AKP ភ្នំពេញ ថ្ងៃទី២២ ខែតុលា ឆ្នាំ២០២៦ -- ក្រុមហ៊ូធី (Houthi) របស់ប្រទេសយេម៉ែនបាននិយាយកាលពីថ្ងៃអង្គារថា នេសាទករចំនួន ៨នាក់ត្រូវបានសម្លាប់ ខណៈដែលកងកម្លាំងអារ៉ាប៊ីសាអូឌីតបានធ្វើការវាយប្រហារតាមផ្លូវអាកាស និងដោយប្រើមីស៊ីលចំនួន ៩៣លើកនៅក្នុងខេត្តចំនួន ៨របស់ប្រទេសយេម៉ែន ក្នុងរយៈពេល ២៤ម៉ោងកន្លងមកនេះ។

លោក យ៉ាហ៍យ៉ា សារៀ (Yahya Sarea) អ្នកនាំពាក្យយោធារបស់ក្រុមហ៊ូធី បានថ្លែងនៅក្នុងសេចក្តីថ្លែងការណ៍មួយថា ការវាយប្រហារទាំងនោះបានប៉ះចំតំបន់នានាក្នុងខេត្តអាល់ ចាហ្វ ខេត្តតៃហ្ស ខេត្តសាអាដា ខេត្តម៉ារីប ខេត្តហាចចាហ៍ ខេត្តឡាច ខេត្តអាមរ៉ាន និងខេត្តអ៊ីប ដែលបណ្តាលឱ្យមានជនស៊ីវិលរងគ្រោះ។

លោក សារៀ បាននិយាយថា យន្តហោះចម្បាំងប្រភេទ F-15 និងTyphoon បានចូលរួមក្នុងការវាយប្រហារទាំងនេះ ដោយលោកអះអាងថាយន្តហោះទាំងនោះបានហោះចេញពីមូលដ្ឋានទ័ពអាកាសនៅទីក្រុងខាមីស មូសាត ក្នុងខេត្តអាសៀ ភាគនិរតី និងនៅខេត្តតៃហ្ស ក្នុងភាគខាងលិចនៃប្រទេសអារ៉ាប៊ីសាអូឌីត ព្រមទាំងពីអាកាសយានដ្ឋាន Sharurah ក្នុងខេត្តណាចរ៉ាន ភាគខាងត្បូងផងដែរ។

លោកបានបន្ថែមថា ការវាយប្រហារចុងក្រោយនេះ បានធ្វើឱ្យចំនួនសរុបនៃការវាយប្រហារតាមផ្លូវអាកាស និងដោយមីស៊ីលរបស់ប្រទេសអារ៉ាប៊ីសាអូឌីត ចាប់តាំងពីភាពតានតឹងបច្ចុប្បន្នបានចាប់ផ្តើមឡើងនោះ បានកើនដល់ ២.៧៩៣លើក។ តួលេខទាំងនេះមិនអាចត្រូវបានផ្ទៀងផ្ទាត់ដោយប្រភពឯករាជ្យណាមួយបានទេ។

ទន្ទឹមនឹងនេះដែរ ស្ថានីយទូរទស្សន៍ al-Masirah ដែលគ្រប់គ្រងដោយក្រុមហ៊ូធី បានរាយការណ៍ថា អ្នកនេសាទចំនួន ៨នាក់ត្រូវបានសម្លាប់កាលពីថ្ងៃអង្គារ នៅក្នុងការវាយប្រហារទៅលើទូកនេសាទចំនួន ២គ្រឿងនៅឯឆ្នេរសមុទ្រនៃស្រុកឌូបាប ក្នុងខេត្តតៃហ្ស ភាគនិរតី។

ដោយដកស្រង់សម្តីប្រភពក្នុងស្រុកមួយ សេចក្តីរាយការណ៍នោះបានឱ្យដឹងថា ការវាយប្រហារលើកទីមួយបានប៉ះចំក្រុមនេសាទករនៅលើទូកមួយគ្រឿង ហើយការវាយប្រហារលើកទី២ បានប៉ះចំអ្នកដែលនៅរស់រានមានជីវិតដែលកំពុងព្យាយាមរត់គេចខ្លួននៅលើទូកនេសាទមួយគ្រឿងទៀត។

មិនទាន់មានការឆ្លើយតបភ្លាមៗណាមួយពីប្រទេសអារ៉ាប៊ីសាអូឌីតចំពោះការអះអាងរបស់ក្រុមហ៊ូធីនោះទេ៕

ដោយ៖ មូល មិនា (ប្រភព៖ ភីបផលដេលី)