AKP កំពង់ធំ ថ្ងៃទី២០ ខែតុលា ឆ្នាំ២០២៦--នៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤ កាលពីរសៀលថ្ងៃទី១៩ខែតុលា ឆ្នាំ២០២៦ បានបើកកិច្ចប្រជុំត្រួតពិនិត្យវឌ្ឍនភាពការងារនៃការអនុវត្តច្បាប់កាតព្វកិច្ចយោធា និងពិភាក្សាអំពីកិច្ចការប្រុងប្រៀបរៀបចំពិធីជូនដំណើរប្រជាពលរដ្ឋដែលបានស្ម័គ្រចិត្ដចូលបំពេញកាតព្វកិច្ចយោធាទៅកាន់សាលាហ្វឹកហ្វឺនកងទ័ពពេលខាងមុខ ដែលនឹងប្រព្រឹត្តិទៅក្រោមអធិបតីភាព ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង និងជាប្រធានគណៈកម្មាធិការកាតព្វកិច្ចយោធាខេត្តកំពង់ធំ ដោយមានការចូលរួមពីតំណាងរដ្ឋបាលសាលាខេត្ត លោកមេបញ្ជាការកងរាជអាវុធហត្ថខេត្តនិងថ្នាក់ដឹកនាំគណៈកម្មាធិការកាតព្វកិច្ចយោធាខេត្ត ក្រុង ស្រុក។

លោកវរសេនីយ៍ទោ ស៊ុន សាម៉ុន នាយការិយាល័យទី១ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ សមាជិកគណៈកម្មាធិការកាតព្វកិច្ចយោធាខេត្តកំពង់ធំ បានឡើងរាយការណ៍អំពីលទ្ធផលនៃការចែកពាក្យជូនប្រជាពលរដ្ឋ និងការទទួលពាក្យពីប្រជាពលរដ្ឋ ដែលបានស្ម័គ្រចិត្តដាក់ពាក្យសុំចូលបំពេញកាតព្វកិច្ចយោធា នៅឆ្នាំ២០២៦ និងបានលើកឡើងអំពីបញ្ហាមួយចំនួនពាក់ព័ន្ធជាមួយការអនុវត្តនីតិវិធីក្នុងការបំពេញសំណុំបែបបទ ដើម្បីត្រៀមអញ្ជើញប្រជាពលរដ្ឋដែលបានស្ម័គ្រចិត្តចូលរួមបំពេញកាតព្វកិច្ចយោធា ដែលនឹងត្រូវអនុវត្តន៍នៅពេលដ៏ខ្លីខាងមុខនេះ ។ 

បន្ទាប់មកសមាជិកអង្គប្រជុំ បានលើកឡើងអំពីចំណុចខ្លាំង ចំណុចខ្សោយ និងបញ្ហាប្រឈមមួយចំនួន ក្នុងនីតិវិធីនៃការអនុវត្តបច្ចេកទេស ព្រមទាំងលើកឡើងនៅបញ្ហាមួយចំនួន ដែលនឹងត្រូវរៀបចំបែបបទ អញ្ជើញប្រជាពលរដ្ឋដែលស្ម័គ្រចិត្តបំពេញកាតព្វកិច្ចយោធាមកបង្ហាញតាមពេលវេលាកំណត់។

ឧត្តមសេនីយ៍ទោ សោម ស៊ុន បានថ្លែងនូវការកោតសរសើរចំពោះគណៈកម្មាធិការកាតព្វកិច្ចយោធាគ្រប់ថ្នាក់ ដែលបានខិតខំបំពេញភារកិច្ច ប្រកបដោយស្មារតីទទួលខុសត្រូវខ្ពស់នាពេលកន្លងទៅ ពិសេសមេបញ្ជាការមូលដ្ឋានកងរាជអាវុធហត្ថនៅតាមក្រុង ស្រុកនីមួយៗដែលបានខិតខំប្រឹងប្រែងយ៉ាងសកម្មក្នុងការចែកពាក្យ និងទទួលពាក្យ ព្រមទាំងការបំពេញសំណុំបែបបទផ្សេងៗ តាមការណែនាំរបស់ថ្នាក់លើបានយ៉ាងល្អប្រសើរ។

ឧត្តមសេនីយ៍ទោ សោម ស៊ុន បានណែនាំដល់គណៈកម្មាធិការកាតព្វកិច្ចយោធានៅគ្រប់ថ្នាក់ក្នុងខេត្តកំពង់ធំ ត្រូវយកចិត្តទុកដាក់បំពេញភារកិច្ចសំខាន់ៗមួយចំនួនមានជាអាទិ៖ ទី១.បន្តអនុវត្តន៍នីតិវិធី និងសំណុំបែបបទផ្សេងៗ ក្នុងការអញ្ជើញប្រជាពលរដ្ឋដែលស្ម័គ្រចិត្ដចូលបំពេញកាតព្វកិច្ចយោធាដើម្បីមកបង្ហាញមុខតាមពរលវេលាដែលថ្នាក់លើបានកំណត់ឱ្យបានត្រឹមត្រូវ។ ទី២.គណៈកម្មាធិការកាតព្វកិច្ចយោធាថ្នាក់ខេត្ត ត្រូវរួមគ្នាដើម្បីរៀបចំពិធីជូនដំណើរប្រជាពលរដ្ឋដែលស្ម័គ្រចិត្ដ ចូលរួមបំពេញកាតព្វកិច្ចយោធា តាមការណែនាំរបស់គណៈកម្មាធិការកាតព្វកិច្ចយោធាថ្នាក់ជាតិ ឱ្យបានល្អ និងប្រកបដោយភាពអធិកអធម ដែលជាការលើកទឹកចិត្តដល់ប្រជាពលរដ្ឋបានចូលរួមអនុវត្តន៍កាតព្វកិច្ចយោធា សមស្របនិងកិត្តិយសរបស់ពួកគាត់ដែលបានលះបង់ដោយស្ម័គ្រចិត្តដើម្បីជាតិ និងប្រជាជនកម្ពុជា។ ទី៣.ត្រូវប្រុងប្រៀបនូវរាល់បណ្ដាកិច្ចការធានាផ្សេងៗ សំដៅបម្រើឱ្យការងារដឹកជញ្ជូនប្រជាពលរដ្ឋដែលបានស្ម័គ្រចិត្ដបំពេញកាតព្វកិច្ចយោធា ទៅកាន់សាលាហ្វឹកហ្វឺនឱ្យទាន់ពេលវេលាដែលថ្នាក់លើបានកំណត់ ប្រកបដោយកិត្តិយស និងសុខសុវត្ថិភាព៕

ដោយ ស៊ុម វណ្ណា