AKP បន្ទាយមានជ័យ ថ្ងៃទី១៦ ខែតុលា ឆ្នាំ២០២៦-- រដ្ឋបាលខេត្តបន្ទាយមានជ័យជំរុញការពង្រឹងការគ្រប់គ្រងហិរញ្ញប្បទានសុខាភិបាលឱ្យកាន់តែមានប្រសិទ្ធភាព តម្លាភាព និងគណនេយ្យភាព ដោយផ្តោតលើការប្រើប្រាស់ថវិកាឱ្យចំគោលដៅ ឆ្លើយតបនឹងតម្រូវការជាក់ស្តែងរបស់អង្គភាពសុខាភិបាល និងធានាឱ្យប្រជាពលរដ្ឋ ជាពិសេសគ្រួសារក្រីក្រ និងជនងាយរងគ្រោះ ទទួលបានសេវាថែទាំសុខភាពសមស្រប និងទាន់ពេលវេលា។

ការជំរុញនេះធ្វើឡើងក្នុងកិច្ចប្រជុំគណៈកម្មការហិរញ្ញប្បទានសុខាភិបាលខេត្តបន្ទាយមានជ័យ ប្រចាំត្រីមាសទី៣ ឆ្នាំ២០២៦ ក្រោមអធិបតីភាពលោកស្រី មុំ ពុទ្ធិតា អភិបាលរងខេត្ត តំណាងឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ នាព្រឹកថ្ងៃសុក្រ ទី១៦ ខែតុលា ឆ្នាំ២០២៦ នៅសាលប្រជុំផ្ការំដួល នៃមន្ទីរសុខាភិបាលនៃរដ្ឋបាលខេត្ត។ កិច្ចប្រជុំនេះមានការអញ្ជើញចូលរួមពីលោកវេជ្ជបណ្ឌិត ឡេ ច័ន្ទសង្វារ ប្រធានមន្ទីរសុខាភិបាលនៃរដ្ឋបាលខេត្ត លោក បឹង គឹមសឹង ប្រធានមន្ទីរសេដ្ឋកិច្ច និងហិរញ្ញវត្ថុខេត្ត ព្រមទាំងអភិបាល អភិបាលរងក្រុង ស្រុក តំណាងមន្ទីរ អង្គភាពពាក់ព័ន្ធ និងកងកម្លាំងទាំងបី។

ថ្លែងក្នុងឱកាសនោះ លោកស្រី មុំ ពុទ្ធិតា បានលើកឡើងថា កិច្ចប្រជុំនេះមានសារៈសំខាន់ក្នុងការតាមដាន ពិនិត្យ និងវាយតម្លៃលើការប្រើប្រាស់ថវិកាហិរញ្ញប្បទានសុខាភិបាលក្នុងត្រីមាសទី៣ ដោយផ្តោតលើប្រភពថវិកាសំខាន់ៗ រួមមានថវិការដ្ឋ ថវិកាបានមកពីការផ្តល់សេវាសុខាភិបាល និងមូលនិធិសមធម៌សុខាភិបាល ដើម្បីធានាថា ធនធានហិរញ្ញវត្ថុដែលបានបែងចែក ត្រូវបានប្រើប្រាស់ត្រឹមត្រូវ ចំគោលដៅ និងផ្តល់ផលប្រយោជន៍ជាក់ស្តែងដល់ប្រជាពលរដ្ឋ។

លោកស្រីបានបញ្ជាក់ថា ការពិនិត្យលទ្ធផលការងារមិនត្រឹមតែផ្តោតលើសមិទ្ធផលដែលសម្រេចបានប៉ុណ្ណោះទេ ប៉ុន្តែត្រូវកំណត់ឱ្យបានច្បាស់លាស់នូវបញ្ហាប្រឈម និងចំណុចខ្វះខាតក្នុងការគ្របដណ្តប់សេវាសុខាភិបាល ជាពិសេសការផ្តល់សេវាជូនគ្រួសារក្រីក្រ និងប្រជាពលរដ្ឋដែលងាយរងគ្រោះ។ ការកំណត់បញ្ហាទាំងនេះ គឺជាមូលដ្ឋានសម្រាប់រៀបចំដំណោះស្រាយឱ្យមានប្រសិទ្ធភាព និងកែលម្អគុណភាពសេវាសុខាភិបាលឱ្យកាន់តែប្រសើរឡើង។

លោកស្រីអភិបាលរងខេត្តបានសង្កត់ធ្ងន់ថា អង្គភាពសុខាភិបាលគ្រប់លំដាប់ថ្នាក់ ត្រូវពង្រឹងការគ្រប់គ្រងហិរញ្ញវត្ថុ និងការចំណាយថវិកាឱ្យបានត្រឹមត្រូវ តម្លាភាព និងមានគណនេយ្យភាព ស្របតាមគោលការណ៍ណែនាំរបស់ក្រសួងសុខាភិបាល និងក្រសួងសេដ្ឋកិច្ច និងហិរញ្ញវត្ថុ។ ការប្រើប្រាស់ថវិកាត្រូវភ្ជាប់ជាមួយតម្រូវការជាក់ស្តែងរបស់មន្ទីរពេទ្យខេត្ត មន្ទីរពេទ្យបង្អែកក្រុង ស្រុក និងមណ្ឌលសុខភាព ដើម្បីធានាថា ការចំណាយនីមួយៗមានភាពចាំបាច់ សមស្រប និងរួមចំណែកដោយផ្ទាល់ដល់ការផ្តល់សេវាជូនអ្នកជំងឺ។

ទន្ទឹមនឹងនេះ លោកស្រីបានណែនាំឱ្យអភិបាល អភិបាលរងក្រុង ស្រុក និងមន្ទីរ អង្គភាពពាក់ព័ន្ធ បន្តសហការគ្នាយ៉ាងជិតស្និទ្ធ ដើម្បីកំណត់ទិសដៅការងារសម្រាប់ត្រីមាសទី៤ ឆ្នាំ២០២៦ រៀបចំផែនការសកម្មភាព និងការបែងចែកកញ្ចប់ថវិកាឱ្យស្របតាមអាទិភាព និងតម្រូវការជាក់ស្តែង។ ជាពិសេស ត្រូវរួមគ្នាពិភាក្សា ស្វែងរកដំណោះស្រាយចំពោះការលំបាកដែលអង្គភាពសុខាភិបាលកំពុងជួបប្រទះ ដើម្បីកាត់បន្ថយឧបសគ្គក្នុងការផ្តល់សេវា និងជំរុញការគ្របដណ្តប់សុខភាពជាសកល។

កិច្ចប្រជុំគណៈកម្មការហិរញ្ញប្បទានសុខាភិបាលប្រចាំត្រីមាសទី៣ ឆ្នាំ២០២៦ គឺជាយន្តការសំខាន់ក្នុងការត្រួតពិនិត្យប្រសិទ្ធភាពនៃការប្រើប្រាស់ថវិកា កំណត់បញ្ហាប្រឈម និងដាក់ចេញទិសដៅការងារសម្រាប់ត្រីមាសបន្ទាប់ ដើម្បីឱ្យធនធានហិរញ្ញវត្ថុក្នុងវិស័យសុខាភិបាលត្រូវបានប្រើប្រាស់ប្រកបដោយតម្លាភាព គណនេយ្យភាព និងចំគោលដៅ ព្រមទាំងរួមចំណែកលើកកម្ពស់សុខុមាលភាពប្រជាពលរដ្ឋនៅទូទាំងខេត្តបន្ទាយមានជ័យ៕

ដោយ ឈុន សារ៉ាត