AKP ភ្នំពេញ ថ្ងៃទី១៦ ខែតុលា ឆ្នាំ២០២៦ -- លោក ឌីមីទ្រី ប៉េសកូវអ្នកនាំពាក្យវិមានក្រឹមឡាំង បាននិយាយកាលពីពេលថ្មីៗនេះថា កិច្ចព្រមព្រៀងរវាងទីក្រុងមូស្គូ និងទីក្រុងវ៉ាស៊ីនតោន ស្តីពីប្រេងម៉ាស៊ូត គឺស្របទៅនឹងផលប្រយោជន៍របស់សហរដ្ឋអាមេរិក រុស្ស៊ី និងទីផ្សារថាមពលសកលលោក។

លោក ប៉េសកូវ បានប្រាប់អ្នកសារព័ត៌មានថា «តាមពិតទៅ នេះ គឺជាផ្នែកមួយនៃកិច្ចសហប្រតិបត្តិការរវាងរុស្ស៊ី និងសហរដ្ឋអាមេរិក ដែលផ្តល់ផលប្រយោជន៍ទៅវិញទៅមក។ វាជាផលប្រយោជន៍សម្រាប់សហរដ្ឋអាមេរិក សម្រាប់ទីផ្សារថាមពលសកលលោក និងសម្រាប់ប្រទេសរុស្ស៊ី ដូច្នេះហើយទើបវាបានកើតឡើង»។

លោក ប៉េសកូវ បានបន្ថែមថា វិមានក្រឹមឡាំងមិនឃើញមានទំនាក់ទំនងផ្ទាល់ណាមួយ រវាងការសម្រេចចិត្តរបស់សហរដ្ឋអាមេរិកលើប្រេងម៉ាស៊ូតរបស់រុស្ស៊ី ជាមួយនឹងជំហររបស់រុស្ស៊ីនៅក្នុងកិច្ចចរចាពាក់ព័ន្ធនឹងប្រទេសអ៊ុយក្រែននោះទេ

លោក ប៉េសកូវ បានបញ្ជាក់ថា បណ្តាប្រទេសនៅអឺរ៉ុប ក៏ដូចជាប្រទេសដទៃទៀតនៅលើពិភពលោក គឺជាអ្នកទិញប្រេងរបស់រុស្ស៊ីយ៉ាងសកម្ម។

លោក ប៉េសកូវ បានលើកឡើងថា បំណងរបស់សហភាពអឺរ៉ុបក្នុងការដាក់ទណ្ឌកម្មលើប្រទេសរុស្ស៊ី ដើម្បីឆ្លើយតបទៅនឹងការសម្រេចចិត្តរបស់សហរដ្ឋអាមេរិកលើការនាំចូលប្រេងម៉ាស៊ូតនោះ អាចនឹងបង្កជាឧបសគ្គដល់កិច្ចព្រមព្រៀងរវាងប្រទេសទាំងពីរ។

លោកបាននិយាយថា «ក្នុងន័យនេះ ប្រទេសរុស្ស៊ី គឺជាប្រទេសមួយដែលផ្គត់ផ្គង់ទំនិញរបស់ខ្លួនទៅកាន់ទីផ្សារពិភពលោកក្នុងលក្ខណៈប្រកួតប្រជែង។ យើងនឹងបន្តធ្វើបែបនេះតទៅទៀត»។

កាលពីសប្តាហ៍មុន ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយថា នៅក្នុងកិច្ចសន្ទនាតាមទូរស័ព្ទជាមួយប្រធានាធិបតីរុស្ស៊ីលោក វ្ល៉ាឌីមៀរ ពូទីន កាលពីថ្ងៃទី០៩ ខែតុលា ដោយភាគីទាំងពីរបានឈានដល់កិច្ចព្រមព្រៀងមួយ ស្តីពីការផ្គត់ផ្គង់ប្រេងម៉ាស៊ូតពីប្រទេសរុស្ស៊ី។ លោកត្រាំ បានបន្ថែមថា សហរដ្ឋអាមេរិកពិតជារីករាយណាស់ដែលទទួលបានប្រេងម៉ាស៊ូតពីប្រទេសរុស្ស៊ី ហើយសហរដ្ឋអាមេរិកក៏ត្រូវការប្រេងនេះផងដែរ៕

ដោយ៖ យា ចិន្ដាខន្ដី (ប្រភព៖ ស្ពុតនីក)