AKPកំពង់ធំថ្ងៃទី២១ខែតុលា ឆ្នាំ ២០២៦--នៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤ កាលពីរសៀលថ្ងៃទី២០ខែតុលាឆ្នាំ២០២៦បានរៀបចំពិធីបំពាក់ឋានន្តរសក្ដិជូននាយ ទាហានចំនួន១៦នាក់និងបើកកិច្ចប្រជុំបូកសរុបលទ្ធផលការងារយោធាសន្តិ សុខប្រចាំខែតុលា ឆ្នាំ២០២៦និងដាក់ចេញនៅទិសដៅសម្រាប់អនុវត្តបន្តក្រោមអធិបតីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង​កំពង់ធំនិងដោយមានការចូលរួមពីថ្នាក់ដឹកនាំនៃបញ្ជាការដ្ឋានតំបន់ប្រតិបត្តិការសឹករងកំពង់ធំ មេប ញ្ជាការគ្រប់បណ្ដាកងឯកភាពនិងស្ថាប័នចំណុះជាច្រើនរូប។

លោកអនុសេនីយ៍ឯក ចាន់ សុធីនាយរងកាល័យទី៣នៃបញ្ជាការដ្ឋានតំបន់ប្រតិបត្តិការសឹករងកំពង់ធំបានឡើងធ្វើរបាយការណ៍ស្តីពីលទ្ធផលសកម្មភាពការងារដែលសម្រេចបានក្នុងខែតុលាកន្លងទៅនិងអាននូវទិសដៅសំខាន់ៗមួយចំនួនសម្រាប់អនុវត្តបន្តក្នុងខែវិច្ឆិកាឆ្នាំ ២០២៦។

បន្ទាប់មកលោកវរសេនីយ៍ទោ ស៊ុន សាម៉ុន នាយការិយាទី១នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឡើងអានសេចក្ដីសម្រេចរបស់អគ្គមេបញ្ជាការនៃកងយោធពលខេមរភូមិន្ទស្ដីអំពីការបំពាក់ឋានន្តរសក្ដិជូនយោធិនចំនួន ១​៦​នាក់ក្នុងនោះមាន ថ្នាក់អនុសេនីយ៍ឯក១នាក់ ថ្នាក់អនុសេនីយ៍ទោ៧នាក់ថ្នាក់អនុសេនីយ៍ត្រី៥នាក់និងថ្នាក់នាយចំណង់៣នាក់ហើយឧត្តមសេនីយ៍ទោ សោម ស៊ុន​មេបញ្ជាការ​តំបន់​ប្រតិបត្តិការ​សឹក​រងបានផ្ដល់កិត្តិយសឡើងបំពាក់ឋានន្តរសក្កិជូនយោធិនដែលទើបទទួលបានការដំឡើងថ្មីទាំងចំនួន១៦​នាក់។

ឧត្តមសេនីយ៍ទោ សោម ស៊ុន បានសូមគោរពថ្លែងអំណរគុណដ៍ជ្រាលជ្រៅជាទីបំផុតដល់ថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ដែលបានផ្ដល់ទំនុកចិត្តក្នុងការដំឡើងឋានន្តរសក្ដិជូនដល់នាយទាហាននៃបញ្ជាការដ្ឋានតំបន់ប្រតិបត្តិការសឹករកកំពង់ធំ ដែលបានខិតខំបំពេញភារកិច្ចក្នុងរយៈពេលកន្លងទៅទទួលបានលទ្ធផលល្អប្រសើរ ព្រមទាំងបានគោរពយ៉ាងមុឺងម៉ាត់តាមបទបញ្ជានិងការអ នុវត្តយ៉ាងត្រឹមត្រូវតាមលក្ខន្តិកៈ នៃកងយោធពលខេមរភូមិន្ទ។

ឧត្តមសេនីយ៍ទោ សោម ស៊ុន បានវាយ​តម្លៃ​ខ្ពស់​ចំពោះ​នាយ​ទាហាន​ នាយ​ទាហាន​រង​ និង​ពលទាហាន​ ទាំង​អស់​ចំណុះ​ឱ្យបញ្ជាការ​ដ្ឋាន​តំបន់​ប្រតិបត្តិការ​សឹក​រង​កំពង់​ធំ​ ដែលបាន​ខឹតខំ​បំពេញ​ភារកិច្ច​ ដែល​ថ្នាក់​លើ​បាន​ប្រគល់​ជូន​ទទួលបាន​លទ្ធផល​ល្អ​ប្រសើរ​និង​បាន​ប្រគល់ភារកិច្ចសំខាន់ៗមួយចំនួនជូនដល់មេបញ្ជាការគ្រប់បណ្ដាកងឯកភាពដែលត្រូវអនុវត្តបន្តមានជាអាទិ៍÷ទី១.ត្រៀមកម្លាំងនិងមធ្យោបាយគ្រឿងបំពាក់គ្រប់គ្រាន់ ដើម្បីចល័តអន្តរាគមន៍តាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់ឱ្យទាន់ពេលវេលានិងមានប្រសិទ្ធភាព។ទី២.ត្រូវបន្តសកម្មភាពការពារ ទប់ស្កាត់ និងបង្ក្រាបបទល្មើសធនធានធម្មជាតិ ក្នុងភូមិសាស្ត្រខេត្តឱ្យទទួលបានជោគជ័យដោយមិនឱ្យមានការកើតឡើងជាថ្មីនូវការកាប់ទន្ទ្រានព្រៃឈើយកដីរបស់រដ្ឋធ្វើជាកម្មសិទ្ធិនិងការប្រើប្រាស់ឧបករណ៍នេសាទនិងការធ្វើនេសាទខុសច្បាប់បានទៀតជាដាច់ខាតដើម្បីថែរក្សាធនធានធម្មជាតិរបស់យើងសម្រាប់សង្គមជាតិនិងសម្រាប់កូនចៅយើងនៅជំនាន់ក្រោយៗទៀតនិងទី៣.រៀបចំពិធីជូនដំណើរប្រជាពលរដ្ឋដែលស្ម័គ្រចិត្តចូលរួមបំពេញកាតព្វកិច្ចយោធាទៅកាន់សាលាហ្វឹកហ្វឺនកងទ័ពឱ្យមានភាពអធិកអធម្មនិងជាកិត្តិយស ដល់ពួកគាត់ ដែលបានលះបង់ដើម្បីបុព្វហេតុជាតិនិងមាតុភូមិកម្ពុជាយើង៕

ដោយ៖ ស៊ុម វណ្ណា