AKP ភ្នំពេញ ថ្ងៃទី១៤ ខែតុលា ឆ្នាំ២០២៦--គម្រោង PEARL របស់ អង្គការ FAO បានបន្តបើកវគ្គបណ្តុះបណ្តាលគ្រូបង្គោល ជុំទីបីរបស់ខ្លួន ដើម្បីជួយឱ្យគ្រូបង្គោលក្នុងតំបន់អាចចែករំលែកព័ត៌មានពី «សេវាកម្មឧតុនិយមកសិកម្មកម្ពុជា» ទៅកាន់កសិករខ្នាតតូចនៅខេត្តព្រះវិហារ ។ នេះបើតាមការឱ្យដឹងពីអង្គការ FAO នាថ្ងៃទី១៣ ខែតុលា ឆ្នាំ២០២៦ ។

អ្នកចូលរួមបានរៀនពីរបៀបបំប្លែងការព្យាករណ៍អាកាសធាតុទៅជាដំបូន្មានជាក់ស្តែង ដូចជាពេលវេលាសម្រាប់ដាំដុះ របៀបគ្រប់គ្រងទឹក និងដំណាំ ព្រមទាំងការត្រៀមខ្លួនសម្រាប់អាកាសធាតុដែលមានការប្រែប្រួល។ តាមរយៈសកម្មភាពសម្តែងតួនាទី និងការអនុវត្តន៍ផ្ទាល់ ពួកគេក៏បានហាត់អនុវត្តការទំនាក់ទំនងប្រកបដោយភាពច្បាស់លាស់ជាមួយកសិករជាស្ត្រី និងសហគមន៍ជនជាតិដើមភាគតិចផងដែរ ។

វគ្គបណ្តុះបណ្តាលនេះដឹកនាំដោយលោកបណ្ឌិត ឈូ ជេតរិទ្ធ អគ្គនាយករងនៃអគ្គនាយកដ្ឋានកសិកម្ម និងជាប្រធានគម្រោង PEARL ដោយមានអ្នកចូលរួមជាង ១៥០នាក់ ដែលរួមមានមន្ត្រីអាជ្ញាធរមូលដ្ឋាន តំណាងវិស័យឯកជន និងថ្នាក់ដឹកនាំសហគមន៍។ វគ្គបណ្តុះបណ្តាលនេះទទួលបានការគាំទ្រពីមូលនិធិអាកាសធាតុបៃតង (Green Climate Fund) និងដឹកនាំដោយស្ថាប័នកសិកម្មពាក់ព័ន្ធ ព្រមទាំងមានការគាំទ្រផ្នែកបច្ចេកទេសពីក្រសួងធនធានទឹក និងឧតុនិយម និងអង្គការ FAO។

តាមរយៈការនាំយកព័ត៌មានអំពីអាកាសធាតុឱ្យកាន់តែជិតដល់កសិករ គម្រោង PEARL ជួយពួកគេឱ្យធ្វើការសម្រេចចិត្តដោយផ្អែកលើព័ត៌មានច្បាស់លាស់ កាត់បន្ថយការខាតបង់ដំណាំ និងការពារជីវភាពរស់នៅរបស់ពួកគេ ៕ 

ដោយ ណយ នឿន (ប្រភព៖FAO)