AKP ភ្នំពេញ ថ្ងៃទី២២ ខែតុលា ឆ្នាំ២០២៦-- សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រី បានគាំទ្រយ៉ាងពេញទំហឹងចំពោះការរៀបចំឱ្យមាន ការប្រកួតកីឡាជាតិ លើកទី៥ និងការប្រកួតកីឡាប្រណាំងទូក ពានរង្វាន់ឯកឧត្តមអភិសន្តិបណ្ឌិត ស សុខា លើកទី៣ ឆ្នាំ២០២៦ ដែលនឹងប្រព្រឹត្តទៅ ចាប់ពីថ្ងៃទី៧ ដល់ថ្ងៃទី១១ ខែវិច្ឆិកា ឆ្នាំ២០២៦ នៅទន្លេវ៉ៃគោ ក្រុងស្វាយរៀង ខេត្តស្វាយរៀង។ 
សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាអ្នកតំណាងរាស្ត្រមណ្ឌលខេត្តស្វាយរៀង បានបញ្ជាក់បែបនេះខណៈសម្ដេចទទួលជួបជាមួយគណៈប្រតិភូសហព័ន្ធកីឡាទូកកានូ និងរ៉ូអ៊ីងកម្ពុជា ដឹកនាំដោយ ឯកឧត្តម សរ សិទ្ធិ រដ្ឋលេខាធិការក្រសួងមហាផ្ទៃ និងជាអនុប្រធានទី២ នៃសហព័ន្ធ តំណាងដ៏ខ្ពង់ខ្ពស់ឯកឧត្តមអភិសន្តិបណ្ឌិត ស សុខា នៅវិមាន៧មករា នៅថ្ងៃទី២២ ខែតុលា ឆ្នាំ២០២៦។ 
សម្ដេចកិត្ដិសង្គហបណ្ឌិត ម៉ែន សំអន បានបញ្ជាក់ថា វឌ្ឍនភាព និងសមិទ្ធផលនានារបស់សហព័ន្ធរយៈពេល ២៨ឆ្នាំកន្លងមកនេះ ចាប់តាំងពីឆ្នាំ១៩៩៨ ក្រោមការដឹកនាំរបស់សម្តេចក្រឡាហោម ស ខេង និងបន្តវេនដោយឯកឧត្តមអភិសន្តិបណ្ឌិតស សុខា គឺមានស្នាដៃជាច្រើន សម្រាប់កូន ក្មួយៗជំនាន់ក្រោយយកគំរូតាម។ ខ្ញុំក៏សូមគាំទ្រយ៉ាងពេញទំហឹងដែរចំពោះការរៀបចំការប្រកួតកីឡាជាតិ លើកទី៥ និងការប្រកួតកីឡាប្រណាំងទូក ពានរង្វាន់ ឯកឧត្តមអភិសន្តិបណ្ឌិត ស សុខា លើកទី៣ ឆ្នាំ២០២៦ ដែលនឹងប្រព្រឹត្តទៅចាប់ពីថ្ងៃទី៧ ដល់ថ្ងៃទី១១ ខែវិច្ឆិកា ឆ្នាំ២០២៦ នៅ ទន្លេវ៉ៃគោ ក្រុងស្វាយរៀង ខេត្តស្វាយរៀងលើកនេះ។ កម្មវិធីនេះក៏ជាការត្រៀមខ្លួនសម្រាប់ព្រឹត្តិការណ៍អន្តរជាតិ៖ សហព័ន្ធកំពុងត្រៀមខ្លួនឆ្ពោះទៅរកការប្រកួតកីឡាយុវជនអាស៊ី នៅឆ្នាំ២០៣១ ខាងមុខផងដែរ។ 
ឯកឧត្តម សរ សិទ្ធិ រដ្ឋលេខាធិការក្រសួងមហាផ្ទៃ និងជាអនុប្រធានទី២នៃសហព័ន្ធកីឡាទូកកានូ និងរ៉ូអ៊ីងកម្ពុជា បានបញ្ជាក់ថា ការៀបចំឱ្យមានកីឡាប្រណាំងទូកនៅស្វាយរៀងលើកនេះ គឺសហព័ន្ធសហការយ៉ាងជិតស្និទ្ធជាមួយរដ្ឋបាលខេត្តស្វាយរៀង ក្រសួងអប់រំ យុវជន និងកីឡា ក្រសួងទេសចរណ៍ និងក្រសួងវប្បធម៌ និងវិចិត្រសិល្បៈ ដើម្បីធានាថាការប្រកួតប្រព្រឹត្តទៅដោយរលូន មានសុវត្ថិភាពខ្ពស់ ទាំងផ្នែកសន្តិសុខ សណ្តាប់ធ្នាប់ និងការទទួលភ្ញៀវជាតិ-អន្តរជាតិ។ ទី២. សុខុមាលភាពកីឡាករ៖ គណៈកម្មការគ្រប់គ្រងផ្ទាល់ត្រូវយកចិត្តទុកដាក់ខ្ពស់លើ របបអាហារូបត្ថម្ភ សុខភាព និងលក្ខខណ្ឌស្នាក់នៅ របស់គ្រូបង្វឹក និងកីឡាករ-កីឡាការិនី ក្នុងអំឡុងពេលហ្វឹកហាត់ និងប្រកួត។

ទី៣. គម្រោងមជ្ឈមណ្ឌលកីឡាលើទឹក៖ ជំរុញការរៀបចំផែនការបច្ចេកទេស និងគម្រោងសាងសង់ មជ្ឈមណ្ឌលកីឡាលើទឹកនៅទន្លេវ៉ៃគោ ឱ្យបានរួចរាល់ដើម្បីបុកគ្រឹះនៅដើមឆ្នាំ២០២៧ តាមស្តង់ដារអន្តរជាតិ ឆ្លើយតបនឹង ព្រឹត្តិការណ៍កីឡាយុវជនអាស៊ី ២០៣១។ ទី៤. ការបណ្តុះបណ្តាលធនធានយុវជន៖ សហការជាមួយមន្ទីរអប់រំ យុវជន និងកីឡាខេត្តស្វាយរៀង ដើម្បីបង្កើតកម្មវិធីជ្រើសរើស និងបណ្តុះបណ្តាលសិស្សានុសិស្សមានទេពកោសល្យ តាមសាលារៀន ក្នុងគោលដៅបង្កើតធនធានបន្តវេនប្រកប ដោយចីរភាព៕ 

ដោយ សួស សំរិត