AKP បន្ទាយមានជ័យ ថ្ងៃទី២២ ខែតុលា ឆ្នាំ២០២៦-- លោកឧត្តមសេនីយ៍ត្រី សឿម សារិទ្ធ ស្នងការនៃស្នងការដ្ឋាននគរបាលខេត្តបន្ទាយមានជ័យ បានដាក់បទបញ្ជាយ៉ាងម៉ឺងម៉ាត់ដល់កម្លាំងនគរបាលគ្រប់អង្គភាពឱ្យបន្តពង្រឹងការងារបង្ការ ទប់ស្កាត់ និងបង្ក្រាបបទល្មើសគ្រប់ប្រភេទ ពិសេសបទល្មើសព្រហ្មទណ្ឌ ក្មេងទំនើង គ្រឿងញៀន ល្បែងស៊ីសងខុសច្បាប់ និងបទល្មើសឆ្លងដែន ដើម្បីធានាសន្តិសុខ សុវត្ថិភាព និងសណ្តាប់ធ្នាប់សាធារណៈជូនប្រជាពលរដ្ឋ។

បទបញ្ជានេះត្រូវបានដាក់ចេញក្នុងកិច្ចប្រជុំបូកសរុបលទ្ធផលប្រតិបត្តិការប្រចាំខែតុលា ឆ្នាំ២០២៦ និងលើកទិសដៅផែនការយុទ្ធសាស្ត្រសម្រាប់អនុវត្តការងារនៅខែបន្ទាប់ ដែលដឹកនាំដោយលោកឧត្តមសេនីយ៍ត្រី សឿម សារិទ្ធ នាព្រឹកថ្ងៃទី២២ ខែតុលា ឆ្នាំ២០២៦ ដើម្បីពិនិត្យលទ្ធផលការងារដែលសម្រេចបាន ព្រមទាំងកំណត់វិធានការអាទិភាពសម្រាប់បង្កើនប្រសិទ្ធភាពការងាររក្សាសន្តិសុខក្នុងភូមិសាស្ត្រខេត្តបន្ទាយមានជ័យ។

ក្នុងឱកាសនោះ លោកឧត្តមសេនីយ៍ត្រី សឿម សារិទ្ធ បានជំរុញឱ្យកម្លាំងនគរបាលជំនាញ និងគ្រប់អង្គភាពចំណុះស្នងការដ្ឋាន ត្រូវបន្តយកចិត្តទុកដាក់ខ្ពស់លើការអនុវត្តតួនាទី និងភារកិច្ចរបស់ខ្លួន ប្រកបដោយស្មារតីទទួលខុសត្រូវ វិន័យ និងភាពម្ចាស់ការក្នុងការដោះស្រាយបញ្ហាសន្តិសុខនៅតាមមូលដ្ឋាន។ កម្លាំងនគរបាលត្រូវចាត់ទុកការការពារសន្តិសុខ និងសុវត្ថិភាពរបស់ប្រជាពលរដ្ឋជាភារកិច្ចចម្បង ដោយមិនត្រូវធ្វេសប្រហែសចំពោះសញ្ញាណ ឬសកម្មភាពណាមួយដែលអាចបង្កឱ្យមានបទល្មើស និងប៉ះពាល់ដល់ភាពសុខសាន្តរបស់ប្រជាពលរដ្ឋឡើយ។

លោកស្នងការបានសង្កត់ធ្ងន់លើការពង្រឹងវិធានការបង្ការ និងបង្ក្រាបបទល្មើសព្រហ្មទណ្ឌគ្រប់ប្រភេទ ដោយតម្រូវឱ្យកម្លាំងជំនាញពាក់ព័ន្ធបង្កើនការស្រាវជ្រាវ ស៊ើបអង្កេត និងចាត់វិធានការតាមផ្លូវច្បាប់ចំពោះជនប្រព្រឹត្តបទល្មើស ដើម្បីទប់ស្កាត់កុំឱ្យសកម្មភាពខុសច្បាប់បន្តកើតមាន ឬរីករាលដាលនៅក្នុងសហគមន៍។ ទន្ទឹមនឹងនេះ ត្រូវពង្រឹងការសហការរវាងអង្គភាពជំនាញ និងអាជ្ញាធរមូលដ្ឋាន ដើម្បីកំណត់មុខសញ្ញា និងតំបន់ដែលមានហានិភ័យ ព្រមទាំងចាត់វិធានការឱ្យបានទាន់ពេលវេលា និងមានប្រសិទ្ធភាព។

ជាពិសេស លោកឧត្តមសេនីយ៍ត្រី សឿម សារិទ្ធ បានជំរុញឱ្យយកចិត្តទុកដាក់បង្ក្រាបសកម្មភាពក្មេងទំនើង ដែលអាចបង្កអសន្តិសុខ និងប៉ះពាល់ដល់សណ្តាប់ធ្នាប់សាធារណៈ ព្រមទាំងបទល្មើសគ្រឿងញៀន និងល្បែងស៊ីសងខុសច្បាប់ ដែលជាកត្តាបង្កហានិភ័យដល់សង្គម និងជីវភាពរស់នៅរបស់ប្រជាពលរដ្ឋ។ ការអនុវត្តវិធានការទាំងនេះ ត្រូវធ្វើឡើងដោយម៉ឺងម៉ាត់ ស្របតាមច្បាប់ និងមានការតាមដានវាយតម្លៃជាប្រចាំ ដើម្បីធានាថាការបង្ក្រាបបទល្មើសទទួលបានលទ្ធផលជាក់ស្តែង។

ដោយឡែក ចំពោះសន្តិសុខតាមបណ្តោយខ្សែបន្ទាត់ព្រំដែន លោកស្នងការបានដាក់បទបញ្ជាឱ្យកម្លាំងនគរបាលពាក់ព័ន្ធបន្តពង្រឹងការយាមល្បាត ការត្រួតពិនិត្យ និងការផ្លាស់ប្តូរព័ត៌មានរវាងអង្គភាព ដើម្បីទប់ស្កាត់បទល្មើសឆ្លងដែន និងសកម្មភាពខុសច្បាប់នានា។ កម្លាំងត្រូវបង្កើនការប្រុងប្រយ័ត្ន និងត្រៀមលក្ខណៈឆ្លើយតបចំពោះសភាពការណ៍ដែលអាចកើតឡើង ព្រមទាំងសហការជាមួយស្ថាប័នពាក់ព័ន្ធ ដើម្បីថែរក្សាសន្តិសុខ សណ្តាប់ធ្នាប់ និងស្ថិរភាពក្នុងតំបន់ព្រំដែន។ ជាមួយគ្នានេះ លោកស្នងការក៏បានសង្កត់ធ្ងន់លើការពង្រឹងវិន័យកងកម្លាំង ការលើកកម្ពស់សមត្ថភាពវិជ្ជាជីវៈ និងការបង្កើនប្រសិទ្ធភាពក្នុងការបំពេញសេវាសន្តិសុខជូនប្រជាពលរដ្ឋ។ កម្លាំងនគរបាលគ្រប់លំដាប់ថ្នាក់ត្រូវបន្តប្រកាន់ខ្ជាប់នូវក្រមសីលធម៌វិជ្ជាជីវៈ មានអាកប្បកិរិយាសមរម្យ ចេះស្តាប់ និងឆ្លើយតបចំពោះសំណូមពររបស់ប្រជាពលរដ្ឋ ព្រមទាំងបង្កើនកិច្ចសហការជាមួយសហគមន៍ ដើម្បីទទួលបានព័ត៌មានពាក់ព័ន្ធនឹងបទល្មើស និងចូលរួមទប់ស្កាត់បញ្ហាសន្តិសុខតាំងពីដំណាក់កាលដំបូង។

ការដាក់ចេញនូវបទបញ្ជា និងទិសដៅការងារយ៉ាងម៉ឺងម៉ាត់នេះ បង្ហាញពីការប្តេជ្ញាចិត្តរបស់ថ្នាក់ដឹកនាំស្នងការដ្ឋាននគរបាលខេត្តបន្ទាយមានជ័យ ក្នុងការពង្រឹងសមត្ថភាពកងកម្លាំង និងលើកកម្ពស់ប្រសិទ្ធភាពនៃការងាររក្សាសន្តិសុខ សណ្តាប់ធ្នាប់សាធារណៈ។ ជាមួយនឹងការអនុវត្តតួនាទីប្រកបដោយការទទួលខុសត្រូវ និងកិច្ចសហការល្អជាមួយប្រជាពលរដ្ឋ ស្នងការដ្ឋាននគរបាលខេត្តរំពឹងថា នឹងរួមចំណែកបង្កើតបរិយាកាសសុវត្ថិភាព និងភាពកក់ក្តៅក្នុងការរស់នៅប្រចាំថ្ងៃរបស់ប្រជាពលរដ្ឋទូទាំងខេត្តបន្ទាយមានជ័យ៕

ដោយ ឈុន សារ៉ាត