AKP កណ្ដាល ថ្ងៃទី០៤ ខែមករា ឆ្នាំ២០២៥ -- ឯកឧត្តម គួច ចំរើន អភិបាលខេត្តកណ្ដាល នៅក្នុងកិច្ចប្រជុំគណៈអភិបាលខេត្តកណ្តាល កាលពីរសៀលថ្ងៃទី០៣ ខែមករា ឆ្នាំ២០២៥ បានជំរុញដល់អភិបាលរងខេត្តទទួលបន្ទុក ដោះស្រាយវិវាទដីធ្លី និងវិវាទផ្សេងៗតាមបណ្ដាក្រុង ស្រុកទាំង១៣ ព្រមទាំងអាជ្ញាធរក្រុង ស្រុក កម្លាំងសមត្ថកិច្ច និងមន្ទីរពាក់ព័ន្ធត្រូវ បន្តខិតខំ និងយកចិត្តទុកដាក់ខ្ពស់ក្នុងការដោះស្រាយវិវាទផ្សេងៗ ជាពិសេសបញ្ហាដីធ្លី ឱ្យបានឆាប់រហ័ស ដោយចាត់អាទិភាពដោះស្រាយទៅតាមទំហំនៃទំនាស់សំដៅដោះស្រាយបញ្ហាដែលនៅសេសសល់ឱ្យបានចប់ទាន់ពេលវេលា និងមានប្រសិទ្ធភាពខ្ពស់ជូនប្រជាពលរដ្ឋ ពីព្រោះវាជាកង្វល់របស់ប្រជាជន ក៏ដូចជាថ្នាក់ដឹកនាំ។ 

ក្នុងកិច្ចប្រជុំនេះ ឯកឧត្តមអភិបាលខេត្ត បានស្នើដល់មន្ទីរពាក់ព័ន្ធ រួមមានមន្ទីរអធិការកិច្ច មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត កម្លាំងមានសមត្ថកិច្ច និងអង្គភាពពាក់ព័ន្ធទាំងអស់ ត្រូវសហការគ្នា ក្នុងការផ្តល់មតិយោបល់ឱ្យបានគ្រប់ជ្រុងជ្រោយទៅលើសំណុំរឿងនីមួយៗ ដើម្បីដោះស្រាយបញ្ចប់ឱ្យបានត្រឹមត្រូវស្របទៅតាមច្បាប់ និងនីតិវិធីជាធរមាន ជាងនេះទៀតត្រូវយកចិត្តទុកដាក់ក្នុងការតាមដានសំណំរឿងរបស់ខ្លួនដែលកំពុងដោះស្រាយជាប់ជាប្រចាំ។ ឯកឧត្តម បានលើកទឹកចិត្តដល់អាជ្ញាធរពាក់ព័ន្ធគ្រប់លំដាប់ថ្នាក់ ត្រូវបន្តខិតខំដោះស្រាយនូវរាល់ពាក្យបណ្ដឹងរបស់ប្រជាពលរដ្ឋដែលបានបញ្ជូនមកខេត្ត ដោយត្រូវមានជាលទ្ធផលឆ្លើយតបត្រឡប់ទៅម្ចាស់បណ្ដឹងវិញដើម្បីបញ្ជាក់ឱ្យឃើញថាខេត្តកំពុងតែខិតខំដោះស្រាយជូនពួកគាត់ដោយមិនបានទុកចោលឡើយ។ 

ឯកឧត្តម សង្កត់ធ្ងន់ទៀតថា បញ្ហាសំខាន់បំផុតនោះគឺសូមក្រុមការងារពាក់ព័ន្ធ ត្រូវខិតខំជំរុញក្នុងការស្រាវជ្រាវករណីនីមួយៗឱ្យបានលម្អិតច្បាស់លាស់ដោយចុះទៅដល់ទីតាំងផ្ទាល់ និងធ្វើការសួរនាំពីគ្រប់ភាគីពាក់ព័ន្ធទាំងអស់ទៅតាមនីតិវិធី ធ្វើការវែកញែកថាតើអ្នកណាខុសអ្នកណាត្រូវ ដើម្បីធ្វើការសម្របសម្រួលបញ្ចប់វិវាទ ឬចាត់វិធានការឱ្យស្របទៅតាមច្បាប់។ ការចុះស្រាវជ្រាវនេះ បើក្នុងករណីក្រុមការងាររកឃើញថាភាគីណាមួយបានក្លែងបន្លំឯកសារផ្សេងៗនោះ រដ្ឋបាលខេត្តនិងចាត់វិធានការតាមច្បាប់ដោយមិនមានការលើកលែងឡើយ៕

ដោយ ណយ នឿន (ប្រភព៖ រដ្ឋបាលខេត្តកណ្តាល)