AKP ភ្នំពេញ ថ្ងៃទី២០ ខែតុលា ឆ្នាំ២០២៦--សាខាកាកបាទក្រហមកម្ពុជាខេត្តពោធិ៍សាត់ ដឹកនាំដោយលោកជំទាវ អាំង សុជាតា ខូយរីដា នាព្រឹកថ្ងៃអង្គារ ទី២០ ខែតុលា ឆ្នាំ២០២៦ បានដឹកនាំក្រុមការងារ ចុះសួរសុខទុក្ខ និងនាំយកអំណោយមនុស្សធម៌ចែកជូនស្ត្រីមានផ្ទៃពោះត្រៀមសម្រាលចំនួន ៤នាក់ ស្ត្រីទើបសម្រាលកូនចំនួន ៣នាក់ និងអ្នកផ្ទុកមេរោគអេដស៍ចំនួន៦នាក់ នៅមណ្ឌលសុខភាពអន្សាចំបក់ ស្រុកក្រគរ ខេត្តពោធិ៍សាត់។

សកម្មភាពនេះ ធ្វើឡើងស្របតាមអនុសាសន៍ និងសារគន្លឹះដ៏ខ្ពង់ខ្ពស់របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលតែងតែយកចិត្តទុកដាក់ខ្ពស់បំផុតចំពោះសុខមាលភាពរបស់ស្ត្រីជាមាតា ទារក និងកុមារនៅទូទាំងប្រទេស។

លោក ជំទាវអាំង សុជាតា ខូយរីដាបានមានប្រសាសន៍ថា ការថែទាំសុខភាពមាតា និងទារកឱ្យបានល្អចាប់តាំងពីនៅក្នុងផ្ទៃ គឺជាជំហានដំបូងបង្អស់ ក្នុងការធានាថាកុមារដែលកើតមកមានសុខភាពល្អបរិបូរណ៍ ប្រកបដោយប្រាជ្ញាស្មារតីភ្លឺថ្លា ដើម្បីក្លាយជាទំពាំងស្នងឫស្សី និងជាធនធានមនុស្សដ៏មានតម្លៃសម្រាប់សង្គមជាតិ។

ក្រុមការងារក៏បានផ្សព្វផ្សាយនូវសារអប់រំមួយចំនួន ពិសេសគឺស្ត្រីមានផ្ទៃពោះ ត្រូវទៅពិនិត្យសុខភាពយ៉ាងតិច៤ដង ហើយចំពោះស្ត្រីដែលមានសុខភាពមិនប្រក្រតី ត្រូវទៅពិនិត្យយ៉ាងតិច៨ដង តាមការណែនាំរបស់គ្រូពេទ្យឆ្មប នៅមណ្ឌលសុខភាព ឬមន្ទីរពេទ្យបង្អែកដែលជិតបំផុត។ គួរជ្រើសរើសការសម្រាលនៅមន្ទីរពេទ្យបង្អែកខេត្ត ដែលមានឧបករណ៍ បរិក្ខារ និងបច្ចេកទេសគ្រប់គ្រាន់ ដើម្បីធានាសុវត្ថិភាពទាំងម្តាយ និងកូន។ ត្រូវបំបៅកូនដោយទឹកដោះម្តាយតែមួយមុខគត់ ក្នុង៦ខែដំបូង និងនាំកូនទៅចាក់វ៉ាក់សាំងបង្ការជំងឺផ្សេងៗឱ្យបានទៀងទាត់តាមកាលវិភាគ។ចំពោះអ្នកផ្ទុកមេរោគអេដស៍ ក្រៅពីការលេបថ្នាំពន្យារ ត្រូវបរិភោគអាហារមានជីវជាតិ និងសម្រាកឱ្យបានពី ៧ ទៅ ៨ម៉ោង ក្នុងមួយថ្ងៃ ដើម្បីពង្រឹងប្រព័ន្ធស៊ាំរាងកាយ រស់នៅប្រកបដោយអនាម័យ គឺហូបស្អាត ផឹកស្អាត និង រស់នៅស្អាត។

អំណោយដែលយកទៅចែកជូនស្ត្រីមានផ្ទៃពោះត្រៀមសម្រាលចំនួន ៤នាក់ ស្ត្រីទើបសម្រាលកូនចំនួន ៣នាក់ និងអ្នកផ្ទុកមេរោគអេដស៍ចំនួន៦នាក់ នៅមណ្ឌលសុខភាពអន្សាចំបក់នោះ រួមមាន៖
១. សម្រាប់ស្ត្រីមានផ្ទៃពោះត្រៀមសម្រាល និងស្ត្រីទើបសម្រាលកូន (សរុប ៧នាក់) ក្នុងម្នាក់ៗទទួលបាន៖ មុង ១ សារុង ២ កន្សែងពោះគោ ២ ខោអាវទារក ២ឈុតសាប៊ូក្រអូប ២ដុំ និងសាប៊ូម្សៅ ១ថង់ ម្សៅទារក ១កំប៉ុង ថវិកាឧបត្ថម្ភ ៥០,០០០ រៀល
២. សម្រាប់អ្នកផ្ទុកមេរោគអេដស៍(សរុប ៦នាក់) ក្នុងម្នាក់ៗទទួលបាន៖
អង្ករ ២៥ គីឡូក្រាម មី ១ កេស ត្រីខ ១ យួរ ឃីត ១ កញ្ចប់ (មុង ១, ភួយ ១, ក្រមា ១, សារុង ១) ថវិកាឧបត្ថម្ភ ៥០,០០០ រៀល៕
ដោយ ពេជ្រ សំអឿន(ប្រភព៖កាកបាទក្រហមកម្ពុជា)