AKPបន្ទាយមានជ័យថ្ងៃទី ១៥ ខែតុលាឆ្នាំ២០២៦--ការបង្ការ និងទប់ស្កាត់ជំងឺឆ្កែឆ្កួត គឺជាកិច្ចការដ៏សំខាន់មួយដែលទាមទារឱ្យមានការចូលរួមយ៉ាងសកម្ម  ពីគ្រប់ភាគីពាក់ព័ន្ធ ជាពិសេសមន្ត្រីជំនាញកសិកម្ម មន្ត្រីសុខភាពសត្វ អាជ្ញាធរមូលដ្ឋាន និងប្រជាពលរដ្ឋ។     

ក្នុងន័យនេះ ការពង្រឹងចំណេះដឹង និងសមត្ថភាពបច្ចេកទេសដល់មន្ត្រីជំនាញ តាមរយៈវគ្គបណ្តុះបណ្តាលគ្រូបង្គោលស្តីពីការចាក់វ៉ាក់សាំងការពារជំងឺឆ្កែឆ្កួតដល់សត្វសុនខ និងការបញ្ចូលទិន្នន័យ បាន  ក្លាយជាជំហានដ៏សំខាន់មួយក្នុងការត្រៀមរៀបចំយុទ្ធនាការបង្ការ និងទប់ស្កាត់ជំងឺដ៏កាចសាហាវនេះនៅក្នុងមូលដ្ឋានខេត្តបន្ទាយមានជ័យ។    

លោកស្រី អន ស៊ីថា ប្រធានស្តីទីមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ បានបង្ហាញពីសារសំខាន់នៃការបណ្តុះបណ្តាលគ្រូបង្គោលនេះ ក្នុងការលើកកម្ពស់សមត្ថភាពមន្ត្រីជំនាញឱ្យមានចំណេះដឹងត្រឹមត្រូវ និងជំនាញបច្ចេកទេសច្បាស់លាស់ ដើម្បីចូលរួមអនុវត្តការងារចាក់វ៉ាក់សាំងការពារជំងឺឆ្កែឆ្កួតដល់សត្វសុនខប្រកបដោយប្រសិទ្ធភាព ព្រមទាំងរួមចំណែកការពារសុខភាពសត្វ សុខភាពមនុស្ស និងសុខុមាលភាពសាធារណៈ។

តាមរយៈការលើកកម្ពស់សមត្ថភាពមន្ត្រីជំនាញ និងការរៀបចំយុទ្ធនាការចាក់វ៉ាក់សាំងឱ្យបានទូលំទូលាយ ការងារបង្ការជំងឺឆ្កែឆ្កួតនឹងមានភាពប្រសើរឡើង ដោយជួយកាត់បន្ថយហានិភ័យនៃការចម្លងជំងឺពីសត្វមកមនុស្ស និងបង្កើនការយល់ដឹងរបស់ប្រជាពលរដ្ឋអំពីសារៈសំខាន់នៃការថែទាំ និងការពារសត្វចិញ្ចឹម។

ជាក់ស្តែង កាលពីថ្ងៃទី១៤ ខែតុលា ឆ្នាំ២០២៦ មន្ត្រីជំនាញ  បានចូលរួមវគ្គបណ្តុះបណ្តាលគ្រូបង្គោល ស្តីពីការចាក់វ៉ាក់សាំងការពារជំងឺឆ្កែឆ្កួតដល់សត្វសុនខ និងការបញ្ចូលទិន្នន័យ ដែលរៀបចំឡើងក្រោមកិច្ចសហការរវាងក្រសួងសុខាភិបាល និងអគ្គនាយកដ្ឋានសុខភាពសត្វ និងផលិតកម្មសត្វ ដោយមានការចូលរួមពីមន្ត្រីពាក់ព័ន្ធនៅតាមមូលដ្ឋានផងដែរ។  

វគ្គបណ្តុះបណ្តាលនេះបានប្រព្រឹត្តទៅនៅសាលប្រជុំធំ នៃមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ ដោយមានអ្នកចូលរួមសរុបចំនួន   ២៦នាក់ ក្នុងនោះមានស្ត្រីចំនួន ៣នាក់។

អ្នកចូលរួមរួមមានមន្ត្រីមកពីការិយា ល័យកសិកម្ម ធនធានធម្មជាតិ និងបរិស្ថានស្រុក ការិយាល័យសេដ្ឋកិច្ច និងអភិវឌ្ឍន៍សហគមន៍ក្រុង មន្ត្រីកសិកម្មឃុំ និងភ្នាក់ងារសុខភាពសត្វភូមិ ដែលជាកម្លាំងស្នូលក្នុងការអនុវត្តការងារបង្ការ និងទប់ស្កាត់ជំងឺឆ្កែឆ្កួតនៅតាមមូលដ្ឋាន។         

លោកស្រី អន ស៊ីថាបានបញ្ជាក់ថាវគ្គបណ្តុះបណ្តាលនេះមានគោលបំណងសំខាន់ក្នុងការបង្កើនចំណេះដឹង និងពង្រឹងសមត្ថភាពបច្ចេកទេសដល់អ្នកពាក់ព័ន្ធ ឱ្យយល់ដឹងកាន់តែច្បាស់អំពីវិធីនៃការចម្លងជំងឺឆ្កែឆ្កួត រោគសញ្ញានៃជំងឺលើសត្វ និងមនុស្ស ព្រមទាំងវិធានការបង្ការ និងទប់ស្កាត់ការរីករាលដាលនៃជំងឺនេះ។

លើសពីនេះ ការបណ្តុះបណ្តាលក៏ផ្តោតលើការពង្រឹងសមត្ថភាពក្នុងការចាក់វ៉ាក់សាំងការពារជំងឺឆ្កែឆ្កួតដល់សត្វសុនខ និងសត្វដែលងាយរងហានិភ័យ ព្រមទាំងការបញ្ចូលទិន្នន័យឱ្យបានត្រឹមត្រូវ ដើម្បីគាំទ្រដល់ការគ្រប់គ្រង និងតាមដានលទ្ធផលនៃយុទ្ធនាការចាក់វ៉ាក់សាំងនៅតាមមូលដ្ឋាននីមួយៗ។        

ចំណុចនេះមានសារៈសំខាន់យ៉ាងខ្លាំង ព្រោះការបង្ការជំងឺឆ្កែឆ្កួតមិនអាចពឹងផ្អែកតែលើការព្យាបាលនៅពេលមានករណីកើតឡើងនោះទេ ប៉ុន្តែត្រូវចាប់ផ្តើមពីការបង្ការជាមុន ការចាក់វ៉ាក់សាំងដល់សត្វ និងការតាមដានស្ថានភាពជំងឺឱ្យបានជាប់លាប់។ ការប្រមូល និងបញ្ចូលទិន្នន័យបានត្រឹមត្រូវ ក៏ជាមូលដ្ឋានសម្រាប់ជួយឱ្យមន្ត្រីជំនាញវាយតម្លៃស្ថានភាពជាក់ស្តែង កំណត់តំបន់ដែលត្រូវយកចិត្តទុកដាក់ និងរៀបចំផែនការអន្តរាគមន៍ឱ្យបានសមស្រប។

ជាមួយគ្នានេះ លោកស្រី អន ស៊ីថា បានបង្ហាញពីការយកចិត្តទុកដាក់របស់មន្ទីរក្នុងការជំរុញការងារបង្ការ និងទប់ស្កាត់ជំងឺឆ្កែឆ្កួត ដោយបានប្រគល់សម្ភារ និងបរិក្ខារចាំបាច់សម្រាប់គាំទ្រដល់ការចុះអនុវត្តយុទ្ធនាការចាក់វ៉ាក់សាំងការពារជំងឺឆ្កែឆ្កួតនៅតាមមូលដ្ឋានក្នុងខេត្តបន្ទាយមានជ័យ ដែលគ្រោងនឹងចាប់ផ្តើមក្នុងពេលឆាប់ៗខាងមុខ។

ការផ្តល់សម្ភារ និងបរិក្ខារទាំងនេះ គឺជាផ្នែកមួយនៃការត្រៀមលក្ខណៈជាក់ ស្តែង ដើម្បីជួយសម្រួលដល់ការងាររបស់មន្ត្រីជំនាញក្នុងការចុះអនុវត្តការចាក់វ៉ាក់សាំងឱ្យកាន់តែមានប្រសិទ្ធភាព និងអាចឈានទៅដល់សត្វសុនខនៅតាមសហគមន៍នានា។ ទន្ទឹមនឹងនេះ ការសហការរវាងមន្ត្រីជំនាញថ្នាក់ខេត្ត ស្រុក ក្រុង ឃុំ និងភូមិ ក៏ជាកត្តាគន្លឹះក្នុងការជំរុញឱ្យយុទ្ធនាការនេះទទួលបានលទ្ធផលល្អប្រសើរ។      

ជាក់ស្តែង ការចូលរួមរបស់មន្ត្រីកសិកម្មឃុំ និងភ្នាក់ងារសុខភាពសត្វភូមិ មានសារៈសំខាន់ក្នុងការផ្សព្វផ្សាយព័ត៌មានទៅកាន់ប្រជាពលរដ្ឋ ដើម្បីឱ្យពួកគាត់យល់ដឹងពីគ្រោះថ្នាក់នៃជំងឺឆ្កែឆ្កួត និងចូលរួមនាំសត្វសុនខរបស់ខ្លួនមកទទួលការចាក់វ៉ាក់សាំងតាមការណែនាំរបស់មន្ត្រីជំនាញ។ ការចូលរួមរបស់សហគមន៍នឹងជួយបង្កើនលទ្ធភាពគ្របដណ្តប់នៃការចាក់វ៉ាក់សាំង និងកាត់បន្ថយចំនួនសត្វដែលមិនទាន់ទទួលបានការការពារ។

គួរបញ្ជាក់ថា ជំងឺឆ្កែឆ្កួតជាជំងឺឆ្លងដ៏គ្រោះថ្នាក់ ដែលអាចចម្លងពីសត្វមកមនុស្ស ជាពិសេសតាមរយៈការខាំ ឬការប៉ះពាល់ទឹកមាត់សត្វដែលមានមេរោគតាមរយៈរបួស។ ដូច្នេះ ការចាក់វ៉ាក់សាំងការពារជំងឺឆ្កែឆ្កួតដល់សត្វសុនខ គួបផ្សំនឹងការអប់រំផ្សព្វផ្សាយដល់ប្រជាពលរដ្ឋ និងការឆ្លើយតបឱ្យបានទាន់ពេលវេលានៅពេលមានករណីសង្ស័យ គឺជាវិធានការដ៏សំខាន់ក្នុងការកាត់បន្ថយហានិភ័យនៃការចម្លងជំងឺនេះ។

ក្នុងករណីត្រូវបានសត្វខាំ ឬកោសដែលអាចមានហានិភ័យ ប្រជាពលរដ្ឋគួរលាងរបួសជាមួយសាប៊ូ និង   ទឹកហូរឱ្យបានហ្មត់ចត់ភ្លាមៗ ហើយទៅទទួលការវាយតម្លៃ និងការណែនាំពីមន្ត្រីសុខាភិបាលដោយមិនបង្អង់យូរ។

វគ្គបណ្តុះបណ្តាលគ្រូបង្គោលនេះ មិនត្រឹមតែជាការពង្រឹងសមត្ថភាពបច្ចេកទេសដល់មន្ត្រីជំនាញប៉ុណ្ណោះទេ ប៉ុន្តែថែមទាំងជាការត្រៀមកម្លាំង និងធនធានសម្រាប់អនុវត្តយុទ្ធនាការចាក់វ៉ាក់សាំងនៅមូលដ្ឋានឱ្យមានប្រ សិទ្ធភាព។ ក្រោមកិច្ចសហការរវាងស្ថាប័នពាក់ព័ន្ធ និងការចូលរួមពីប្រជាពលរដ្ឋ កិច្ចខិតខំប្រឹងប្រែងនេះនឹងរួមចំណែកយ៉ាងសំខាន់ក្នុងការកាត់បន្ថយហានិភ័យនៃជំងឺឆ្កែឆ្កួត ការពារអាយុជីវិតមនុស្ស និងសត្វ ព្រមទាំងលើកកម្ពស់សុខភាពសាធារណៈនៅក្នុងខេត្តបន្ទាយមានជ័យឱ្យកាន់តែប្រសើរឡើង៕

ដោយ៖ឈុនសារ៉ាត