AKP ភ្នំពេញ ថ្ងៃទី១៦ ខែតុលា ឆ្នាំ២០២៦ -- លោក គីរីល ឌីមីទ្រីវ ប្រធានមូលនិធិវិនិយោគផ្ទាល់របស់រុស្ស៊ី (RDIF) និងជាបេសកជនពិសេសរបស់ប្រធានាធិបតីរុស្ស៊ីទទួលបន្ទុកកិច្ចសហប្រតិបត្តិការសេដ្ឋកិច្ចជាមួយបរទេសបាននិយាយកាលពីពេលថ្មីៗនេះថា លោករំពឹងថា កិច្ចសន្យាផ្គត់ផ្គង់ប្រេងម៉ាស៊ូតដំបូងជាមួយសហរដ្ឋអាមេរិក នឹងត្រូវបានចុះហត្ថលេខានៅក្នុងរយៈពេលប៉ុន្មានថ្ងៃខាងមុខនេះ។

លោក ឌីមីទ្រីវ បាននិយាយថា «យើងកំពុងទាក់ទងគ្នាយ៉ាងសកម្មជាមួយភាគីសហរដ្ឋអាមេរិកស្ទើរតែរាល់ម៉ោង ហើយអ្វីៗកំពុងដំណើរការទៅយ៉ាងឆាប់រហ័ស។ ប៉ុន្តែ ដោយសារហេដ្ឋារចនាសម្ព័ន្ធថាមពលរបស់យើងបានរងការខូចខាតយ៉ាងធ្ងន់ធ្ងរ យើងកំពុងខិតខំជួសជុលឡើងវិញយ៉ាងសកម្ម (ស្ទើរតែរាល់ម៉ោង) ដោយដោះស្រាយបញ្ហាភស្តុភារជាច្រើនដើម្បីធានាថាការងារទាំងអស់នេះអាចអនុវត្តបានយ៉ាងឆាប់រហ័ស និងមានប្រសិទ្ធភាព។ ទោះជាយ៉ាងណាក៏ដោយ អ្វីៗនឹងត្រូវបានសម្រេចរួចរាល់នៅក្នុងរយៈពេលប៉ុន្មានថ្ងៃខាងមុខនេះ»។ លោកបានថ្លែងបែបនេះ នៅពេលដែលត្រូវបានសួរថា តើកិច្ចសន្យាផ្គត់ផ្គង់ប្រេងម៉ាស៊ូតដំបូងនឹងត្រូវចុះហត្ថលេខានៅពេលណា ហើយការដឹកជញ្ជូននឹងចាប់ផ្តើមនៅពេលណា។

កិច្ចព្រមព្រៀងប្រេងម៉ាស៊ូតរវាងរុស្ស៊ី និងសហរដ្ឋអាមេរិក ដែលត្រូវបានប្រកាសឡើងបន្ទាប់ពីការសន្ទនាតាមទូរស័ព្ទរវាងប្រធានាធិបតីនៃប្រទេសទាំងពីរ កាលពីថ្ងៃទី០៩ ខែតុលា គឺជាការរៀបចំជាបណ្តោះអាសន្នមួយ ដែលក្នុងនោះ សហរដ្ឋអាមេរិកបានផ្អាកការដាក់ទណ្ឌកម្មលើប្រេងម៉ាស៊ូតរបស់រុស្ស៊ីរហូតដល់ខែមេសា ឆ្នាំ២០២៧។ រុស្ស៊ីគ្រោងនឹងផ្គត់ផ្គង់ប្រេងជាង ៣០០.០០០តោនជាបន្ទាន់ បូករួមទាំងបរិមាណបន្ថែមចំនួន៥០០.០០០តោននៅក្នុងខែវិច្ឆិកា និង ១លានតោននៅក្នុងខែធ្នូ៕

ដោយ៖ យា ចិន្ដាខន្ដី (ប្រភព៖ ស្ពុតនីក)