AKP បន្ទាយមានជ័យ ថ្ងៃទី១៣ ខែតុលា ឆ្នាំ២០២៦-- ភ្ញៀវទេសចរជាតិ និងអន្តរជាតិសរុបចំនួន ៨៩.៦៤០នាក់ បានធ្វើដំណើរមកកម្សាន្តនៅតាមតំបន់រមណីយដ្ឋាន និងគោលដៅទេសចរណ៍នានាក្នុងខេត្តបន្ទាយមានជ័យ ក្នុងរយៈពេល៣ថ្ងៃ នាឱកាសពិធីបុណ្យភ្ជុំបិណ្ឌ ចាប់ពីថ្ងៃទី១០ ដល់ថ្ងៃទី១២ ខែតុលា ឆ្នាំ២០២៦ ដែលបង្ហាញពីសកម្មភាពធ្វើដំណើរកម្សាន្តរបស់ប្រជាពលរដ្ឋ និងសក្តានុពលទេសចរណ៍ក្នុងខេត្ត។

លោក ឈឿន សេរីវុធ ប្រធានមន្ទីរទេសចរណ៍ខេត្តបន្ទាយមានជ័យ បានឱ្យដឹងនៅព្រឹកថ្ងៃទី១៣ ខែតុលា ឆ្នាំ២០២៦ថា ក្នុងចំណោមភ្ញៀវទេសចរសរុប៨៩.៦៤០នាក់ មានភ្ញៀវទេសចរជាតិចំនួន៨៩.៦២១នាក់ និងភ្ញៀវទេសចរអន្តរជាតិចំនួន១៩នាក់។

របាយការណ៍របស់មន្ទីរទេសចរណ៍ខេត្តបន្ទាយមានជ័យបានបង្ហាញថា នៅថ្ងៃទី១០ ខែតុលា មានភ្ញៀវទេសចរចំនួន១៩.៦៦៥នាក់ ក្នុងនោះភ្ញៀវជាតិ១៩.៦៦០នាក់ និងភ្ញៀវអន្តរជាតិ៥នាក់។ នៅថ្ងៃទី១១ ខែតុលា មានភ្ញៀវទេសចរចំនួន៣៥.១៦៣នាក់ ក្នុងនោះភ្ញៀវជាតិ៣៥.១៥៦នាក់ និងភ្ញៀវអន្តរជាតិ៧នាក់។ ដោយឡែក នៅថ្ងៃទី១២ ខែតុលា មានភ្ញៀវទេសចរចំនួន៣៤.៨១២នាក់ ក្នុងនោះភ្ញៀវជាតិ៣៤.៨០៧នាក់ និងភ្ញៀវអន្តរជាតិ៥នាក់។ តួលេខនេះបង្ហាញថា ចំនួនភ្ញៀវទេសចរបានកើនឡើងគួរឱ្យកត់សម្គាល់នៅថ្ងៃទី១១ ខែតុលា បើធៀបនឹងថ្ងៃទី១០ ខែតុលា ខណៈថ្ងៃទី១២ ចំនួនភ្ញៀវនៅតែរក្សាបានក្នុងកម្រិតខ្ពស់។ នេះបង្ហាញពីការចាប់អារម្មណ៍របស់ប្រជាពលរដ្ឋក្នុងការធ្វើដំណើរកម្សាន្ត និងជួបជុំក្រុមគ្រួសារនៅក្នុងឱកាសបុណ្យប្រពៃណីជាតិដ៏សំខាន់មួយនេះ។

លោក ឈឿន សេរីវុធ បានឱ្យដឹងទៀតថា ក្នុងឱកាសបុណ្យភ្ជុំបិណ្ឌ ភ្ញៀវទេសចរបានធ្វើដំណើរទៅកាន់គោលដៅទេសចរណ៍ជាច្រើនក្នុងខេត្ត រួមមាន រមណីយដ្ឋានប្រាសាទបន្ទាយឆ្មារ ប្រាសាទបន្ទាយទ័ព អាងទឹកជើងគ្រុស អាងទឹកត្រពាំងថ្ម អាងកន្សែង វត្តអារាម និងទីកន្លែងកម្សាន្តផ្សេងៗទៀត។ ក្នុងចំណោមគោលដៅទាំងនេះ តំបន់ប្រាសាទបុរាណ និងតំបន់អាងទឹក គឺជាទីកន្លែងដែលអាចផ្តល់ជូនភ្ញៀវនូវបទពិសោធន៍កម្សាន្តផ្សេងៗគ្នា ដោយតំបន់ប្រាសាទបង្ហាញពីតម្លៃប្រវត្តិសាស្ត្រ សិល្បៈ និងវប្បធម៌ខ្មែរ ខណៈតំបន់អាងទឹកផ្តល់ឱកាសឱ្យភ្ញៀវសម្រាកលំហែកាយ គយគន់ទេសភាពធម្មជាតិ និងចំណាយពេលវេលាជាមួយក្រុមគ្រួសារ។ ចំណែកការធ្វើដំណើរទៅវត្តអារាមក្នុងឱកាសបុណ្យភ្ជុំបិណ្ឌ ក៏ជាផ្នែកមួយនៃការរក្សាប្រពៃណីទំនៀមទម្លាប់ និងជំនឿសាសនារបស់ប្រជាពលរដ្ឋខ្មែរផងដែរ។

ជាមួយគ្នានេះ លោកប្រធានមន្ទីរទេសចរណ៍បានបញ្ជាក់ថា ការធ្វើដំណើរកម្សាន្តរបស់ភ្ញៀវទេសចរនៅតាមគោលដៅនានាក្នុងខេត្តបន្ទាយមានជ័យ បានប្រព្រឹត្តទៅក្រោមការយកចិត្តទុកដាក់ថែរក្សាសន្តិសុខ សុវត្ថិភាព និងសណ្តាប់ធ្នាប់ពីសំណាក់អាជ្ញាធរ និងសមត្ថកិច្ចមូលដ្ឋាន ដែលជាកត្តាសំខាន់ក្នុងការបង្កលក្ខណៈងាយស្រួលដល់ការធ្វើដំណើរ និងការសម្រាកកម្សាន្តរបស់ប្រជាពលរដ្ឋ។ លំហូរភ្ញៀវទេសចរជិត៩ម៉ឺននាក់ក្នុងរយៈពេល៣ថ្ងៃនេះ ក៏ជាឱកាសមួយសម្រាប់ជំរុញសកម្មភាពសេដ្ឋកិច្ចនៅតាមមូលដ្ឋាន តាមរយៈការចំណាយលើការធ្វើដំណើរ ម្ហូបអាហារ សេវាកម្ម និងផលិតផលក្នុងស្រុក ព្រមទាំងជួយផ្សព្វផ្សាយពីសក្តានុពលទេសចរណ៍របស់ខេត្តបន្ទាយមានជ័យឱ្យកាន់តែទូលំទូលាយ។

ដើម្បីបន្តទាក់ទាញភ្ញៀវទេសចរ និងលើកកម្ពស់គុណភាពសេវាកម្មទេសចរណ៍ ការថែរក្សាអនាម័យបរិស្ថាន ការពារធនធានធម្មជាតិ និងបេតិកភណ្ឌវប្បធម៌ ក៏ដូចជាការរក្សាសន្តិសុខ សុវត្ថិភាព និងសណ្តាប់ធ្នាប់នៅតាមគោលដៅទេសចរណ៍ គឺជាកត្តាសំខាន់ដែលត្រូវបន្តយកចិត្តទុកដាក់ ដើម្បីធ្វើឱ្យខេត្តបន្ទាយមានជ័យក្លាយជាគោលដៅទេសចរណ៍ដ៏ទាក់ទាញសម្រាប់ភ្ញៀវទេសចរជាតិ និងអន្តរជាតិនាពេលអនាគត៕

ដោយ ឈុន សារ៉ាត