AKP ភ្នំពេញ ថ្ងៃទី២០ ខែតុលា ឆ្នាំ២០២៦–ក្រសួងព័ត៌មានកម្ពុជា និងរដ្ឋបាលជាតិវិទ្យុ និងទូរទស្សន៍ចិន (NRTA) បានបើកកិច្ចប្រជុំប្រចាំឆ្នាំលើកទី៧ ស្តីពីកិច្ចសហប្រតិបត្តិការវិទ្យុ និងទូរទស្សន៍ ប្រកបដោយជោគជ័យ កាលពីថ្ងៃទី១៩ ខែតុលា ឆ្នាំ២០២៦ នាទីក្រុងប៉ីហៃ តំបន់ស្វយ័តជនជាតិជាំងក្វាងស៊ី នៃ សាធារណរដ្ឋប្រជាមានិតចិន។ ជំនួបយុទ្ធសាស្ត្រនេះ បានប្រព្រឹត្តទៅស្របពេលជាមួយនឹង «ពិធីបើកសប្តាហ៍ប្រព័ន្ធផ្សព្វផ្សាយអាស៊ាន-ចិន លើកទី៨»ក្នុងគោលបំណងរឹតចំណងមិត្តភាពដែកថែប និងពង្រីកកិច្ចសហប្រតិបត្តិការវិស័យសោតទស្សន៍សំដៅ ឆ្លើយតបទៅនឹងការវិវវត្ត នៃបច្ចេកវិទ្យាយុគសម័យថ្មី។
កិច្ចប្រជុំទ្វេភាគីនេះ សហដឹកនាំដោយ ឯកឧត្តម អ៊ុក សំរេចរដ្ឋលេខាធិការក្រសួងព័ត៌មាន និងជាតំណាងដ៏ខ្ពង់ខ្ពស់របស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មានកម្ពុជា និង ឯកឧត្តម លីវ ជាំងកួ (LIU Jianguo) អនុរដ្ឋមន្ត្រីនៃរដ្ឋបាលជាតិវិទ្យុ និងទូរទស្សន៍ចិន (NRTA) ដោយមានការចូលរួមពីប្រតិភូជាន់ខ្ពស់ និងតំណាងស្ថាប័នប្រព័ន្ធផ្សព្វផ្សាយនៃប្រទេសទាំងពីរផងដែរ។

នៅ ក្នុងអង្គប្រជុំនោះ ឯកឧត្តម ប្រាក់ ថាវអមិដា អនុរដ្ឋលេខាធិការក្រសួងព័ត៌មាន បានជម្រាបជូនពីវឌ្ឍនភាពការងារលេចធ្លោដែលសម្រេចបានក្នុងឆ្នាំ២០២៥ និង ៩ខែដើមឆ្នាំ២០២៦ ក្រោមស្មារតីនៃកិច្ចប្រជុំលើកទី៦ និងក្របខ័ណ្ឌកិច្ចសហប្រតិបត្តិការ «ត្បូងពេជ្រ» រួមមានដូច ខាង ក្រោម៖

• កិច្ចព្រមព្រៀង និងដៃគូស្ថាប័ន៖ ការចុះអនុស្សរណៈនៃការយោគយល់គ្នា (MoU) និងកិច្ចព្រមព្រៀងសហប្រតិបត្តិការជាមួយស្ថាប័នព័ត៌មានធំៗរបស់ចិន ដូចជា CMG, People's Daily, ទីភ្នាក់ងារ Xinhua, Guangxi Daily Media Group, កិច្ចព្រមព្រៀងសេវាកម្មព័ត៌មានរវាង TVK និង CCTV News Content Co., Ltd. និងកិច្ចព្រមព្រៀងរវាងអគ្គនាយកដ្ឋានព័ត៌មាន និងសោតទស្សន៍ (INB) ជាមួយមជ្ឈមណ្ឌលផ្សព្វផ្សាយអន្តរជាតិក្វាងស៊ី។

• ការសហការផលិតមាតិកា៖ វិទ្យុជាតិកម្ពុជា (RNK) និងភាគីចិនបានបន្តដំណើរការ «វិទ្យុមិត្តភាពកម្ពុជា-ចិន» និងបញ្ចប់ការចាក់ផ្សាយរឿងភាគនិទាន «ទីក្រុងមីននីង»។ រីឯទូរទស្សន៍ជាតិកម្ពុជា (TVK) បានសហការផលិតភាពយន្តឯកសារ «ការអភិរក្សឆ្លងព្រំដែន» កម្មវិធីកសិកម្ម AI ភាព យន្ត ឯកសារ «សម្រស់កម្ពុជា» (ទទួលបានពានរង្វាន់ផ្លូវសូត្រ) និងត្រៀមរៀបចំ «កិច្ចសន្ទនាយុវជនកម្ពុជា-ចិន ស្តីពីកសិកម្មទំនើប» នាចុងខែតុលា ឆ្នាំ២០២៦ នេះ។
• ការបណ្តុះបណ្តាលធនធានមនុស្ស៖ មន្ត្រីក្រសួងព័ត៌មានកម្ពុជាជាង ៧០រូប ទទួលបាន ការ បណ្តុះបណ្តាល និងធ្វើទស្សនកិច្ចសិក្សានៅប្រទេសចិន ហើយ មន្ត្រីបច្ចេកទេស RNK ១រូប កំពុងបំពេញកម្មសិក្សាការងាររយៈពេល ២ឆ្នាំ នៅអគ្គស្ថានីយ CMG ទីក្រុងប៉េកាំង។ 
ក្នុងកិច្ចប្រជុំនេះដែរ ភាគីកម្ពុជាលើកឡើង នូវសំណូមពរ និងទិសដៅអាទិភាពចំនួន ៦ចំណុច ដើម្បីជំរុញកិច្ចសហប្រតិបត្តិការឱ្យកាន់តែមានប្រសិទ្ធភាព៖
១. ការតាមដាន និងអនុវត្តផែនការសកម្មភាព៖ ពន្លឿនការអនុវត្ត «កិច្ចព្រមព្រៀងផែនការសកម្មភាពអនុវត្ត (២០២៥-២០២៦)» ដែលត្រូវបានចុះហត្ថលេខាក្នុងអំឡុងដំណើរទស្សនកិច្ចផ្លូវរដ្ឋរបស់ ឯកឧត្តមប្រធានាធិបតី ស៊ី ជីនពីង កាលពីខែមេសា ឆ្នាំ២០២៥។

២. ការគាំទ្រប្រព័ន្ធឌីជីថល (DTT/OTT)៖ ស្នើ NRTA ផ្តល់ជំនួយបច្ចេកទេស សម្ភារ និងការប្រឹក្សាយុទ្ធសាស្ត្រសម្រាប់ការបិទប្រព័ន្ធផ្សាយអាណាឡូក និងការអភិវឌ្ឍ App MoINFO របស់ ក្រសួងព័ត៌មាន។
៣. ការអភិវឌ្ឍសមត្ថភាព AI៖ ស្នើគាំទ្រគម្រោង “Cambodia AI Media Application Training” ឆ្នាំ២០២៧ ដើម្បីបណ្តុះបណ្តាលអ្នកសារព័ត៌មាន និងផលិតករកម្ពុជាលើការប្រើប្រាស់ AI ក្នុងការផលិត ការកាត់ត និងការចែកចាយមាតិកា។
៤. ការប្រយុទ្ធប្រឆាំងព័ត៌មានក្លែងក្លាយ៖ បង្កើតយន្តការទំនាក់ទំនងរហ័ស (Hotline/Focal Point) រវាងស្ថាប័នទាំងពីរ ដើម្បីផ្ទៀងផ្ទាត់ទិន្នន័យពិត និងចែករំលែកបច្ចេកវិទ្យា AI ក្នុងការទប់ស្កាត់ ព័ត៌មានក្លែងក្លាយឆ្លងដែន។

៥. ការបង្កើនការផលិតមាតិការួមគ្នា៖ រៀបចំដំណើរការឡើងវិញនូវកម្មវិធីវិទ្យុ «ពីនេះ ពីនោះពីប្រទេសចិន» ជំរុញការប្រើប្រាស់ App Mekong Look ជាភាសាខ្មែរ និងបន្តផលិតភាពយន្តឯកសាររួមគ្នាស្តីពីវប្បធម៌ កសិកម្ម និងទេសចរណ៍។
៦. ការវិនិយោគលើអ្នកសារព័ត៌មានជំនាន់ក្រោយ៖ បន្តផ្តល់ឱកាសកម្មសិក្សា និងការផ្លាស់ប្តូរបទពិសោធន៍សម្រាប់មន្ត្រី និងអ្នកសារព័ត៌មានវ័យក្មេងកម្ពុជានៅតាមស្ថាប័នព័ត៌មានធំៗរបស់ចិនអង្គរប្រជុំ បានស្នើឱ្យ ស្ថាប័នបច្ចេកទេសរបស់ភាគីទាំង២បន្តពិភាក្សាលើ ការអនុវត្តបន្ត ជាពិសេសកិច្ចសហប្រតិបត្តិការជាមួយអគ្គស្ថានីយវិទ្យុនិងទូរទស្សន៍មជ្ឈឹមចិន ស្ថានីយវិទ្យុនិងទូរទស្សន៍ខេត្តក្វាងស៊ី ខេត្តស៊ីអាន និងខេត្តយូណាន់។

កិច្ចប្រជុំប្រចាំឆ្នាំលើកទី៧ នេះ បានបញ្ចប់ទៅដោយបរិយាកាសស្និទ្ធស្នាល និងយោគយល់គ្នាខ្ពស់ ដោយភាគីទាំងពីរបានសម្តែងនូវជំនឿជឿ ជាក់យ៉ាងមុតមាំថា លទ្ធផលនៃជំនួបនេះនឹងក្លាយជា «ផែនទីបង្ហាញ ផ្លូវ» ដ៏រឹងមាំ ក្នុងការលើកកម្ពស់វិស័យព័ត៌មាន វិទ្យុ និងទូរទស្សន៍ នៃប្រទេសទាំងពីរឱ្យកាន់ តែ ប្រសើរ សំដៅរួមចំណែកយ៉ាងសកម្មក្នុងការកសាង «សហគមន៍វាសនារួមកម្ពុជា-ចិន ក្នុងយុគសម័យថ្មី» ប្រកបដោយចីរភាព៕ 

ដោយ៖ គង់ សិរីរ័ត្ន