AKP ភ្នំពេញ ថ្ងៃទី២៣ ខែតុលា ឆ្នាំ២០២៦ -- ក្នុងនាមសមាគមប្រជាជាតិអាស៊ីអាគ្នេយ៍ (អាស៊ាន) ប្រទេសវៀតណាមបានបញ្ជាក់សារជាថ្មីនូវការគាំទ្ររបស់ប្លុកនេះចំពោះតួនាទីវិទ្យាសាស្ត្រប្រកបដោយឯករាជ្យ និងគោលបំណងច្បាស់លាស់របស់គណៈកម្មាធិការវិទ្យាសាស្ត្រអង្គការសហប្រជាជាតិ ស្តីពីផលប៉ះពាល់នៃវិទ្យុសកម្មអាតូមិក(UNSCEAR)។

ថ្លែងនៅក្នុងកិច្ចប្រជុំមួយក្រោមប្រធានបទ «ផលប៉ះពាល់នៃវិទ្យុសកម្មអាតូមិក» ដែលរៀបចំឡើងដោយគណៈកម្មាធិការពិសេសទទួលបន្ទុកកិច្ចការនយោបាយ (គណៈកម្មាធិការទី៤) នៃមហាសន្និបាតអង្គការសហប្រជាជាតិលើកទី៨១ (UNGA 81) នៅទីក្រុងញូវយ៉ក កាលពីពេលថ្មីៗនេះ លោក ង្វៀន ហៃលូ រដ្ឋមន្ត្រីទីប្រឹក្សា និងជាអនុប្រធានបេសកកម្មអចិន្ត្រៃយ៍វៀតណាមប្រចាំអង្គការសហប្រជាជាតិ បានសង្កត់ធ្ងន់ទៅលើភាពចាំបាច់ក្នុងការពង្រឹងសមត្ថភាពរបស់ប្រទេសកំពុងអភិវឌ្ឍន៍ និងកិច្ចសហប្រតិបត្តិការអន្តរជាតិលើបញ្ហាសុវត្ថិភាពវិទ្យុសកម្ម។

លោក លូ បានលើកឡើងពីការរួមចំណែករបស់ UNSCEAR ចាប់តាំងពីការបង្កើតឡើងក្នុងឆ្នាំ១៩៥៥ មក ក្នុងការផ្តល់នូវការវាយតម្លៃប្រកបដោយឯករាជ្យ គោលបំណងច្បាស់លាស់ និងផ្អែកលើភស្តុតាងអំពីប្រភព កម្រិត ផលប៉ះពាល់ និងហានិភ័យនៃវិទ្យុសកម្មអ៊ីយ៉ូដ។ លោកបានបញ្ជាក់ថា ការវាយតម្លៃទាំងនេះផ្តល់នូវមូលដ្ឋានវិទ្យាសាស្ត្រដ៏សំខាន់សម្រាប់ការបង្កើតក្របខ័ណ្ឌ និងស្តង់ដារអន្តរជាតិ ស្តីពីការការពារ និងសុវត្ថិភាពវិទ្យុសកម្ម រួមទាំងស្តង់ដាររបស់ទីភ្នាក់ងារថាមពលបរមាណូអន្តរជាតិ (IAEA) ដែលជួយការពារសុខភាពមនុស្ស និងបរិស្ថាន។

អាស៊ានបានអំពាវនាវឱ្យបណ្តាប្រទេសនានាបន្តផ្តល់ទិន្នន័យវិទ្យាសាស្ត្រ ពង្រឹងកិច្ចសហប្រតិបត្តិការអន្តរជាតិ និងចូលរួមយ៉ាងទូលំទូលាយក្នុងការស្ទង់មតិជាសកល រួមទាំងការស្ទង់មតិពាក់ព័ន្ធនឹងការប៉ះពាល់នឹងវិទ្យុសកម្មក្នុងវិស័យវេជ្ជសាស្ត្រ។ នៅកម្រិតតំបន់ អាស៊ានបានបញ្ជាក់សារជាថ្មីនូវការប្តេជ្ញាចិត្តក្នុងការលើកកម្ពស់កិច្ចសហប្រតិបត្តិការលើសុវត្ថិភាពនុយក្លេអ៊ែរ និងវិទ្យុសកម្ម តាមរយៈយន្តការនានា រួមទាំងបណ្តាញអាស៊ាននៃស្ថាប័ននិយតកម្មថាមពលអាតូមិក (ASEANTOM)។

អាស៊ានក៏បានសង្កត់ធ្ងន់ផងដែរទៅលើសារៈសំខាន់នៃការចែករំលែកព័ត៌មាន និងជំនាញបច្ចេកទេស ព្រមទាំងកិច្ចសហប្រតិបត្តិការជាមួយអង្គការអន្តរជាតិពាក់ព័ន្ធនានា ស្របតាមអាណត្តិរៀងៗខ្លួនរបស់អង្គការទាំងនោះ។

អាស៊ានបានសម្តែងក្តីបារម្ភចំពោះការលំបាកផ្នែកហិរញ្ញវត្ថុ និងប្រតិបត្តិការដែលកំពុងជះឥទ្ធិពលដល់ UNSCEAR ដោយសង្កត់ធ្ងន់ទៅលើតម្រូវការធនធានគ្រប់គ្រាន់ និងមានស្ថិរភាព ព្រមទាំងការគាំទ្រសមស្របដើម្បីឱ្យគណៈកម្មាធិការនេះអាចបំពេញអាណត្តិរបស់ខ្លួនប្រកបដោយប្រសិទ្ធភាព ខណៈដែលរក្សាបាននូវឯករាជ្យភាពផ្នែកវិទ្យាសាស្ត្ររបស់ខ្លួន។

នៅក្នុងសម័យប្រជុំនោះ ប្រទេសជាច្រើនបានបញ្ជាក់សារជាថ្មីនូវការគាំទ្រចំពោះតួនាទីរបស់ UNSCEAR ដោយសង្កត់ធ្ងន់ទៅលើឯករាជ្យភាពផ្នែកវិទ្យាសាស្ត្រ កិច្ចសហប្រតិបត្តិការអន្តរជាតិ និងធនធានគ្រប់គ្រាន់សម្រាប់ដំណើរការការងាររបស់ស្ថាប័ននេះ៕

ដោយ៖ យា ចិន្ដាខន្ដី (ប្រភព៖ VNA)