AKP បន្ទាយមានជ័យ ថ្ងៃទី១៩ ខែតុលា ឆ្នាំ២០២៦ -- ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានជំរុញឱ្យអាជ្ញាធរដែនដី អង្គភាពជំនាញ និងកងកម្លាំងមានសមត្ថកិច្ចពាក់ព័ន្ធ រួមគ្នាពង្រឹងការរៀបចំសណ្ដាប់ធ្នាប់សាធារណៈ ការគ្រប់គ្រងបរិស្ថាន អនាម័យ និងការកែលម្អសោភ័ណភាពក្នុងក្រុងសិរីសោភ័ណ ដើម្បីឱ្យទីក្រុងមានរបៀបរៀបរយ ស្អាត បៃតង និងមានបរិយាកាសល្អប្រសើរសម្រាប់ការរស់នៅរបស់ប្រជាពលរដ្ឋ ក៏ដូចជាការធ្វើដំណើរ និងប្រកបមុខរបររកស៊ីប្រចាំថ្ងៃ។

ការជំរុញនេះធ្វើឡើងនៅក្នុងកិច្ចប្រជុំ ស្ដីពីការបង្កើតគណៈកម្មការខេត្តដើម្បីជំរុញការរៀបចំសណ្ដាប់ធ្នាប់សាធារណៈ បរិស្ថាន អនាម័យ និងកែលម្អសោភ័ណភាពក្នុងក្រុងសិរីសោភ័ណ ដែលដឹកនាំដោយឯកឧត្តម អ៊ុំ រាត្រី នាព្រឹកថ្ងៃទី១៩ ខែតុលា ឆ្នាំ២០២៦ នេះ ដោយមានការចូលរួមពីលោក ហ៊ឹល រ៉ាយ៉ា អភិបាលរងខេត្ត លោក ស្រេង សុផល អភិបាលក្រុងសិរីសោភ័ណ ព្រមទាំងកងកម្លាំងមានសមត្ថកិច្ច មន្ត្រីជំនាញ និងអ្នកពាក់ព័ន្ធ។

ការបង្កើតគណៈកម្មការខេត្តត្រូវបានលើកឡើងជាយន្តការសំខាន់មួយ សម្រាប់ពង្រឹងការសម្របសម្រួល និងការចូលរួមពីគ្រប់ស្ថាប័នពាក់ព័ន្ធ ដើម្បីឱ្យការងាររៀបចំសណ្ដាប់ធ្នាប់សាធារណៈ ការថែរក្សាអនាម័យ និងការលើកកម្ពស់សោភ័ណភាពក្រុង ប្រព្រឹត្តទៅដោយមានការទទួលខុសត្រូវ និងមានប្រសិទ្ធភាព។ ឯកឧត្តម អ៊ុំ រាត្រី បានជំរុញឱ្យអាជ្ញាធរដែនដី និងអង្គភាពជំនាញពាក់ព័ន្ធត្រូវយកចិត្តទុកដាក់លើការរៀបចំសណ្ដាប់ធ្នាប់តាមដងផ្លូវ ទីប្រជុំជន និងទីសាធារណៈ ព្រមទាំងការគ្រប់គ្រងសំណល់ ការថែរក្សាអនាម័យ និងការកែលម្អបរិស្ថានឱ្យមានភាពស្អាតស្អំ និងមានរបៀបរៀបរយ។ ការងារទាំងនេះត្រូវការការចូលរួមយ៉ាងសកម្មពីអាជ្ញាធរ សមត្ថកិច្ច មន្ត្រីជំនាញ អាជីវករ និងប្រជាពលរដ្ឋ ដើម្បីធានាថា ការរៀបចំទីក្រុងមិនមែនជាការងាររបស់ស្ថាប័នណាមួយតែឯងនោះទេ ប៉ុន្តែជាការទទួលខុសត្រូវរួមរបស់សហគមន៍ទាំងមូល។

ឯកឧត្តមអភិបាលខេត្តក៏បានសង្កត់ធ្ងន់ទៅលើសារៈសំខាន់នៃការសហការគ្នារវាងអាជ្ញាធរខេត្ត រដ្ឋបាលក្រុង កងកម្លាំងមានសមត្ថកិច្ច និងមន្ទីរ-អង្គភាពជំនាញ ក្នុងការចាត់វិធានការរៀបចំសណ្ដាប់ធ្នាប់ឱ្យបានសមស្រប តាមតួនាទី និងភារកិច្ចរៀងៗខ្លួនផងដែរ។ ជាមួយគ្នានេះ ការអនុវត្តវិធានការនានាត្រូវមានភាពច្បាស់លាស់ ស្របតាមច្បាប់ និងបទប្បញ្ញត្តិជាធរមាន ព្រមទាំងផ្សារភ្ជាប់ជាមួយការផ្សព្វផ្សាយ និងការណែនាំដល់ប្រជាពលរដ្ឋ ដើម្បីបង្កើនការយល់ដឹង និងការចូលរួមដោយស្ម័គ្រចិត្ត។

ជាក់ស្ដែង ការរៀបចំសណ្ដាប់ធ្នាប់សាធារណៈ និងការលើកកម្ពស់អនាម័យក្នុងទីក្រុង មិនត្រឹមតែជួយកាត់បន្ថយភាពរញ៉េរញ៉ៃ និងបញ្ហាបរិស្ថានប៉ុណ្ណោះទេ ប៉ុន្តែថែមទាំងរួមចំណែកធ្វើឱ្យការធ្វើដំណើររបស់ប្រជាពលរដ្ឋកាន់តែមានភាពងាយស្រួល បង្កើនសុវត្ថិភាពក្នុងការប្រើប្រាស់ទីសាធារណៈ និងលើកកម្ពស់ភាពទាក់ទាញរបស់ទីក្រុងផងដែរ។

កិច្ចប្រជុំនេះក៏ជាឱកាសសម្រាប់ថ្នាក់ដឹកនាំ អាជ្ញាធរ និងអង្គភាពពាក់ព័ន្ធ ពិភាក្សាអំពីការរៀបចំយន្តការដឹកនាំ ការបែងចែកភារកិច្ច និងការសម្របសម្រួលការអនុវត្តការងារឱ្យមានភាពស៊ីសង្វាក់គ្នា ដើម្បីជំរុញឱ្យការរៀបចំសណ្ដាប់ធ្នាប់សាធារណៈ ការថែរក្សាបរិស្ថាន និងការកែលម្អសោភ័ណភាពក្រុងសិរីសោភ័ណឱ្យទទួលបានលទ្ធផលល្អប្រសើរជាបន្តបន្ទាប់ដែរ។

ការយកចិត្តទុកដាក់លើការងារទាំងនេះ គឺជាផ្នែកមួយនៃការលើកកម្ពស់គុណភាពរស់នៅរបស់ប្រជាពលរដ្ឋ និងការកសាងទីក្រុងឱ្យមានភាពស្រស់ស្អាត មានសណ្ដាប់ធ្នាប់ និងមានបរិស្ថានល្អ។ ដើម្បីឱ្យសម្រេចបាននូវគោលដៅនេះ ការអនុវត្តវិធានការរបស់អាជ្ញាធរត្រូវដើរទន្ទឹមគ្នាជាមួយការយល់ដឹង និងការចូលរួមរបស់ប្រជាពលរដ្ឋ ក្នុងការរក្សាអនាម័យ មិនបោះសំរាមពាសវាលពាសកាល គោរពសណ្ដាប់ធ្នាប់ និងចូលរួមថែរក្សាទ្រព្យសម្បត្តិសាធារណៈ។

តាមរយៈយន្តការគណៈកម្មការខេត្ត និងការសហការរបស់គ្រប់ភាគីពាក់ព័ន្ធ រដ្ឋបាលខេត្តបន្ទាយមានជ័យរំពឹងថា ការងាររៀបចំសណ្ដាប់ធ្នាប់សាធារណៈ ការគ្រប់គ្រងបរិស្ថាន អនាម័យ និងការកែលម្អសោភ័ណភាពក្រុងសិរីសោភ័ណនឹងកាន់តែមានភាពល្អប្រសើរ រួមចំណែកបង្កើតទីក្រុងដែលមានរបៀបរៀបរយ ស្អាត និងគួរឱ្យចង់រស់នៅ ព្រមទាំងឆ្លើយតបនឹងតម្រូវការរបស់ប្រជាពលរដ្ឋ និងការអភិវឌ្ឍរបស់ខេត្តនាពេលខាងមុខ៕

ដោយ៖ ឈុន សារ៉ាត