកជាំដោយឈាម និងទឹកភ្នែករបស់ប្រជាជន។ ក្នុងរយៈពេលតែ ៣ឆ្នាំ ៨ខែ ២០ថ្ងៃ ប្រជាជនជាង៣លាននាក់ ត្រូវសម្លាប់យ៉ាងអយុត្តិធម៌បំផុត រីឯអ្នកនៅរស់ក៏រង់ចាំតែដល់វេនត្រូវគេយកទៅសម្លាប់តែប៉ុណ្ណោះ។

តាមរយៈបណ្ដាញទំនាក់ទំនងសង្គមផ្លូវការ នាព្រឹកថ្ងៃទី០៧ ខែមករានេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអបអរសាទរ ខួបទី ៤៦ នៃទិវាជ័យជម្នះ ៧ មករា ថ្ងៃកំណើតទី២ របស់យើងទាំងអស់គ្នា។ សូមចងចាំនូវវីរភាពដ៏អង់អាចក្លាហាន តស៊ូ និងលះបង់គ្រប់បែបយ៉ាងរបស់យុទ្ធជនដែលបានពលី និងខិតខំយ៉ាងលំបាកបំផុត ព្រមទាំងឆ្លងកាត់គ្រប់ឧបសគ្គ ដើម្បីរំដោះប្រទេសពីរណ្តៅមរណ:នៃរបបដ៏ខ្មៅងងឹត ៣ឆ្នាំ ៨ខែ ២០ថ្ងៃ។

ទន្ទឹមនេះ សម្ដេចធិបតី ហ៊ុន ម៉ាណែត បានសង្កត់ធ្ងន់ថា៖ «៧ មករា គឺជាថ្ងៃនៃការចងចាំនូវមហាវីរភាព ដឹងគុណការតស៊ូរបស់យុវជនជំនាន់មុន បន្សល់ទុកមរតកនៃជីវិតប្រជាជនខ្មែរ ហើយជាមូលដ្ឋានគ្រឹះសម្រាប់កម្ពុជា បច្ចុប្បន្ន ជាពិសេសបានឱ្យគេស្គាល់កម្ពុជា មិនត្រឹមតែជាវាលពិឃាត មកស្គាល់កម្ពុជា ជា កម្ពុជាដែលពោរពេញដោយសន្តិភាព និងការអភិវឌ្ឍលើគ្រប់វិស័យ ជាពិសេសជាទីមនោរម្យសម្រាប់មនុស្សផងគ្នា»។

ក្នុងឱកាសនៃពិធីអបអរសាទរខួបលើកទី៤៦ នៃទិវាជ័យជម្នះ ៧ មករា (១៩៧៩-២០២៥) នាព្រឹកថ្ងៃអង្គារ ទី០៧ ខែមករា ឆ្នាំ២០២៥ នៅបរិវេណខាងមុខសាលមហាស្រពកោះពេជ្រ រាជធានីភ្នំពេញ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជាបានមានប្រសាសន៍ថា៖ «ពិតមែនរយៈពេល ៤៦ឆ្នាំ បានកន្លងផុតទៅ បន្ទាប់ពីការផ្តួលរំលំរបបប្រល័យពូជសាសន៍ ប៉ុន្តែស្មារតីជ័យជម្នះ ៧មករា នៅតែមានពន្លឺចែងចាំងជានិច្ចក្នុងដួងចិត្តរបស់យើង និងកំពុងបន្តបំភ្លឺផ្លូវយើង ដើម្បីកសាងអនាគតកម្ពុជាដ៏រុងរឿង។ ស្មារតី៧មករា បានឆ្លុះបញ្ចាំងអំពីកម្លាំងមហាសាមគ្គីរបស់ជាតិយើង អំពីការប្ដេជ្ញាចិត្តយ៉ាងមោះមុតឥតរាថយចំពោះឧបសគ្គគ្រប់យ៉ាង ដើម្បីភាពគង់វង្សស្ថិតស្ថេរ និងរីកចម្រើនរបស់ជាតិ មាតុភូមិ ព្រមជាមួយនេះ ស្មារតី៧មករា ផ្ដល់ឱ្យយើងនូវក្តីសង្ឃឹមជឿជាក់ជានិច្ចចំពោះជ័យជម្នះ។ ៧មករា មានសត្រូវតែមួយគត់ គឺរបបប្រល័យពូជសាសន៍ ឥឡូវនេះរបបដ៏យង់ឃ្នងនេះត្រូវរលាយបាត់ហើយ ដូច្នេះជនណាដែលនៅតែប្រឆាំងនឹង ៧មករា គឺជាអ្នកដែលចង់ឱ្យរបបប្រល័យពូជសាសន៍ និងសង្គ្រាមកើតឡើងវិញនៅកម្ពុជា»។

ចំណែកឯ ថ្នាក់ដឹកនាំក្រសួង ស្ថាប័នថ្នាក់ជាតិ និងក្រោមជាតិក៏បានដឹកនាំមន្ត្រី ក្រោមឱវាទ អបអរសាទរ ខួបទី ៤៦ នៃទិវាជ័យជម្នះ ៧ មករា។

ក្នុងពិធីអបអរសាទរខួបអនុស្សាវរីយ៍ជ័យជម្នះ៧មករា នៅរង្វង់មូលវិមានឯករាជ្យ ខេត្តកំពង់ស្ពឺ នាព្រឹកថ្ងៃទី០៧ ខែមករា ឆ្នាំ២០២៥ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ បានរម្លឹកអំពីគុណបំណាច់នៃថ្ងៃ៧មករា ឆ្នាំ១៩៧៩ ខណៈថ្ងៃនេះត្រូវបានប្រជាពលរដ្ឋខ្មែរទូទាំងប្រទេសចងចាំមិនអាចបំភ្លេចបាន ហើយថែមទាំងប្រសិទ្ធិនាមថា ជាថ្ងៃកំណើតទី២របស់ពួកគាត់ដែលបានរួចផុតពីរបបដ៏ខ្មៅងងឹតរបស់ខ្មែរក្រហម។ ឯកឧត្តមឧបនាយករដ្ឋមន្រ្ដីបានលើកឡើងបន្ថែមថា ៧មករា កើតចេញពីការងើបឡើងតស៊ូរបស់យុទ្ធជន ដែលមិនអាចទ្រាំឃើញប្រជាជនរងទុក្ខវេទនា ក្នុងសោកនាដកម្មអស់រយៈពេល៣ឆ្នាំ ៨ខែ និង២០ថ្ងៃ។ បើគ្មានការចាកចេញទៅស្វែងរកការសង្រ្គោះជាតិពីសំណាក់សម្តេចតេជោ នៅថ្ងៃទី២០ ខែមិថុនា ឆ្នាំ១៩៧៧ និងការប្រមូលផ្តុំនៃកម្លាំងពីទិសនានា ក៏គ្មានរណសិរ្សសាមគ្គីសង្រ្គោះជាតិកម្ពុជាដែរ។

ជាមួយគ្នានោះ ឯកឧត្ដម ឧបនាយករដ្ឋមន្រ្តីនិងជាប្រធានក្រុមការងារចុះមូលដ្ឋានខេត្តកំពង់ស្ពឺ បានគូសបញ្ជាក់ឱ្យដឹងថា៖ «នេះជាសច្ចធម៌ប្រវត្តិសាស្រ្តមួយដែលមិនអាចប្រកែកបាន។ក្នុងនាមយើងខ្ញុំជាយុវជនជំនាន់ក្រោយចងចាំជានិច្ចគុណូបការៈដ៏ធំធេងនៃថ្ងៃ ៧មករា ដែលជាចំណុចផ្តើមនៃដំណើរស្វែងរកសន្តិភាព និងការអភិវឌ្ឍជាបន្តបន្ទាប់ រហូតមកដល់យើងមានអ្វីៗដូចសព្វថ្ងៃនេះ។ហើយថ្ងៃ ៧មករា នឹងឋិតនៅក្នុងបេះដូងរបស់យើងជារៀងរហូតតទៅ»។

កំពុងអង្គុយត្រៀមរង់ចាំទទួលបដិសណ្ឋារស្វាគមន៍ សម្ដេចធិបតី ហ៊ុន ម៉ាណែត និង សម្ដេចតេជោ ហ៊ុន សែន អញ្ជើញជាអធិបតី ក្នុងពិធីអបអរសាទរខួបលើកទី៤៦ នៃទិវាជ័យជម្នះ៧មករា នៅបរិវេណខាងមុខសាលមហាស្រពកោះពេជ្រ រាជធានីភ្នំពេញ ឯកឧត្តម ឧត្តមសេនីយ៍ទោ មឿង វ៉ាន់នឿន នាយសេនាធិការរងកងទ័ពជើងទឹក បានឱ្យដឹងថា ៧មករា ជាពេលវេលាដែលប្រជាជនកម្ពុជាមានសិទ្ធិសេរីភាពគ្រប់គ្រាន់ ចេញផុតពីរបបមួយរស់ក្នុងគុកឥតជញ្ជាំង ដែលប្រើមនុស្សឱ្យធ្វើការគ្មានត្រាប្រណីស្ទើររស់ស្ទើរស្លាប់ ផ្ដល់អាហារហូបចុកមិនគ្រប់គ្រាន់។

ឆ្លងកាត់របបអាវខ្មៅខ្មែរក្រហមក្នុងវ័យ១៩ឆ្នាំ ឯកឧត្តម ឧត្តមសេនីយ៍ទោ មឿង វ៉ាន់នឿន បានឱ្យដឹងបន្ថែមថា លោកបានហែលកាត់របបវាលពិឃាតឆ្អែតឆ្អន់ហើយ។ ដោយបច្ចុប្បន្នមានអាយុ៦៤ឆ្នាំ ឯកឧត្ដម វ៉ាន់នឿន បានមានប្រសាសន៍ថា ឥឡូវប្រទេសជាតិបានសុខសន្តិភាព មានការអភិវឌ្ឍ អគារខ្ពស់ទាប ផ្លូវគមនាគមន៍ស្អាតស្រួលធ្វើដំណើរពីរាជធានីទៅកាន់ខេត្តក្រុងនានាហើយ។ ដូច្នេះប្រជាជនកម្ពុជាត្រូវឱ្យតម្លៃខ្ពស់ចំពោះសន្តិភាព។

នឹកឃើញស្រណោះឆ្អែតចិត្តនឹកភាពរងទុក្ខវេទនាសម័យសង្ត្រាម ឯកឧត្តម ឧត្តមសេនីយ៍ទោ មឿង វ៉ាន់នឿន បានអំពាវនាវថា៖ «អ៊ីចឹងយើងទាំងអស់គ្នាគួរថែរក្សាសន្តិភាពឱ្យបានយូរអង្វែង ដើម្បីធ្វើឱ្យប្រទេសយើងជឿនលឿនដូចគេ កាលណាមានសន្តិភាព ប្រទេសយើងកាន់តែរីកចម្រើន ធ្វើម៉េចកុំឱ្យមានសង្រ្គាម»។

សូមជម្រាបជូនថា ដើម្បីចូលរួមអបអរសាទរខួបអនុស្សាវរីយ៍លើកទី៤៦ឆ្នាំនៃទិវាមហាជ័យជម្នះ៧មករា សូមប្រជាជនកម្ពុជាទូទាំងប្រទេសពង្រឹងស្មារតីស្រឡាញ់សន្តិភាព និងការពារសន្តិភាព ដែលរកបានមកដោយលំបាកឱ្យគង់វង្សស្ថិតស្ថេរ ហើយមិនអនុញ្ញាតដាច់ខាតឱ្យជនណា ឬកម្លាំងណាមកបំផ្លាញសន្តិភាពបានឡើយ។ ព្រមជាមួយនេះ ត្រូវរួបរួមសាមគ្គីគ្នាជុំវិញរាជរដ្ឋាភិបាលដើម្បីសម្រេចសមិទ្ធផលថ្មីៗទៀតក្នុងការកសាង និងការពារមាតុភូមិរបស់ខ្លួន តាមរយៈការអនុវត្តនូវកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល។ សម្រាប់ការអភិវឌ្ឍប្រទេសជាតិរយៈពេលវែង យើងទាំងអស់គ្នាត្រូវខិតខំកាន់តែខ្លាំងបន្ថែមទៀត ដើម្បីឱ្យក្ដីសុបិនរបស់យើងក្លាយជាការពិត គឺកម្ពុជាជាប្រទេសដែលមានប្រាក់ចំណូលខ្ពស់នៅឆ្នាំ២០៥០៕

ដោយ៖ គង់ សិរីរ័ត្ន និង រិទ្ធី