AKP ភ្នំពេញ ថ្ងៃទី២១ ខែតុលា ឆ្នាំ២០២៦ -- ប្រទេសតួកគីយ៉េមានគោលបំណងក្លាយជាប្រទេសដែលមានចំណូលពីវិស័យទេសចរណ៍ខ្ពស់បំផុតលំដាប់ទី៦ នៅលើពិភពលោក ដោយមានការបែងចែកថវិកាថ្មីចំនួន២៤៤,៥លានដុល្លារអាម៉េរិក នៅក្នុងសេចក្តីព្រាងថវិការបស់រដ្ឋាភិបាលកណ្តាលសម្រាប់ឆ្នាំ២០២៧។

ទឹកប្រាក់នេះ បានកើនឡើងពីចំនួន ១៨៨,៤លានដុល្លារអាម៉េរិកនៅក្នុងឆ្នាំនេះ គឺស្របតាម «កម្មវិធីរយៈពេលមធ្យម» (MTP) របស់រដ្ឋាភិបាលតួកគីយ៉េ ដែលកំណត់គោលដៅចំណូលពីវិស័យទេសចរណ៍ចំនួន ៧០ពាន់លានដុល្លារអាម៉េរិកនៅក្នុងឆ្នាំ២០២៧ ចំណូលចំនួន ៧៣,៥ពាន់លានដុល្លារអាម៉េរិកនៅក្នុងឆ្នាំ២០២៨ និង ៧៨,៥ពាន់លានដុល្លារអាម៉េរិកនៅក្នុងឆ្នាំ២០២៩។

កាលពីឆ្នាំមុន ប្រទេសតួកគីយ៉េទទួលបានលទ្ធផលល្អប្រសើរដែលជាកំណត់ត្រាមួយ ដោយរកចំណូលពីវិស័យទេសចរណ៍បាន ៦៥,២ពាន់លានដុល្លារអាម៉េរិក។ ទោះជាយ៉ាងណាក៏ដោយ គោលដៅចំណូលដំបូងសម្រាប់ឆ្នាំ២០២៦ ដែលធ្លាប់កំណត់ទុក ៦៨ពាន់លានដុល្លារអាម៉េរិក ត្រូវបានកែសម្រួលចុះមកនៅត្រឹម ៦៥ពាន់លានដុល្លារអាម៉េរិកវិញ ដោយសារជម្លោះដែលកំពុងបន្តកើតមានរវាងរុស្ស៊ី និងអ៊ុយក្រែន ក៏ដូចជានៅក្នុងតំបន់មជ្ឈិមបូព៌ា។

យោងតាមទិន្នន័យ ស្តីពីចំណូលទេសចរណ៍សកលលោកពីអង្គការទេសចរណ៍ពិភពលោក ប្រទេសនេះត្រូវបានគេរំពឹងថានឹងកែលម្អចំណាត់ថ្នាក់របស់ខ្លួននៅក្នុងតារាងចំណូលទេសចរណ៍សកលលោក ដោយរំពឹងថានឹងឡើងពីចំណាត់ថ្នាក់ទី៧ នៅក្នុងឆ្នាំនេះ ទៅកាន់ចំណាត់ថ្នាក់ទី៦នៅក្នុងឆ្នាំ២០២៧ ស្របពេលដែលចំណូលមានការកើនឡើង។

ប្រសិនបើប្រទេសនេះសម្រេចបានគោលដៅចំណូល ៧០ពាន់លានដុល្លារអាម៉េរិកនៅឆ្នាំក្រោយ និងអាចឡើងចំណាត់ថ្នាក់ខ្ពស់ជាងមុននៅក្នុងតារាងចំណូលសកលលោក នោះការព្យាករណ៍បន្តបន្ទាប់ទៀតបង្ហាញថាប្រទេសតួកគីយ៉េអាចនឹងឈានដល់ចំណាត់ថ្នាក់ទី៥ នៅត្រឹមឆ្នាំ២០២៨។

ចាប់តាំងពីឆ្នាំ២០១៧ មក ប្រទេសតួកគីយ៉េបានកើនឡើងពីចំណាត់ថ្នាក់ទី១៥ ដល់ចំណាត់ថ្នាក់ទី៧ ក្នុងចំណោមប្រទេសដែលមានចំណូលពីវិស័យទេសចរណ៍ខ្ពស់បំផុតនៅលើពិភពលោក ហើយបានឡើងពីចំណាត់ថ្នាក់ទី៨ ដល់ចំណាត់ថ្នាក់ទី៤ ក្នុងចំនួនភ្ញៀវទេសចរសរុបដែលបានទៅទស្សនា។

ប្រទេសនេះត្រូវបានគេរំពឹងថានឹងរក្សាបាននូវចំណាត់ថ្នាក់ទី៤ ក្នុងចំនួនភ្ញៀវទេសចរសរុបនៅចន្លោះឆ្នាំ២០២៧ ដល់ឆ្នាំ២០២៩។ ទន្ទឹមនឹងនេះ តួកគីយ៉េក៏មានគោលដៅលើកកម្ពស់ចំណាត់ថ្នាក់របស់ខ្លួននៅក្នុង«សន្ទស្សន៍អភិវឌ្ឍន៍ការធ្វើដំណើរ និងទេសចរណ៍» (TTDI) របស់វេទិកាសេដ្ឋកិច្ចពិភពលោក (WEF) ដោយរំពឹងថានឹងឡើងដល់ចំណាត់ថ្នាក់ទី៣៥(កើនឡើងពីចំណាត់ថ្នាក់ទី៣៦ ដែលបានប៉ាន់ប្រមាណកាលពីឆ្នាំមុន)។

រដ្ឋាភិបាលតួកគីយ៉េដាក់គោលដៅឈានដល់ចំណាត់ថ្នាក់ទី៣៤នៅក្នុងឆ្នាំ២០២៨ និងចំណាត់ថ្នាក់ទី៣៣ នៅក្នុងឆ្នាំ២០២៩ ដែលនឹងជួយពង្រឹងបន្ថែមទៀតនូវឋានៈរបស់ប្រទេសនេះ ក្នុងនាមជាគោលដៅទេសចរណ៍លំដាប់កំពូលមួយនៅលើពិភពលោក៕

ដោយ៖ យា ចិន្ដាខន្ដី (ប្រភព៖ AA-AKP)