AKP បន្ទាយមានជ័យ ថ្ងៃទី២៣ ខែតុលាឆ្នាំ២០២៦–លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត ព្រឹកថ្ងៃសុក្រ ទី២៣ ខែតុលា ឆ្នាំ២០២៦បានអញ្ជើញជាអធិបតីក្នុងពិធីបើកយុទ្ធនាការប្រមូលកុមារចុះឈ្មោះចូលរៀន សម្រាប់ឆ្នាំសិក្សា២០២៦-២០២៧ ក្រោមប្រធានបទ «កុមារជាអ្នកបន្តវេនមិនអាចខ្វះបាន» ដែលប្រារព្ធឡើងនៅបរិវេណសាលាបឋមសិក្សាអភិវឌ្ឍន៍ ស្ថិតក្នុងក្រុងប៉ោយប៉ែត ខេត្តបន្ទាយមានជ័យ។

ពិធីនេះមានការអញ្ជើញចូលរួមពីសំណាក់លោកគ្រូ អ្នកគ្រូ មាតាបិតា អាណាព្យាបាល និងសិស្សានុសិស្ស សរុបប្រមាណ ៨០០នាក់ ក្នុងគោលបំណងជំរុញការចូលរៀនរបស់កុមារគ្រប់រូប ជាពិសេសកុមារដែលគ្រប់អាយុចូលរៀន និងកុមារដែលមិនទាន់បានចុះឈ្មោះចូលរៀន ឱ្យទទួលបានឱកាសសិក្សាអប់រំប្រកបដោយសមធម៌ និងបរិយាបន្ន។

ថ្លែងក្នុងឱកាសនោះ លោក គាត ហ៊ុល អភិបាលក្រុងប៉ោយប៉ែតបានមានប្រសាសន៍ថា យុទ្ធនាការប្រមូលកុមារចុះឈ្មោះចូលរៀននេះ មានសារៈសំខាន់ក្នុងការលើកកម្ពស់ការយល់ដឹងរបស់មាតាបិតា និងអាណាព្យាបាល អំពីតម្លៃនៃការអប់រំ និងការជំរុញឱ្យកុមារបានចូលរៀនទាន់ពេលវេលា ដើម្បីកសាងមូលដ្ឋានចំណេះដឹង ជំនាញ និងសមត្ថភាពសម្រាប់អនាគត។

ក្រោមប្រធានបទ «កុមារជាអ្នកបន្តវេនមិនអាចខ្វះបាន» យុទ្ធនាការនេះបានរំលេចពីតួនាទីដ៏សំខាន់របស់កុមារ ដែលជាទំពាំងស្នងឫស្សី និងជាធនធានមនុស្សដ៏មានតម្លៃសម្រាប់ការអភិវឌ្ឍសង្គមជាតិនាពេលអនាគត។ ការផ្តល់ឱកាសអប់រំដល់កុមារគ្រប់រូប គឺជាការវិនិយោគដ៏មានសារៈសំខាន់ក្នុងការកសាងធនធានមនុស្សប្រកបដោយគុណភាព។

 ជាមួយគ្នានេះ ក្នុងឱកាសនៃពិធីបើកយុទ្ធនាការខាងលើ ដើម្បីឆ្លើយតបទៅនឹងសំណូមពររបស់លោកគ្រូ អ្នកគ្រូ និងជួយសម្រួលដល់ការធ្វើដំណើររបស់សិស្សានុសិស្ស លោក គាត ហ៊ុល អភិបាលក្រុងប៉ោយប៉ែត ក៏បានឧបត្ថម្ភការចាក់បំពេញថ្មមិចលើផ្លូវចំនួន១ខ្សែ នៅក្នុងមូលដ្ឋាន ដើម្បីជួយកែលម្អស្ថានភាពផ្លូវ និងបង្កលក្ខណៈងាយស្រួលដល់ការធ្វើដំណើររបស់សិស្សានុសិស្ស លោកគ្រូ អ្នកគ្រូ និងប្រជាពលរដ្ឋ។

ការឧបត្ថម្ភកែលម្អផ្លូវនេះ បានបង្ហាញពីការយកចិត្តទុកដាក់របស់អាជ្ញាធរក្រុងប៉ោយប៉ែត ចំពោះតម្រូវការជាក់ស្តែងនៅមូលដ្ឋាន ជាពិសេសការលើកកម្ពស់វិស័យអប់រំ និងការអភិវឌ្ឍហេដ្ឋារចនាសម្ព័ន្ធ ដែលជាកត្តាសំខាន់ក្នុងការជួយសម្រួលដល់ជីវភាពរស់នៅ និងការសិក្សារបស់កុមារ។

តាមរយៈយុទ្ធនាការនេះ រំពឹងថានឹងជួយជំរុញឱ្យមាតាបិតា និងអាណាព្យាបាលកាន់តែយល់ដឹងអំពីសារៈសំខាន់នៃការអប់រំ និងចូលរួមនាំកូនចៅដែលគ្រប់អាយុទៅចុះឈ្មោះចូលរៀនឱ្យបានគ្រប់ៗគ្នា សំដៅរួមចំណែកកាត់បន្ថយការបោះបង់ការសិក្សា និងលើកកម្ពស់គុណភាពអប់រំនៅក្នុងក្រុងប៉ោយប៉ែតឱ្យកាន់តែប្រសើរឡើង៕

ដោយ៖ ឈុន សារ៉ាត