AKP កំពង់ធំ ថ្ងៃទី២៥ ខែតុលា ឆ្នាំ២០២៦-- លោក ផាង វី លើកទឹកចិត្តអង្គបោះឆ្នោត ត្រូវជ្រើសរើសបេក្ខជនដែលមានក្រុមសីលធម៌វិជ្ជាជីវៈខ្ពស់ និងបម្រើប្រជាពលរដ្ឋពិតប្រាកដ។ លោក ផាង វី ប្រធាននាយកដ្ឋានធារាសាស្ត្រកសិកម្ម និងជាប្រធានក្រុមការងារចុះមូលដ្ឋានឃុំទ្រា ស្រុកស្ទោង ខេត្តកំពង់ធំ បានធ្វើការជំរុញលើកទឹកចិត្តដូចនេះក្នុងឱកាសអញ្ជើញជាអធិបតីភាពក្នុងពិធីបោះឆ្នោតផ្ទៃក្នុង និងការស្ទាបស្ទង់មតិជាសម្ងាត់ដើម្បីជ្រើសរើស និងផ្ទៀងផ្ទាត់បញ្ជីឈ្មោះបេក្ខភាពឈរឈ្មោះបោះឆ្នោតក្រុមប្រឹក្សាឃុំ-សង្កាត់ របស់គណបក្សប្រជាជនកម្ពុជាក្នុងឃុំទ្រា ស្រុកស្ទោង ខេត្តកំពង់ធំ កាលពីរសៀលថ្ងៃទី២៤ ខែតុលា ឆ្នាំ២០២៦ នៅស្នាក់ការគណបក្សប្រជាជនកម្ពុជាឃុំទ្រា។

លោក ផាង វី បានសង្កត់ធ្ងន់ថា អង្គបោះឆ្នោតត្រូវតែធ្វើការពិចារណាឱ្យបានហ្មតចត់ប្រកបដោយសុភវិនិច្ឆ័យដើម្បីជ្រើសរើសកិច្ចជនដែលខ្លួនគិតថាអាចពឹងពាក់ស្នាក់អាស្រ័យនិងដឹកនាំ ដើម្បីត្រៀមយកទៅឈរឈ្មោះសម្រាប់បោះឆ្នោតប្រកួតប្រជែងធ្វើជាមេឃុំឬក្រុមប្រឹក្សាឃុំអាណត្តិទី៦ ដែលជាបេក្ខជនប្រកបដោយសីលធម៌ទូទៅល្អមានសច្ចធម៌ គុណធម៌និងព្រហ្មវិហារធម៌ ដែល "លក្ខណៈសម្បត្តិ ឬគុណសម្បត្តិដ៏ប្រពៃរបស់បេក្ខជន" ដែលស័ក្តិសម និងមានតម្លៃបំផុតសម្រាប់តំណែង មេឃុំ ជាមនុស្សដែលមានកាយវិការទាំងកាយ វាចា ចិត្ត ស្លូតបូត ថ្លៃថ្នូរ គោរពច្បាប់ទម្លាប់ សង្គម ឬអង្គភាពមានភាពលេចធ្លោមិនបង្កជម្លោះគោរពអ្នកដទៃ មានការទទួលខុសត្រូវខ្ពស់ និងរស់នៅ ធ្វើការប្រកបដោយភាពរលូនជាមួយមនុស្សជុំវិញខ្លួនហើយមានសច្ចធម៌ ស្មោះត្រង់ ភាពត្រង់ទៅត្រង់មកនិងការនិយាយតែពាក្យពិតមិនភូតភរ មិនបោកប្រាស់ ហ៊ានទទួលខុសត្រូវចំពោះកំហុសឆ្គងនិងធ្វើការងារដោយតម្លាភាពនិងមានគុណធម៌ ជាអំពើល្អឬតម្លៃផ្លូវចិត្តដែលដឹកនាំមនុស្សឱ្យប្រព្រឹត្តតែអ្វីដែលត្រឹមត្រូវ យុត្តិធម៌និងមានប្រយោជន៍ដល់សង្គម មានការយោគយល់អធ្យាស្រ័យមិនកេងប្រវ័ញ្ចលើអ្នកដទៃនិងប្រកាន់ខ្ជាប់នូវគោលការណ៍ល្អឥតខ្ចោះក្នុងការងារ ជាពិសេសមានព្រហ្មវិហារធម៌ ជាធម៌ដ៏ប្រពៃ ៤យ៉ាងរបស់អ្នកដឹកនាំឬមនុស្សល្អរួមមាន៖ ១. មេត្តា៖ ក្តីស្រឡាញ់ បំណងល្អ ចង់ឱ្យអ្នកដទៃបានសុខ។ ២. ករុណា៖ ក្តីអាណិត អាសូរ ចង់ជួយអ្នកដទៃឱ្យរួចផុតពីទុក្ខ ឬបញ្ហា។ ៣. មុទិតា៖ ក្តីអបអរសាទរ រីករាយនៅពេលឃើញអ្នកដទៃបានល្អ ឬជោគជ័យ (មិនច្រណែន) និង៤. ឧបេក្ខា៖ ភាពស្មើចិត្តការតាំងចិត្តជាកណ្តាល ប្រកបដោយយុត្តិធម៌ មិនលម្អៀង។

ជាមួយគ្នានេះដែរ លោក ផាង វី បានរំលេចអំពីសមិទ្ធផលនានាដែលបានកើតឡើង ជាមួយនឹងសំណង់ហេដ្ឋារចនាសម្ព័ន្ធច្រើនស្អេកស្កះក្រោមការចង្អុលបង្ហាញរបស់ឯកឧត្តមថោ ជេដ្ឋា ប្រធានក្រុមការងារចុះមូលដ្ឋានស្រុកស្ទោងដែលបានយកចិត្តទុកដាក់កសាងនិងបម្រើផលប្រយោជន៍ផ្ទាល់ជូនពុកម៉ែបងប្អូនប្រជាពលរដ្ឋនៅក្នុងឃុំទ្រា ជាពិសេសលើកកម្ពស់ជីវភាពឱ្យកាន់តែប្រសើរឡើងស្របតាមគោលនយោបាយយុទ្ធសាស្ត្ររបស់រាជរដ្ឋាភិបាល។

សូមបញ្ជាក់ថា ឃុំទ្រាមានសមាជិកក្រុមប្រឹក្សាឃុំសរុបចំនួន១១រូប ហើយអង្គបោះឆ្នោតដែលត្រូវបោះឆ្នោតស្ទាបស្ទង់ថ្ងៃនេះមានចំនួន ៦១១នាក់ ដែលបេក្ខជនឈរឈ្មោះមាន២៤រូបហើយអង្គបោះឆ្នោតត្រូវបោះឆ្នោតជ្រើសរើសយក១១រូប៕

ដោយ ស៊ុម វណ្ណា