AKP បន្ទាយមានជ័យ ថ្ងៃទី២៣ ខែតុលា ឆ្នាំ២០២៦--អាជ្ញាធរខេត្តបន្ទាយមានជ័យ សហការជាមួយអង្គការទស្សនៈពិភពលោកអន្តរជាតិ បានបន្តយកចិត្តទុកដាក់ជួយសម្រាលការលំបាកជូនប្រជាពលរដ្ឋ ដែលរងផលប៉ះពាល់ដោយទឹកជំនន់ ដោយបានចែកស្បៀងអាហារជូនប្រជាពលរដ្ឋចំនួន ៨០គ្រួសារ មកពីភូមិសឿឃុំសឿ និងភូមិចំណោម ក្នុងឃុំចំណោម ស្រុកមង្គលបូរី ខេត្តបន្ទាយមានជ័យ ដើម្បីចូលរួមដោះស្រាយតម្រូវការចាំបាច់ក្នុងជីវភាពប្រចាំថ្ងៃ និងជួយសម្រាលបន្ទុកគ្រួសារក្នុងគ្រាលំបាក។

ពិធីជួបសំណេះសំណាល និងចែកស្បៀងអាហារនេះ បានប្រព្រឹត្តទៅកាលពីរសៀលថ្ងៃទី២២ ខែតុលា ឆ្នាំ២០២៦ នៅសាលាឃុំបន្ទាយនាង ក្រោមអធិបតីភាពលោក ឃ្លោក នួយ អភិបាលរង នៃគណៈអភិបាលខេត្តបន្ទាយមានជ័យ ដោយមានការចូលរួមពីលោក កែវ តារារស្មី អភិបាលស្រុកមង្គលបូរី មន្ទីរ-អង្គភាពពាក់ព័ន្ធ ក្រុមការងារអង្គការទស្សនៈពិភពលោកអន្តរជាតិ និងអាជ្ញាធរមូលដ្ឋាន។

ក្នុងឱកាសនោះ លោក ឃ្លោក នួយ បានពាំនាំនូវការសួរសុខទុក្ខ និងការយកចិត្តទុកដាក់ពីសំណាក់ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ ជូនចំពោះប្រជាពលរដ្ឋដែលរងផលប៉ះពាល់ដោយទឹកជំនន់ ព្រមទាំងបានសម្តែងនូវការយកចិត្តទុកដាក់ចំពោះសុខទុក្ខ និងការលំបាកដែលប្រជាពលរដ្ឋកំពុងជួបប្រទះដោយសារគ្រោះធម្មជាតិ។

 លោកអភិបាលរងខេត្តបានគូសបញ្ជាក់ថា ក្នុងស្ថានភាពដែលប្រជាពលរដ្ឋជួបប្រទះនឹងគ្រោះទឹកជំនន់ ការផ្តល់ជំនួយសង្គ្រោះ និងការគាំទ្រពីគ្រប់ភាគីពាក់ព័ន្ធ គឺមានសារៈសំខាន់ណាស់ ដើម្បីជួយសម្រាលការលំបាក និងឆ្លើយតបនឹងតម្រូវការចាំបាច់របស់គ្រួសារដែលរងផលប៉ះពាល់។ ជាពិសេស ការជួយឧបត្ថម្ភស្បៀងអាហារនាពេលនេះ គឺជាការចូលរួមចំណែកដ៏មានតម្លៃក្នុងការគាំទ្រជីវភាពប្រជាពលរដ្ឋ និងជួយឱ្យពួកគាត់មានលទ្ធភាពបន្តការរស់នៅប្រចាំថ្ងៃ ខណៈកំពុងប្រឈមនឹងផលវិបាកពីគ្រោះមហន្តរាយធម្មជាតិ។

លោកបានបន្តថា ការឆ្លើយតបចំពោះគ្រោះមហន្តរាយ មិនអាចពឹងផ្អែកលើស្ថាប័នណាមួយតែមួយបានឡើយ ប៉ុន្តែត្រូវការកិច្ចសហការយ៉ាងជិតស្និទ្ធរវាងអាជ្ញាធរគ្រប់លំដាប់ថ្នាក់ អង្គការដៃគូ សប្បុរសជន និងសហគមន៍ ដើម្បីធានាថា ជំនួយសង្គ្រោះអាចទៅដល់ប្រជាពលរដ្ឋដែលមានតម្រូវការពិតប្រាកដបានទាន់ពេលវេលា និងមានប្រសិទ្ធភាព។

ជាមួយគ្នានេះ លោក ឃ្លោក នួយ ក៏បានថ្លែងអំណរគុណចំពោះអង្គការទស្សនៈពិភពលោកអន្តរជាតិ ដែលបានសហការជាមួយរដ្ឋបាលខេត្ត និងអាជ្ញាធរមូលដ្ឋាន ក្នុងការចូលរួមផ្តល់ជំនួយដល់ប្រជាពលរដ្ឋដែលកំពុងជួបការលំបាក។ លោកបានចាត់ទុកការចូលរួមនេះថា ជាការបង្ហាញពីស្មារតីសាមគ្គីភាព ការចែករំលែក និងការទទួលខុសត្រូវរួមចំពោះសុខុមាលភាពរបស់ប្រជាពលរដ្ឋ ជាពិសេសនៅពេលសហគមន៍ជួបប្រទះគ្រោះមហន្តរាយ។

សកម្មភាពមនុស្សធម៌នេះ ក៏បានឆ្លុះបញ្ចាំងពីសារៈសំខាន់នៃភាពជាដៃគូរវាងស្ថាប័នរដ្ឋ និងអង្គការមនុស្សធម៌ ក្នុងការពង្រឹងប្រព័ន្ធជួយសង្គ្រោះនៅមូលដ្ឋាន ដោយផ្តោតលើការឆ្លើយតបតាមតម្រូវការជាក់ស្តែងរបស់ប្រជាពលរដ្ឋ និងការកាត់បន្ថយផលប៉ះពាល់ដល់ជីវភាពរស់នៅរបស់គ្រួសារងាយរងគ្រោះ។

តាមរយៈការបន្តសហការគ្នានេះ អាជ្ញាធរខេត្តបន្ទាយមានជ័យ និងអង្គការដៃគូ បានបង្ហាញពីការប្តេជ្ញាចិត្តក្នុងការរួមចំណែកជួយប្រជាពលរដ្ឋឱ្យឆ្លងផុតពីការលំបាក ដោយផ្តល់អាទិភាពដល់ជំនួយមនុស្សធម៌ និងការគាំទ្រដល់សហគមន៍ដែលរងផលប៉ះពាល់ ដើម្បីឱ្យប្រជាពលរដ្ឋអាចវិលត្រឡប់ទៅរកជីវភាពរស់នៅប្រក្រតីវិញបានកាន់តែឆាប់រហ័ស៕

ដោយ ឈុន សារ៉ាត