AKP ភ្នំពេញ ថ្ងៃទី១៤ ខែតុលា ឆ្នាំ២០២៦ -- រដ្ឋមន្ត្រីការបរទេសសហរដ្ឋអាមេរិក លោក ម៉ាកូ រូប៊ីអូ និងរដ្ឋមន្ត្រីការបរទេសចក្រភពអង់គ្លេស លោក អ៊ែដ មីលីប៊ែនដ៍ បានជួបពិភាក្សាគ្នាកាលពីពេលថ្មីៗនេះ អំពីសន្តិសុខដែនសមុទ្រនៅក្នុងច្រកសមុទ្រហ័រមុស ការសម្របសម្រួលលើសកម្មភាពរបស់អ៊ីរ៉ង់ និងកិច្ចខិតខំប្រឹងប្រែងដើម្បីដោះស្រាយជម្លោះរុស្ស៊ី-អ៊ុយក្រែន។

លោក ថមមី ភីហ្គតត៍ អ្នកនាំពាក្យក្រសួងការបរទេសសហរដ្ឋអាមេរិក បាននិយាយថា លោក រូប៊ីអូ និងលោក មីលីប៊ែនដ៍ «បានបញ្ជាក់សារជាថ្មីនូវការប្តេជ្ញាចិត្តរួមគ្នាក្នុងការការពារការធ្វើដំណើរឆ្លងកាត់ច្រកសមុទ្រហ័រមុស និងសារៈសំខាន់នៃការតម្រូវឱ្យអ៊ីរ៉ង់ទទួលខុសត្រូវចំពោះសកម្មភាពរបស់ខ្លួន ព្រមទាំងការបន្តកិច្ចសហប្រតិបត្តិការដើម្បីធានាសុវត្ថិភាពដល់ទ្រព្យសម្បត្តិរបស់សហរដ្ឋអាមេរិកនៅក្នុងចក្រភពអង់គ្លេស»។

កិច្ចសន្ទនានេះ បានធ្វើឡើងបន្ទាប់ពីមានការចោទប្រកាន់ពីសំណាក់នាយករដ្ឋមន្ត្រីអង់គ្លេស លោក អេនឌី ប៊នហ៊ែម ដែលបានថ្លែងកាលពីថ្ងៃចន្ទថា ផែនការវាយប្រហារដែលគេសង្ស័យថាមានគោលដៅលើមូលដ្ឋាន RAF Fairford (ដែលជាមូលដ្ឋានទ័ពអាកាសរាជវង្សអង់គ្លេសក្នុងតំបន់ Gloucestershire និងត្រូវបានប្រើប្រាស់ដោយកងទ័ពអាកាសអាម៉េរិក) គឺ «ស្ទើរតែប្រាកដណាស់» ដែលវាត្រូវបានដឹកនាំដោយកងកម្លាំងឆ្មាំបដិវត្តន៍អ៊ីស្លាមអ៊ីរ៉ង់ (IRGC) ដែលជាការចោទប្រកាន់មួយត្រូវបានទីក្រុងតេអេរ៉ង់បដិសេធ។

ទន្ទឹមនឹងនេះ ប្រទេសចំនួន២៩ រួមទាំងសហរដ្ឋអាមេរិក និងចក្រភពអង់គ្លេស ក៏បានចេញសេចក្តីថ្លែងការណ៍រួមគ្នាកាលពីថ្ងៃចន្ទ ដើម្បីថ្កោលទោសទៅលើអ្វីដែលពួកគេបានពណ៌នាថា ជាប្រតិបត្តិការរបស់អ៊ីរ៉ង់ប្រឆាំងនឹងទឹកដីរបស់សម្ព័ន្ធមិត្ត ដោយពួកគេបានគាំទ្រការវាយតម្លៃរបស់អង់គ្លេសជុំវិញហេតុការណ៍នៅមូលដ្ឋានទ័ពអាកាសនោះ។

លោក រូប៊ីអូ ក៏បានសង្កត់ធ្ងន់ផងដែរទៅលើសម្ព័ន្ធភាពយុទ្ធសាស្ត្រដ៏ទូលំទូលាយរវាងទីក្រុងវ៉ាស៊ីនតោន និងទីក្រុងឡុងដ៍ ដោយលើកឡើងពីកិច្ចសហប្រតិបត្តិការដើម្បី «ធ្វើឱ្យទីផ្សារថាមពលសកលលោកមានស្ថិរភាព ព្រមទាំងនាំមកនូវការបញ្ចប់ជម្លោះរុស្ស៊ី-អ៊ុយក្រែន តាមរយៈដំណោះស្រាយដែលសម្រេចបានដោយកិច្ចចរចា»៕

ដោយ៖ យា ចិន្ដាខន្ដី (ប្រភព៖ AA-AKP)