AKP បន្ទាយមានជ័យ ថ្ងៃទី១៦ ខែតុលា ឆ្នាំ២០២៦ -- ដោយយកចិត្តទុកដាក់ចំពោះសុខទុក្ខ និងជីវភាពរស់នៅរបស់ប្រជាពលរដ្ឋដែលរងផលប៉ះពាល់ដោយគ្រោះទឹកជំនន់ ព្រមទាំងគ្រួសារដែលមានជីវភាពខ្វះខាត ឯកឧត្តម គង់ វ៉ាញ ប្រធានក្រុមការងាររាជរដ្ឋាភិបាលចុះមូលដ្ឋានឃុំបត់ត្រង់ និងលោក កែវ តុម ប្រធានក្រុមប្រឹក្សាស្រុកមង្គលបូរី បានដឹកនាំសហការី និងអាជ្ញាធរភូមិ-ឃុំ ចុះសំណេះសំណាល សួរសុខទុក្ខ និងនាំយកអំណោយចែកជូនប្រជាពលរដ្ឋចំនួន ២០០គ្រួសារបន្ថែមទៀត កាលពីរសៀលថ្ងៃទី១៥ ខែតុលា ឆ្នាំ២០២៦។

ក្នុងឱកាសនោះ ក្រុមការងារបាននាំយកអំណោយរបស់ឯកឧត្តម ជា ឆេង ប្រធានក្រុមការងាររាជរដ្ឋាភិបាលចុះមូលដ្ឋានស្រុកមង្គលបូរី ដើម្បីចែកជូនដល់គ្រួសារដែលរងផលប៉ះពាល់ដោយទឹកជំនន់លិចលំនៅឋាន និងគ្រួសារដែលមានជីវភាពខ្វះខាត ដោយក្នុងមួយគ្រួសារទទួលបានអង្ករ ១០គីឡូក្រាម មី ១០កញ្ចប់ ទឹកត្រី ២ដប ទឹកស៊ីអ៊ីវ ២ដប និងទឹកសុទ្ធ ២យួរ សម្រាប់ជួយសម្រួលដល់តម្រូវការប្រើប្រាស់ប្រចាំថ្ងៃរបស់ប្រជាពលរដ្ឋ។

ថ្លែងក្នុងឱកាសសំណេះសំណាលជាមួយប្រជាពលរដ្ឋ ឯកឧត្តម គង់ វ៉ាញ បានបង្ហាញពីការយកចិត្តទុកដាក់របស់ថ្នាក់ដឹកនាំរាជរដ្ឋាភិបាលចំពោះសុខទុក្ខ និងជីវភាពរស់នៅរបស់ប្រជាពលរដ្ឋនៅគ្រប់ទីកន្លែង ជាពិសេសប្រជាពលរដ្ឋដែលកំពុងជួបការលំបាកដោយសារគ្រោះធម្មជាតិ និងកត្តាជីវភាព។

ឯកឧត្តមបានបញ្ជាក់ថា ការចុះជួបសំណេះសំណាល និងសួរសុខទុក្ខប្រជាពលរដ្ឋដោយផ្ទាល់នេះ គឺជាឱកាសសម្រាប់ក្រុមការងារ និងអាជ្ញាធរមូលដ្ឋានបានស្វែងយល់ពីស្ថានភាពជាក់ស្តែង ព្រមទាំងបង្ហាញពីការយកចិត្តទុកដាក់ និងស្មារតីទទួលខុសត្រូវចំពោះប្រជាពលរដ្ឋដែលកំពុងជួបប្រទះការលំបាក។ ជាមួយគ្នានេះ ការនាំយកគ្រឿងឧបភោគបរិភោគចែកជូននាពេលនេះ ក៏ជាការរួមចំណែកជួយសម្រាលបន្ទុកក្នុងគ្រួសារប្រជាពលរដ្ឋបានមួយកម្រិតផងដែរ។

ឯកឧត្តម គង់ វ៉ាញ ក៏បានគូសបញ្ជាក់ពីសារៈសំខាន់នៃការចូលរួមសហការរវាងក្រុមការងាររាជរដ្ឋាភិបាល អាជ្ញាធរមូលដ្ឋាន និងសប្បុរសជន ក្នុងការជួយគាំទ្រប្រជាពលរដ្ឋដែលងាយរងគ្រោះផងដែរ ដើម្បីធានាថា ការជួយឧបត្ថម្ភអាចទៅដល់ដៃអ្នកដែលមានតម្រូវការជាក់ស្តែង និងទាន់ពេលវេលា។

សកម្មភាពនេះបានឆ្លុះបញ្ចាំងពីស្មារតីសាមគ្គីភាព និងការយកចិត្តទុកដាក់ចំពោះសុខុមាលភាពប្រជាពលរដ្ឋក្នុងគ្រាដែលគ្រួសារមួយចំនួនកំពុងប្រឈមនឹងផលប៉ះពាល់ដោយសារទឹកជំនន់ និងការលំបាកផ្នែកជីវភាព។ ជំនួយជាសម្ភារចាំបាច់ទាំងនេះ ទោះបីមិនអាចដោះស្រាយបញ្ហាបានទាំងស្រុងក៏ដោយ ប៉ុន្តែអាចជួយបំពេញតម្រូវការប្រចាំថ្ងៃ និងផ្តល់កម្លាំងចិត្តដល់ប្រជាពលរដ្ឋឱ្យបន្តខិតខំស្ដារជីវភាពឡើងវិញ។

ការចុះសួរសុខទុក្ខ និងចែកអំណោយដល់ប្រជាពលរដ្ឋចំនួន ២០០គ្រួសារបន្ថែមទៀតនៅពេលនេះ ក៏បង្ហាញពីការបន្តយកចិត្តទុកដាក់របស់ក្រុមការងាររាជរដ្ឋាភិបាលចុះមូលដ្ឋានស្រុកមង្គលបូរី និងឃុំបត់ត្រង់ ក្នុងការរួមចំណែកជាមួយអាជ្ញាធរមូលដ្ឋានជួយដោះស្រាយការលំបាករបស់ប្រជាពលរដ្ឋ និងលើកកម្ពស់សុខុមាលភាពសង្គមនៅមូលដ្ឋាន។

តាមរយៈសកម្មភាពជាក់ស្តែងទាំងនេះ ការជួយគ្នាក្នុងគ្រាលំបាក និងការផ្សារភ្ជាប់ទំនាក់ទំនងរវាងថ្នាក់ដឹកនាំជាមួយប្រជាពលរដ្ឋ គឺជាកម្លាំងសំខាន់ក្នុងការពង្រឹងសាមគ្គីភាព និងជំរុញឱ្យសហគមន៍អាចឆ្លងកាត់ផលប៉ះពាល់ដោយគ្រោះធម្មជាតិ ព្រមទាំងបន្តស្ដារជីវភាពរស់នៅឱ្យប្រសើរឡើងវិញ៕

ដោយ៖ ឈុន សារ៉ាត