AKP ភ្នំពេញ ថ្ងៃទី០២ ខែមករា ឆ្នាំ២០២៥ -- អាជ្ញាធរបាននិយាយថាប្រទេសកូរ៉េខាងត្បូងបានបញ្ជាក់ពីករណីទី១៩ នៃជំងឺគ្រុនផ្តាសាយបក្សីដែលបង្កជំងឺខ្លាំង (AI) នៅឯកសិដ្ឋានចិញ្ចឹមមាន់មួយកន្លែងក្នុងតំបន់កណ្តាលប្រទេស ខេត្តជុងឈុង (Chungcheong) ភាគខាងជើង។

អាជ្ញាធរបាននិយាយថា ករណីចុងក្រោយនេះត្រូវបានគេរកឃើញនៅកសិដ្ឋានចិញ្ចឹមមាន់មួយនៅក្នុងស្រុកអ៊ុមស៊ុង (Eumseong) មានចម្ងាយប្រហែល ៩០គីឡូម៉ែត្រភាគអាគ្នេយ៍នៃទីក្រុងសេអ៊ូល។

ម្ចាស់កសិដ្ឋានបានធ្វើរបាយការណ៍ដំបូងអំពីការកើនឡើងនៃការស្លាប់ក្នុងចំណោមបសុសត្វ។ នេះបង្កើនចំនួនករណីជំងឺគ្រុនផ្តាសាយបក្សីដល់១៩ករណីសម្រាប់រដូវរងាឆ្នាំនេះ។អាជ្ញាធរ​បាន​គ្រប់គ្រង​តំបន់​នោះ ហើយ​បាន​សម្រេច​ចិត្ត​សម្លាប់សត្វ​មាន់​ប្រមាណ ៤៤.០០០ ក្បាល​ដែល​ចិញ្ចឹម​នៅ​ក្នុងកសិដ្ឋាន។

អាជ្ញាធរ​ក៏មានគម្រោងធ្វើការត្រួតពិនិត្យនៅកសិដ្ឋានចំនួន ៨ទីតាំងផ្សេងទៀតដែលជាកម្មសិទ្ធិរបស់ក្រុមហ៊ុនកសិកម្មដូចគ្នា និងកសិដ្ឋានចិញ្ចឹមសត្វចំនួន ៥៥ទីតាំងផ្សេងទៀតនៅក្នុងតំបន់ដាច់ដោយឡែករបស់កសិដ្ឋានដែលរងផលប៉ះពាល់៕

ដោយ៖ មូល មិនា (ប្រភព៖ យ៉ុនហាប់)