AKP បន្ទាយមានជ័យ ថ្ងៃទី១៩ ខែតុលា ឆ្នាំ២០២៦--អាជ្ញាធរខេត្តបន្ទាយមានជ័យ និងលេខាធិការដ្ឋានរៀបចំការបោះឆ្នោតខេត្ត បានជំរុញឱ្យអាជ្ញាធរមូលដ្ឋាន កងកម្លាំងប្រដាប់អាវុធ និងមន្ទីរ អង្គភាពពាក់ព័ន្ធ បន្តពង្រឹងកិច្ចសហការឱ្យបានជិតស្និទ្ធ ដើម្បីធានាសន្តិសុខ សុវត្ថិភាព សណ្តាប់ធ្នាប់សាធារណៈ និងបង្កលក្ខណៈងាយស្រួលជូនប្រជាពលរដ្ឋក្នុងការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦ ប្រកបដោយភាពរលូន និងមានទំនុកចិត្ត។

ការជំរុញនេះធ្វើឡើងក្នុងកិច្ចប្រជុំផ្សព្វផ្សាយ ស្តីពីកិច្ចសហការ និងវិធានការការពារសន្តិសុខ សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦ រវាងលេខាធិការដ្ឋានរៀបចំការបោះឆ្នោតខេត្តបន្ទាយមានជ័យ (ល.ខ.ប) ជាមួយអាជ្ញាធរមូលដ្ឋាន និងកងកម្លាំងប្រដាប់អាវុធ ដែលបានប្រព្រឹត្តទៅនៅព្រឹកថ្ងៃចន្ទ ទី១៩ ខែតុលា ឆ្នាំ២០២៦ នេះ ក្រោមអធិបតីភាពលោក ឃូ ពៅ អភិបាលរងខេត្ត តំណាងឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ និងលោក យ៉ង់ សក្តិ ប្រធានលេខាធិការដ្ឋានរៀបចំការបោះឆ្នោតខេត្ត។

ក្នុងឱកាសនោះ លោក ឃូ ពៅ បានលើកឡើងពីសារៈសំខាន់នៃកិច្ចសហការរវាងលេខាធិការដ្ឋានរៀបចំការបោះឆ្នោតខេត្ត អាជ្ញាធរគ្រប់លំដាប់ថ្នាក់ និងកងកម្លាំងមានសមត្ថកិច្ច ក្នុងការរក្សាបរិយាកាសសន្តិសុខ និងសណ្តាប់ធ្នាប់សាធារណៈឱ្យបានល្អប្រសើរ សម្រាប់ដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦។

លោកបានសង្កត់ធ្ងន់ថា ការអនុវត្តការងារនេះត្រូវការការចូលរួម និងការទទួលខុសត្រូវពីគ្រប់ភាគីពាក់ព័ន្ធដោយអាជ្ញាធរមូលដ្ឋាន ដោយត្រូវសហការជាមួយមន្ត្រីបោះឆ្នោត និងកងកម្លាំងមានសមត្ថកិច្ច ក្នុងការតាមដានស្ថានភាពជាក់ស្តែង កំណត់វិធានការការពារសន្តិសុខឱ្យសមស្រប និងដោះស្រាយបញ្ហាដែលអាចកើតមាននៅតាមមូលដ្ឋាននីមួយៗឱ្យបានទាន់ពេលវេលា។

លោកអភិបាលរងខេត្តក៏បានជំរុញឱ្យអាជ្ញាធរក្រុង ស្រុក ឃុំ សង្កាត់ បន្តផ្សព្វផ្សាយព័ត៌មានពាក់ព័ន្ធនឹងការពិនិត្យបញ្ជីឈ្មោះ និងការចុះឈ្មោះបោះឆ្នោតឱ្យបានទូលំទូលាយ ដើម្បីឱ្យប្រជាពលរដ្ឋបានយល់ដឹងច្បាស់អំពីនីតិវិធី និងមានឱកាសពិនិត្យផ្ទៀងផ្ទាត់ព័ត៌មានរបស់ខ្លួន។ ការផ្សព្វផ្សាយត្រូវធ្វើឡើងដោយច្បាស់លាស់ ត្រឹមត្រូវ និងទាន់ពេលវេលា ដើម្បីកាត់បន្ថយការភាន់ច្រឡំ និងលើកកម្ពស់ការចូលរួមរបស់ប្រជាពលរដ្ឋ។

ជាមួយគ្នានេះ កិច្ចសហការរវាងអាជ្ញាធរ និងកងកម្លាំងមានសមត្ថកិច្ច ត្រូវផ្តោតលើការបង្ការហានិភ័យ ការរក្សាសុវត្ថិភាពនៅតាមទីតាំងបម្រើការងារបោះឆ្នោត និងការធានាឱ្យប្រជាពលរដ្ឋអាចបំពេញកាតព្វកិច្ច និងសិទ្ធិរបស់ខ្លួនដោយសេរី ស្របតាមច្បាប់ និងនីតិវិធីជាធរមាន។

ដោយឡែក លោក យ៉ង់ សក្តិ ប្រធានលេខាធិការដ្ឋានរៀបចំការបោះឆ្នោតខេត្តបន្ទាយមានជ័យ បានលើកឡើងពីតួនាទី និងការទទួលខុសត្រូវរបស់លេខាធិការដ្ឋានរៀបចំការបោះឆ្នោតខេត្ត ក្នុងការសម្របសម្រួលជាមួយអាជ្ញាធរមូលដ្ឋាន និងស្ថាប័នពាក់ព័ន្ធ ដើម្បីឱ្យដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦ អនុវត្តទៅតាមផែនការ នីតិវិធី និងបទប្បញ្ញត្តិដែលបានកំណត់។

លោកបានបញ្ជាក់ពីសារៈសំខាន់នៃការផ្លាស់ប្តូរព័ត៌មាន ការបែងចែកតួនាទីឱ្យបានច្បាស់លាស់ និងការដោះស្រាយបញ្ហាប្រឈមដែលអាចកើតមានក្នុងពេលអនុវត្តការងារ ដោយត្រូវរក្សាភាពសម្របសម្រួលរវាងមន្ត្រីបោះឆ្នោត អាជ្ញាធរមូលដ្ឋាន និងកងកម្លាំងមានសមត្ថកិច្ច។ លោកក៏បានលើកឡើងផងដែរថា ការធានាសន្តិសុខ និងសណ្តាប់ធ្នាប់សាធារណៈ គឺជាកត្តាគាំទ្រដ៏សំខាន់មួយសម្រាប់ឱ្យដំណើរការបោះឆ្នោតប្រព្រឹត្តទៅដោយរលូន ខណៈដែលការអនុវត្តការងាររបស់មន្ត្រីពាក់ព័ន្ធត្រូវប្រកាន់ខ្ជាប់នូវភាពអព្យាក្រឹត តម្លាភាព ការគោរពច្បាប់ និងការបម្រើប្រជាពលរដ្ឋដោយស្មើភាព។

កិច្ចប្រជុំនេះក៏ជាវេទិកាសម្រាប់ឱ្យតំណាងមន្ទីរ អង្គភាព កងកម្លាំងប្រដាប់អាវុធ និងរដ្ឋបាលក្រុង ស្រុកទាំង៩ ក្នុងខេត្តបន្ទាយមានជ័យ ដោយបានពិភាក្សា និងពង្រឹងការយល់ដឹងរួមអំពីវិធានការសន្តិសុខ ការសម្របសម្រួលការងារ និងការត្រៀមលក្ខណៈឆ្លើយតបចំពោះស្ថានភាពដែលអាចប៉ះពាល់ដល់ដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោត។

សូមបញ្ជាក់ថា កិច្ចប្រជុំនេះមានការអញ្ជើញចូលរួមពីឯកឧត្តម ឡោ ប៊ុនពេជ្រ សមាជិកក្រុមប្រឹក្សាខេត្ត ព្រមទាំងលោក លោកស្រី ជាប្រធាន និងអនុប្រធានមន្ទីរ អង្គភាពពាក់ព័ន្ធ តំណាងកងកម្លាំងទាំងបីប្រភេទ និងអភិបាលក្រុង ស្រុកទាំង៩ ក្នុងខេត្តបន្ទាយមានជ័យ។

ការពង្រឹងកិច្ចសហការរវាងស្ថាប័នពាក់ព័ន្ធនៅក្នុងខេត្តបន្ទាយមានជ័យនេះ គឺជាការត្រៀមលក្ខណៈដ៏សំខាន់ក្នុងការធានាឱ្យដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦ ប្រព្រឹត្តទៅក្នុងបរិយាកាសសន្តិភាព សុវត្ថិភាព និងមានសណ្តាប់ធ្នាប់ ព្រមទាំងជួយឱ្យប្រជាពលរដ្ឋទទួលបានព័ត៌មានត្រឹមត្រូវ និងអាចចូលរួមអនុវត្តសិទ្ធិបោះឆ្នោតរបស់ខ្លួនស្របតាមច្បាប់ជាធរមាន៕

ដោយ៖ ឈុន សារ៉ាត