AKP ភ្នំពេញ ថ្ងៃទី១៩ ខែតុលា ឆ្នាំ២០២៦ -- រដ្ឋមន្ត្រីក្រសួងថាមពលសហរដ្ឋអាមេរិក លោក គ្រីស វ៉្រាយត៍ បាននិយាយកាលពីថ្ងៃអាទិត្យថា ការផ្គត់ផ្គង់ប្រេងម៉ាស៊ូតពីប្រទេសរុស្ស៊ីអាចផ្តល់ផលប្រយោជន៍ដល់អ្នកប្រើប្រាស់នៅក្នុងសហរដ្ឋអាមេរិក។

លោក វ៉្រាយត៍ បាននិយាយថា «ប្រសិនបើរុស្ស៊ីអាចនាំយកប្រេងម៉ាស៊ូតបន្ថែមចូលមកក្នុងទីផ្សារ និងនាំចេញវាបាន នោះវានឹងផ្តល់ផលប្រយោជន៍ដល់អ្នកប្រើប្រាស់ជនជាតិអាម៉េរិក»។

លោកក៏បានបញ្ជាក់ដែរថា សហរដ្ឋអាមេរិកមិនបានបន្ធូរបន្ថយទណ្ឌកម្មណាមួយលើប្រេងរបស់រុស្ស៊ីនោះទេ ដោយលោកបានបន្ថែមថាទាំងនេះ គឺជាទណ្ឌកម្ម «ដ៏តឹងរ៉ឹងបំផុត» ដែលមិនធ្លាប់មានពីមុនមក។

ប្រធានាធិបតីរុស្ស៊ី លោក វ៉្លាឌីមៀរ ពូទីន បានសន្ទនាតាមទូរស័ព្ទជាមួយលោក ដូណាល់ ត្រាំ កាលពីពេលថ្មីៗនេះ។ បន្ទាប់ពីការសន្ទនានោះប្រធានាធិបតីសហរដ្ឋអាមេរិកបានលើកឡើងថា ភាគីទាំងពីរបានឈានដល់កិច្ចព្រមព្រៀងមួយ ស្តីពីការផ្គត់ផ្គង់ប្រេងម៉ាស៊ូតពីប្រទេសរុស្ស៊ី។ លោកបាននិយាយថា សហរដ្ឋអាមេរិកមានសេចក្តីរីករាយយ៉ាងខ្លាំង ដែលទទួលបានប្រេងម៉ាស៊ូតពីប្រទេសរុស្ស៊ី ជាអ្វីដែលកំពុងមានតម្រូវការចាំបាច់បំផុត៕

ដោយ៖ យា ចិន្ដាខន្ដី (ប្រភព៖ ស្ពុតនីក)