AKP កំពង់ស្ពឺ ថ្ងៃទី២៤ ខែតុលា ឆ្នាំ២០២៦–សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាថ្លែងថា រាជរដ្ឋាភិបាល នៅនីតិកាលទី៧ បាន និងកំពុងបន្តជំរុញការកែទម្រង់ការពារជាតិឱ្យកាន់តែរឹងមាំបន្ថែមទៀត ដោយអភិក្រមនៅក្នុងការកែទម្រង់ គឺផ្អែកទៅលើកំណែទម្រង់ដើម្បីពង្រឹងនៅខាងក្នុង និងកិច្ចសហប្រតិបត្តិការ ដើម្បីពង្រីកមិត្តនៅខាងក្រៅ។ ការថ្លែងបញ្ជាក់របស់សម្តេចធិបតី នាយករដ្ឋមន្ត្រីយ៉ាងដូច្នេះ ក្នុងពិធីអបអរសាទរខួប ២០ឆ្នាំ នៃការបញ្ជូនកងកម្លាំងកងយោពលខេមរភូមិន្ទចូលរួមបំពេញបេសកកម្មរក្សាសន្តិភាពអង្គការសហប្រជាជាតិ និងសម្ពោធដាក់ឱ្យប្រើប្រាស់ជាផ្លូវការសមិទ្ធផលនានានៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ ស្ថិតក្នុងស្រុកភ្នំស្រួច ខេត្តកំពង់ស្ពឺ ព្រឹកថ្ងៃទី២៤ ខែតុលា ឆ្នាំ២០២៦។

សម្តេចធិបតី នាយករដ្ឋមន្ត្រីបានលើកឡើងថា ការធ្វើកំណែទម្រង់ដើម្បីពង្រឹងសមត្ថភាពកងទ័ពគឺជារឿងចាំបាច់ ការធ្វើទំនើបកម្មរចនាសម្ព័ន្ធ ការហ្វឹកហ្វឺន និងគ្រឿងបំពាក់ ការអនុវត្តកាតព្វកិច្ចយោធាដែលគ្រោងបើកវគ្គដំបូងនៅដើមខែវិច្ឆិកា ដោយយើងកំណត់យកថ្ងៃទី ៩ វិច្ឆិកា ដែលត្រូវជាថ្ងៃកំណើតកងទ័ព និងថ្ងៃបុណ្យឯករាជ្យជាតិរបស់យើង គឺជាថ្ងៃដែលចាប់ផ្តើមអនុវត្តនូវគោលការណ៍ និងការអនុវត្តច្បាប់កាតព្វកិច្ចជាប្រវត្តិសាស្ត្រ ដើម្បីចូលរួមកក្នុងការពង្រឹងកងទ័ពរបស់យើងដែលត្រូវបន្តរើសរាល់ឆ្នាំទៅតាមតម្រូវការជាក់ស្តែងរបស់កងទ័ព។ ក្នុងន័យនេះសម្តេចនាយករដ្ឋមន្ត្រីបានកោតសរសើរ និងលើកទឹកចិត្តទៅដល់យុវជនដែលក្នុងរយៈពេល ១៣ថ្ងៃមានជិត ១៥០០០នាក់បានធ្វើការដាក់ពាក្យ ហើយក្រសួងការពារជាតិនឹងធ្វើការសម្រេចនៅក្នុងតម្រូវការជាក់ស្តែងឆ្នាំនេះ និងឆ្នាំបន្តបន្ទាប់ទៀត ដើម្បីធ្វើការហ្វឹកហ្វឺន។

ចំពោះការពង្រីកមិត្តនៅខាងក្រៅ បើតាមសម្តេចនាយករដ្ឋមន្ត្រី កិច្ចការងារនេះគឺអាចចាត់ទុកថាជាការងារការទូតយោធា ដែលក្រសួងការពារជាតិជានិច្ចកាលតែងតែពង្រីក និងធ្វើកិច្ចសហប្រតិបត្តិការជាមួយ
បណ្តាប្រទេសនានា ជាពិសេសការបង្កើតនូវទំនាក់ទំនងថ្មីៗ ដូចជា MOU,TOR ការធ្វើសហប្រតិបត្តិការរួមគ្នា ការហ្វឹកហ្វឺនរួមគ្នា ទាំងក្នុងកម្ពុជា និងក្រៅប្រទេសដែលកងទ័ពយើងចូលរួម ហើយដែលថ្មីៗនេះនៅពេលដំណើរទស្សនកិច្ចរបស់សម្តេចទៅកាន់ប្រទេសតួកគីក្រសួងការពារជាតិកម្ពុជាក៏បានចុះ MOU ជាមួយប្រទេសតួកគី ដែលតាមពិតកិច្ចការងារនេះមិនមែនថ្មីទេ គឺយើងបានចាប់ផ្តើមពិភាក្សាគ្នារវាងកម្ពុជា និងតួកគីតាំងពីឆ្នាំ២០២០ តែដោយសារបញ្ហាកូវីដក៏បានផ្អាក ហើយនៅដើមឆ្នាំ២០២៥ ក៏បានចាប់ផ្តើមជជែកគ្នាជាថ្មីឡើងវិញ និងបានសម្រេចចុះអនុស្សារណៈនៃការយោគយល់គ្នា (MOU) កាលពីពេលថ្មីៗនេះ៕

ដោយ៖ ចាន់ សុភឿន