AKP បន្ទាយមានជ័យ ថ្ងៃទី២១ ខែតុលា ឆ្នាំ២០២៦--លោក ឈឿន ក្រៃយ៉ុង អភិបាលរងខេត្តបន្ទាយមានជ័យ បានជំរុញឱ្យអាជ្ញាធរមូលដ្ឋាន មន្ទីរ អង្គភាពជំនាញ អង្គការដៃគូអភិវឌ្ឍន៍ និងវិស័យឯកជន បន្តពង្រឹងកិច្ចសហប្រតិបត្តិការ និងសម្រប សម្រួលធនធានគាំទ្រគម្រោងវិនិយោគអាទិភាពរបស់ឃុំ ដើម្បីឆ្លើយតបនឹងតម្រូវការជាក់ស្តែងរបស់ប្រជាពលរដ្ឋ និងជំរុញការអភិវឌ្ឍមូលដ្ឋានឱ្យមាន ប្រសិទ្ធភាព ចំគោលដៅ និងចីរភាព។   

ការជំរុញនេះធ្វើឡើងនាព្រឹកថ្ងៃទី២១ ខែតុលា ឆ្នាំ២០២៦ ក្នុងឱកាសដែលលោក ឈឿន ក្រៃយ៉ុង តំណាងដ៏ខ្ពង់ខ្ពស់ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានអញ្ជើញជាអធិបតីក្នុងសិក្ខាសាលាសមាហរណកម្មកម្មវិធីវិនិយោគ៣ឆ្នាំរំកិលឃុំ ឆ្នាំ២០២៧-២០២៩ នៅថ្នាក់ស្រុក ឆ្នាំ២០២៦ ដែលរៀបចំឡើងនៅសាលប្រជុំសាលាស្រុកភ្នំស្រុក ខេត្តបន្ទាយមានជ័យ។   
 សិក្ខាសាលានេះមានការអញ្ជើញចូល រួមពីលោកស្រី ចំរើន ដាណេ អភិបាល ស្រុកភ្នំស្រុក លោក លោកស្រីអភិបាលរ ងស្រុក តំណាងមន្ទីរ អង្គភាពពាក់ព័ន្ធ កងកម្លាំងប្រដាប់អាវុធទាំងបីប្រភេទ មេឃុំទាំង៦ ការិយាល័យចំណុះរដ្ឋបាលស្រុក តំណាងអង្គការដៃគូអភិវឌ្ឍន៍ និងអ្នកពាក់ព័ន្ធជាច្រើនរូបទៀត។      
ថ្លែងក្នុងឱកាសនោះ លោក ឈឿន ក្រៃយ៉ុង បានលើកឡើងថា សិក្ខាសាលាសមាហរណកម្មកម្មវិធីវិនិយោគ៣ឆ្នាំរំកិលឃុំ

ឆ្នាំ២០២៧-២០២៩ មានសារៈសំខាន់ក្នុងការបង្កើតវេទិកាឱ្យអាជ្ញាធរឃុំ និងស្ថាប័នពាក់ព័ន្ធបានជួបពិភាក្សា ផ្លាស់ប្តូរយោបល់ និងស្វែងរកការគាំទ្រលើគម្រោងអភិវឌ្ឍន៍អាទិភាព ដែលបានកំណត់ឡើងដោយផ្អែកលើតម្រូវការរបស់ប្រជាពលរដ្ឋក្នុងមូលដ្ឋាន។      

លោកបានបញ្ជាក់ថា តាមរយៈវេទិកានេះ តំណាងរដ្ឋបាលឃុំអាចជួបពិភាក្សាដោយផ្ទាល់ជាមួយតំណាងមន្ទីរ អង្គភាពជំនាញ អង្គការសង្គមស៊ីវិល និងវិស័យឯកជន ដើម្បីបង្ហាញពីគម្រោងដែលត្រូវការអាទិភាព ព្រមទាំងស្វែងរកលទ្ធភាពគាំទ្រផ្នែកបច្ចេកទេស ធនធាន និងថវិកា សំដៅឈានទៅរកការប្រមូលផ្តុំធនធាន និងការចុះកិច្ចសន្យាគាំទ្រគម្រោងតាមវិស័យនីមួយៗ។      
លោកអភិបាលរងខេត្តបានគូសបញ្ជាក់ថា ការអភិវឌ្ឍមូលដ្ឋានមិនអាចសម្រេចបានដោយអាជ្ញាធរឃុំតែមួយមុខនោះទេ ប៉ុន្តែត្រូវការការចូលរួមពីគ្រប់ភាគីពាក់ព័ ន្ធ ដោយមានការសហការគ្នាយ៉ាងជិតស្និទ្ធ និងការប្រើប្រាស់ធនធានប្រកបដោយប្រសិទ្ធភាព។ ដូច្នេះ ការពង្រឹងទំនាក់ទំនងរវាងរដ្ឋបាលឃុំ រដ្ឋបាលស្រុក មន្ទីរ អង្គភាពជំនាញ និងដៃគូអភិវឌ្ឍន៍ គឺជាកត្តាចាំបាច់ក្នុងការជំរុញឱ្យគម្រោងអាទិភាពទទួលបានការគាំទ្រ និងអាចអនុវត្តបានជាក់ស្តែង។      

លោកបានបន្តថា ការរៀបចំកម្មវិធីវិនិ យោគ៣ឆ្នាំរំកិល ត្រូវធានាឱ្យមានភាពស៊ីសង្វាក់គ្នារវាងផែនការអភិវឌ្ឍន៍ឃុំ និងផែនការអភិវឌ្ឍន៍ស្រុក ព្រមទាំងគោលនយោបាយរបស់រាជរដ្ឋាភិបាល ជាពិសេសការកាត់បន្ថយភាពក្រីក្រ ការលើកកម្ពស់ជីវភាពរស់នៅ និងការកែលម្អសេវាសាធារណៈជូនប្រជាពលរដ្ឋ។      

លោកក៏បានសង្កត់ធ្ងន់លើសារៈសំខាន់នៃការកំណត់គម្រោងអាទិភាពឱ្យបានត្រឹមត្រូវ ដោយផ្អែកលើបញ្ហាប្រឈម និងតម្រូវការពិតប្រាកដរបស់ប្រជាពល រដ្ឋ ព្រមទាំងត្រូវពិនិត្យលទ្ធភាពធនធាន ការគាំទ្រពីដៃគូ និងសមត្ថភាពអនុវត្ត ដើម្បីធានាថាគម្រោងនីមួយៗអាចផ្តល់ផលប្រយោជន៍ជាក់ស្តែងដល់សហគ មន៍។     
ជាមួយគ្នានេះ លោកស្រី ចំរើន ដាណេ អភិបាលស្រុកភ្នំស្រុក បានលើកឡើងថា សិក្ខាសាលានេះមានគោលបំណងពិភា ក្សា ពិនិត្យ និងសម្របសម្រួលគម្រោងអភិវឌ្ឍន៍អាទិភាពរបស់រដ្ឋបាលឃុំ ដើម្បីស្វែងរកការគាំទ្រពីមន្ទីរ អង្គភាពជំនាញ ស្ថាប័នពាក់ព័ន្ធ និងអង្គការដៃគូអភិវឌ្ឍ ន៍ ឱ្យស្របតាមតម្រូវការជាក់ស្តែងរបស់ប្រជាពលរដ្ឋនៅតាមមូលដ្ឋាន។     

លោកស្រីបានបញ្ជាក់ថា សិក្ខាសាលានេះក៏ជាវេទិកាដ៏សំខាន់សម្រាប់ពង្រឹងកិច្ចសហប្រតិបត្តិការ និងផ្សារភ្ជាប់ផែនការអភិវឌ្ឍន៍របស់រដ្ឋបាលឃុំទាំង៦ ក្នុងស្រុកភ្នំស្រុក ជាមួយផែនការរបស់មន្ទីរ អង្គភាពជំនាញ និងដៃគូអភិវឌ្ឍន៍ ដើម្បីជំរុញការអនុវត្តគម្រោងវិនិយោគឱ្យមានប្រសិទ្ធភាព តម្លាភាព និងឆ្លើយ តបនឹងអាទិភាពរបស់មូលដ្ឋាន។       

លោកស្រីអភិបាលស្រុកបានបន្ថែមថា តាមរយៈការពិភាក្សា និងការសម្របសម្រួលក្នុងសិក្ខាសាលានេះ រដ្ឋបាលឃុំមានឱកាសលើកឡើងពីតម្រូវការ បញ្ហាប្រឈម និងគម្រោងដែលចាំបាច់ត្រូវអនុវត្ត ដើម្បីស្វែងរកដំណោះស្រាយ និងការគាំទ្រពីស្ថាប័នពាក់ព័ន្ធ ព្រមទាំងបង្កើនលទ្ធភាពក្នុងការអនុវត្តផែនការអភិវឌ្ឍន៍ឱ្យសម្រេចបានតាមគោល ដៅ។      
សិក្ខាសាលាសមាហរណកម្មកម្មវិធីវិនិយោគ៣ឆ្នាំរំកិលឃុំ ឆ្នាំ២០២៧ -២០២៩ នេះ ត្រូវបានរំពឹងថានឹងរួមចំណែកសំខាន់ក្នុងការពង្រឹង គុណភាពនៃការរៀបចំផែនការ និងការសម្របសម្រួលធនធានសម្រាប់គម្រោងអភិវឌ្ឍន៍នៅមូលដ្ឋាន ព្រមទាំងបង្កើនភាពជាដៃគូរវាងអាជ្ញាធរ និងស្ថាប័នពាក់ព័ន្ធ ដើម្បីជំរុញការអភិវឌ្ឍសេដ្ឋកិច្ច សង្គម និងលើកកម្ពស់គុណភាពជីវិតរបស់ប្រជាពលរដ្ឋក្នុងស្រុកភ្នំស្រុក ខេត្តបន្ទាយមានជ័យ ឱ្យកាន់តែប្រសើរឡើង៕

ដោយ ៖ឈុនសារ៉ាត