AKP ភ្នំពេញ ថ្ងៃទី២២ ខែតុលា ឆ្នាំ២០២៦ -- របាយការណ៍មួយដែលមានចំណងជើងថា «រួមគ្នាបង្កើតអនាគតតំបន់អាស៊ី-ប៉ាស៊ីហ្វិកឆ្នាំ២០៥០៖ ការកសាងសហគមន៍អាស៊ី-ប៉ាស៊ីហ្វិក និងអនាគតរបស់ប្រទេសចិន» ត្រូវបានចេញផ្សាយដោយវិទ្យាស្ថានសិក្សាផ្នែកហិរញ្ញវត្ថុចុងយ៉ាង នៃសាកលវិទ្យាល័យរេនមីន របស់ប្រទេសចិន ក្នុងអំឡុងពេលវេទិកាអភិវឌ្ឍន៍សកលតុងចូវ ឆ្នាំ២០២៦ នៅទីក្រុងប៉េកាំង។ របាយការណ៍នេះបានព្យាករណ៍ថាតំបន់អាស៊ី-ប៉ាស៊ីហ្វិកនឹងពង្រឹងតួនាទីរបស់ខ្លួនក្នុងនាមជាកម្លាំងចលករដ៏សំខាន់បំផុតនៃកំណើនសេដ្ឋកិច្ចសកលលោក ដោយផលិតផលក្នុងស្រុកសរុប (GDP) ជាក់ស្តែងរបស់តំបន់នេះត្រូវបានរំពឹងថានឹងកើនឡើងដល់១៤០,២៤ទ្រីលានដុល្លារអាម៉េរិកនៅត្រឹមឆ្នាំ២០៥០ ដែលកើនឡើងពីចំនួន៦១,៤ទ្រីលានដុល្លារអាម៉េរិក ដែលបង្កើតឡើងដោយប្រទេសសេដ្ឋកិច្ចសមាជិក APEC ទាំង២១ ក្នុងឆ្នាំ២០២៥។

នៅឆ្នាំ២០៥០ GDP ជាក់ស្តែងសម្រាប់មនុស្សម្នាក់ៗនៅក្នុងតំបន់នេះត្រូវបានគេរំពឹងថានឹងកើនដល់ ៤៨.០០០ដុល្លារអាម៉េរិក ដោយទទួលបានកម្លាំងជំរុញពីវឌ្ឍនភាពយ៉ាងឆាប់រហ័សនៃបញ្ញាសិប្បនិម្មិត (AI) វិស័យផលិតកម្មកម្រិតខ្ពស់ ថាមពលកកើតឡើងវិញ និងវិទ្យាសាស្ត្រជីវិត។របាយការណ៍នេះក៏បានព្យាករណ៍ផងដែរថា ពាណិជ្ជកម្មទំនិញ និងសេវាកម្មពាណិជ្ជកម្មនៅក្នុងតំបន់នឹងកើនឡើងដល់ប្រហែល ៦៧ទ្រីលានដុល្លារអាម៉េរិក ខណៈដែលពាណិជ្ជកម្មសេវាកម្មដែលផ្តល់ជូនតាមរយៈប្រព័ន្ធឌីជីថលនឹងកើនដល់ ១៧ទ្រីលានដុល្លារអាម៉េរិក ហើយការចំណាយប្រចាំឆ្នាំលើការស្រាវជ្រាវ និងអភិវឌ្ឍន៍ (R&D) នឹងកើនឡើងលើសពី៦ទ្រីលានដុល្លារអាម៉េរិក ដែលស្មើនឹង ៤,៥% នៃ GDP សរុបរបស់តំបន់។

ដោយលើកឡើងពីតួនាទីដ៏សំខាន់របស់ប្រទេសចិនក្នុងនាមជាអ្នកជំរុញសមាហរណកម្មសេដ្ឋកិច្ច និងភាពធន់នៃខ្សែច្រវាក់ផ្គត់ផ្គង់របាយការណ៍នេះបានសង្កត់ធ្ងន់ទៅលើសារៈសំខាន់នៃការប្រើប្រាស់ទីផ្សារអ្នកប្រើប្រាស់ សមត្ថភាពផលិតកម្ម និងនវានវុត្តន៍បច្ចេកវិទ្យារបស់ចិន។របាយការណ៍នេះបាជំរុញឱ្យសេដ្ឋកិច្ចនានាក្នុងតំបន់អាស៊ី-ប៉ាស៊ីហ្វិក ពង្រឹងកិច្ចសហប្រតិបត្តិការក្នុងតំបន់លើវិស័យពាណិជ្ជកម្ម ការអភិវឌ្ឍបៃតង និងអភិបាលកិច្ចឌីជីថល ព្រមទាំងពង្រឹងប្រព័ន្ធទូទាត់ឆ្លងដែន និងកិច្ចសហការលើការគ្រប់គ្រងបញ្ញាសិប្បនិម្មិត (AI) ដើម្បីធានាបាននូវកំណើនប្រកបដោយចីរភាពក្នុងរយៈពេលវែងផងដែរ៕

ដោយ៖ យា ចិន្ដាខន្ដី (ប្រភព៖ ឆាយណាដេលី)