AKP ភ្នំពេញ ថ្ងៃទី១៩ ខែតុលា ឆ្នាំ២០២៦--ក្នុងគោលបំណងស្វែងយល់អំពីវប្បធម៌ការងារ ប្រព័ន្ធគ្រប់គ្រង និងស្វែងរកកាលានុវត្តភាពនៃកិច្ចសហប្រតិបត្តិការលើការគាំទ្រដល់វិស័យអប់រំ ជាពិសេសការងារលើកកម្ពស់សុខភាពសិក្សា និងការអភិវឌ្ឍធនធានមនុស្សនៅកម្ពុជា គណៈប្រតិភូក្រសួងអប់រំ យុវជន និងកីឡា បានធ្វើទស្សនកិច្ចសិក្សានៅទីស្នាក់ការកណ្តាលក្រុមហ៊ុន អាតូមី (Atomy Park) ស្ថិតក្នុងទីក្រុង Gongju សាធារណរដ្ឋកូរ៉េ ដោយគណៈប្រតិភូទទួលបានការបង្ហាញវីដេអូ ស្តីពីប្រវត្តិ ចក្ខុវិស័យ និងសកម្មភាពទំនួលខុសត្រូវសង្គមរបស់ក្រុមហ៊ុន ដែលតែងតែយកចិត្តទុកដាក់ និងចូលរួមយ៉ាងសកម្មក្នុងការងារមនុស្សធម៌ ការលើកកម្ពស់សុខុមាលភាព និងការគាំទ្រវិស័យអប់រំនៅតាមបណ្តាប្រទេសនានា ក្នុងនោះក៏មានប្រទេសកម្ពុជាផងដែរ។

លោក Han-Gill Park ប្រធានក្រុមប្រឹក្សាភិបាលក្រុមហ៊ុន អាតូមី បានទទួលស្វាគមន៍យ៉ាងកក់ក្តៅចំពោះគណៈប្រតិភូក្រសួងអប់រំ យុវជន និងកីឡាកម្ពុជា ដឹកនាំដោយលោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការ ដែលបានអញ្ជើញបំពេញទស្សនកិច្ចនៅសាធារណរដ្ឋកូរ៉េនាពេលនេះ ព្រមទាំងបានលើកឡើងអំពីទំនាក់ទំនងល្អរវាងក្រុមហ៊ុន អាតូមី និងប្រទេសកម្ពុជា និងបានចែករំលែកទស្សនវិស័យស្នូលរបស់ក្រុមហ៊ុនក្នុងការចូលរួមអភិវឌ្ឍន៍សង្គម ជាពិសេសការអប់រំ ដែលជាមូលដ្ឋានគ្រឹះដ៏រឹងមាំបំផុតសម្រាប់ការអភិវឌ្ឍអនាគតកុមារ និងសង្គមជាតិ។

ទន្ទឹមនឹងនេះ លោកប្រធានក្រុមប្រឹក្សាភិបាលក៏បានធ្វើបទបង្ហាញសង្ខេបអំពីគម្រោងសប្បុរសធម៌នានាដែលក្រុមហ៊ុនបានអនុវត្ត និងកំពុងបន្តអនុវត្តនៅកម្ពុជា រួមមាន ការឧបត្ថម្ភសម្ភារសិក្សា ការគាំទ្រការសាងសង់អគារសិក្សា និងគម្រោងនានាដែលផ្តោតលើការលើកកម្ពស់សុខភាព និងសុខុមាលភាពប្រជាជន។

ក្នុងឱកាសនេះ លោកជំទាវបណ្ឌិត គឹម សេដ្ឋានី បានថ្លែងអំណរគុណយ៉ាងជ្រាលជ្រៅចំពោះប្រធានក្រុមប្រឹក្សាភិបាល និងថ្នាក់ដឹកនាំក្រុមហ៊ុន អាតូមី ដែលបានសម្របសម្រួលការរៀបចំដំណើរទស្សនកិច្ច និងទទួលស្វាគមន៍គណៈប្រតិភូកម្ពុជាយ៉ាងកក់ក្តៅ និងបានវាយតម្លៃខ្ពស់ចំពោះទស្សនវិស័យអាជីវកម្មប្រកបដោយគុណធម៌របស់ក្រុមហ៊ុន ព្រមទាំងការចូលរួមចំណែកយ៉ាងសកម្មក្នុងការងារសង្គម និងការលើកកម្ពស់សុខុមាលភាពសហគមន៍។ ជាមួយគ្នានេះ លោកជំទាវបណ្ឌិតរដ្ឋលេខាធិការប្រចាំការ បានគូសបញ្ជាក់ពីកិច្ចខិតខំប្រឹងប្រែងរបស់ក្រសួងអប់រំ យុវជន និងកីឡា ក្នុងការកែលម្អបរិស្ថានសាលារៀន និងការថែទាំសុខភាពសិស្សានុសិស្ស ដែលជាមូលដ្ឋានគ្រឹះដ៏សំខាន់ក្នុងការលើកកម្ពស់គុណភាពអប់រំឱ្យកាន់តែប្រសើរឡើង។

លោកជំទាវបណ្ឌិតបានលើកឡើងពីគោលនយោបាយកំណែទម្រង់វិស័យអប់រំរបស់ក្រសួងអប់រំ យុវជន និងកីឡា ពិសេសការអនុវត្តក្របខណ្ឌ័អភិវឌ្ឍធនធានមនុស្សតាមគោលការណ៍ 5H ដែលសំដៅលើការអប់រំបែបបរិយាបន្ន និងគ្រប់ជ្រុងជ្រោយ ក្នុងគោលបំណងអភិវឌ្ឍន៍សិស្សានុសិស្សឱ្យមានការរីកចម្រើនទាំងផ្នែកចំណេះដឹង បំណិន ចរិយាសម្បទា និងសុខភាពមាំមួន ដើម្បីក្លាយជាធនធានមនុស្សប្រកបដោយសមត្ថភាព និងគុណភាព សម្រាប់រួមចំណែកក្នុងការអភិវឌ្ឍសង្គមជាតិ៕

ដោយ៖ ចាន់ សុភឿន (ប្រភព៖ ក្រសួងអប់រំ យុវជន និងកីឡា)