AKP ប៉ៃលិន ថ្ងៃទី១៣ ខែតុលា ឆ្នាំ២០២៦ -- លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន នាព្រឹកថ្ងៃទី១៣ ខែតុលា ឆ្នាំ២០២៦ នេះ បានអញ្ជើញសំណេះសំណាល និងជូនដំណើរបងប្អូនប្រជាពលរដ្ឋត្រឡប់ទៅធ្វើការវិញ បន្ទាប់ពីបានមកលេងស្រុកកំណើតក្នុងឱកាសពិធីបុណ្យភ្ជុំបិណ្ឌប្រពៃណីជាតិខ្មែរ និងបានថ្លែងអំណរគុណដល់រាជរដ្ឋាភិបាលចំពោះកម្មវិធីជិះរថយន្តក្រុងដោយមិនបង់ប្រាក់របស់រដ្ឋាករស្វយ័តដឹកជញ្ជូនសាធារណៈរថយន្តក្រុង City Bus រាជធានីភ្នំពេញ។

លោកជំទាវបណ្ឌិត បាន ស្រីមុំ បានថ្លែងអំណរគុណដល់ សម្តេចមហាបវរ ធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានណែនាំឱ្យរដ្ឋបាលរាជធានីភ្នំពេញ សហការជាមួយក្រសួងការងារ និងបណ្តុះបណ្តាលវិជ្ជាជីវៈ ដើម្បីរៀបចំជូនដំណើរប្រជាពលរដ្ឋ កម្មករ កម្មការិនីធ្វើការនៅរាជធានីភ្នំពេញទៅតាមបណ្តាខេត្តទាំង២៤ ដោយមិនគិតថ្លៃ តាមរយៈការប្រើប្រាស់សេវារថយន្តក្រុង City Bus សាធារណៈរាជធានីភ្នំពេញ ដើម្បីទៅជួបជុំសាច់ញាតិនៅរដូវបុណ្យភ្ជុំបិណ្ឌ ដោយជារៀងរាល់ឆ្នាំប្រជាពលរដ្ឋបានទទួលសេវាជិះរថយន្តក្រុងឥតគិតថ្លៃនេះប្រមាណ ៥ទៅ ៦ម៉ឺននាក់ ដែលអាចកាត់បន្ថយការចំណាយបានយ៉ាងច្រើន។

លោកជំទាវបណ្ឌិតអភិបាលខេត្តបានបញ្ជាក់ថា ជារៀងរាល់ឆ្នាំ រដ្ឋបាលរាជធានីភ្នំពេញទទួលនូវការណែនាំ និងអនុសាសន៍ដឹកនាំរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ក្នុងការបម្រើប្រជាពលរដ្ឋក្នុងរដូវបុណ្យទាន ហើយបន្ទាប់មកទៀត ក្នុងនីតិកាលទី៧ នេះ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក៏បន្តនូវប្រពៃណីនេះតាមគោលការណ៍របស់ សម្តេចតេជោ ដោយបានឱ្យរដ្ឋបាលរាជធានីភ្នំពេញរៀបចំរថយន្តក្រុងចំនួន ៦០០គ្រឿង ដើម្បីជូនដំណើរប្រជាពលរដ្ឋទៅបុណ្យភ្ជុំបិណ្ឌតាមប្រពៃណីជាតិនៅតាមបណ្តាខេត្ត និងពេលវិលត្រឡប់មកធ្វើការវិញ។

ប្រជាពលរដ្ឋបានថ្លែងអំណរគុណដល់រាជរដ្ឋាភិបាល និងរដ្ឋបាលរាជធានីភ្នំពេញចំពោះកម្មវិធីផ្តល់សេវារថយន្តក្រុងសាធារណៈដោយមិនបង់ប្រាក់ ជាពិសេសតែងតែដាក់ឱ្យដំណើរការក្នុងឱកាសបុណ្យទានធំៗ ដូចជា បុណ្យចូលឆ្នាំថ្មី ឬបុណ្យភ្ជុំបិណ្ឌ គឺពិតជាបានជួយសម្រាលបន្ទុកចំណាយរបស់ពួកគាត់ ដែលជាកម្មករ កម្មការិនី និងនិស្សិតបានយ៉ាងច្រើនក្នុងការធ្វើដំណើរទៅលេងស្រុកកំណើត និងជួបជុំក្រុមគ្រួសារ។

បើតាមសេចក្តីជូនដំណឹងរបស់រដ្ឋបាលរាជធានីបានឱ្យដឹងថា រដ្ឋបាលរាជធានីភ្នំពេញបានរៀបចំរថយន្តក្រុងចំនួន ៦០០គ្រឿងសម្រាប់បម្រើសេវាដឹកជញ្ជូនសាធារណៈដោយមិនបង់ប្រាក់រយៈពេល ៥ថ្ងៃ ចាប់ពីថ្ងៃទី០៩ ដល់ថ្ងៃទី១៣ ខែតុលា ឆ្នាំ២០២៦ ដើម្បីជួយសម្រួលដល់ការចំណាយរបស់ប្រជាពលរដ្ឋក្នុងការធ្វើដំណើរទៅលេងស្រុកកំណើតក្នុងឱកាសពិធីបុណ្យភ្ជុំបិណ្ឌប្រពៃណីជាតិខ្មែរ និងការវិលត្រឡប់មកធ្វើការនៅរាជធានីភ្នំពេញវិញ៕

ដោយ៖ ចាន់ សុភឿន (ប្រភព៖ រដ្ឋបាលខេត្តប៉ៃលិន)