AKP បន្ទាយមានជ័យ ថ្ងៃទី១៣ ខែតុលា ឆ្នាំ២០២៦--ភ្ញៀវទេសចរជាតិប្រមាណជិត ១០.០០០នាក់ បានទៅលេងកម្សាន្តនៅរមណីយដ្ឋានអាងទឹកត្រពាំងថ្ម ស្ថិតក្នុងស្រុកភ្នំស្រុក ខេត្តបន្ទាយមានជ័យ ក្នុងរយៈពេល ៣ថ្ងៃ គឺចាប់ពីថ្ងៃទី១០ ដល់ថ្ងៃទី១២ ខែតុលា ឆ្នាំ២០២៦ ក្នុងឱកាសពិធីបុណ្យភ្ជុំបិណ្ឌ ដែលបង្ហាញពីសក្តានុពលទេសចរណ៍របស់តំបន់នេះ ក្នុងការទាក់ទាញភ្ញៀវមកសម្រាកលម្ហែ និងចូលរួមលើកកម្ពស់សេដ្ឋកិច្ចមូលដ្ឋាន។

លោក ហី រីហាំង អភិបាលរងស្រុកភ្នំស្រុក បានប្រាប់ឱ្យដឹងនៅព្រឹកថ្ងៃទី១៣ ខែតុលា ឆ្នាំ២០២៦ នេះថា ក្នុងឱកាសបុណ្យភ្ជុំបិណ្ឌឆ្នាំនេះ រមណីយដ្ឋានអាងទឹកត្រពាំងថ្មបានទទួលភ្ញៀវទេសចរជាតិមកលេងកម្សាន្តយ៉ាងច្រើនកុះករក្នុងរយៈពេលបីថ្ងៃជាប់ៗគ្នា។ ចំនួនភ្ញៀវទេសចរដែលកើនឡើងនេះ បានបង្ហាញពីការចាប់អារម្មណ៍របស់ប្រជាពលរដ្ឋចំពោះតំបន់ទេសចរណ៍ធម្មជាតិ ដែលអាចផ្តល់ឱកាសឱ្យក្រុមគ្រួសារជួបជុំគ្នា សម្រាកពីការងារ និងចំណាយពេលវេលារួមគ្នាក្នុងបរិយាកាសរីករាយនាថ្ងៃឈប់សម្រាកពិធីបុណ្យប្រពៃណីជាតិ។

លោកបានបញ្ជាក់ថា នៅថ្ងៃទី១២ ខែតុលា ឆ្នាំ២០២៦ ក៏មានការរៀបចំព្រឹត្តិការណ៍រត់កីឡាតាមខ្នងអាងត្រពាំងថ្ម ដើម្បីអបអរសាទរពិធីបុណ្យភ្ជុំបិណ្ឌ និងផ្សព្វផ្សាយសក្តានុពលទេសចរណ៍នៃរមណីយដ្ឋានអាងត្រពាំងថ្មឱ្យកាន់តែទូលំទូលាយផងដែរ ក្រោមវត្តមានលោកស្រី ចំរើន ដាណេ អភិបាលស្រុកភ្នំស្រុក។

ក្នុងព្រឹត្តិការណ៍នេះ មានអ្នកចូលរួមរត់ចម្ងាយ ៥គីឡូម៉ែត្រ ចំនួន ១៤៨នាក់ និងអ្នកចូលរួមរត់ចម្ងាយ ៣គីឡូម៉ែត្រ ចំនួន ៨៥នាក់។ ព្រឹត្តិការណ៍នេះមិនត្រឹមតែជាសកម្មភាពកីឡាដើម្បីលើកកម្ពស់សុខភាព និងសុខុមាលភាពរបស់ប្រជាពលរដ្ឋប៉ុណ្ណោះទេ ប៉ុន្តែថែមទាំងជាមធ្យោបាយផ្សព្វផ្សាយទេសភាព និងភាពទាក់ទាញរបស់តំបន់អាងត្រពាំងថ្ម តាមរយៈការចូលរួមដោយផ្ទាល់របស់អ្នករត់កីឡា និងអ្នកមកទស្សនាកម្សាន្តផងដែរ។

ជាមួយនឹងចំនួនភ្ញៀវទេសចរដែលមកកម្សាន្តយ៉ាងច្រើនក្នុងឱកាសបុណ្យប្រពៃណីជាតិ រមណីយដ្ឋានអាងទឹកត្រពាំងថ្មមានសក្តានុពលក្នុងការអភិវឌ្ឍជាគោលដៅទេសចរណ៍ដ៏ទាក់ទាញមួយនៅក្នុងខេត្តបន្ទាយមានជ័យ ជាពិសេសសម្រាប់ភ្ញៀវដែលចូលចិត្តទេសភាពធម្មជាតិ ការកម្សាន្តជាលក្ខណៈគ្រួសារ និងសកម្មភាពកីឡានៅតាមតំបន់អាងទឹក។

ការទាក់ទាញភ្ញៀវទេសចរឱ្យមកកម្សាន្តកាន់តែច្រើន ក៏អាចបង្កើតឱកាសរកប្រាក់ចំណូលដល់ប្រជាពលរដ្ឋក្នុងតំបន់ តាមរយៈការលក់ម្ហូបអាហារ ភេសជ្ជៈ និងសេវាកម្មផ្សេងៗដែលបម្រើដល់ភ្ញៀវទេសចរ។ ទន្ទឹមនឹងនេះ ការរៀបចំសកម្មភាពកីឡា និងព្រឹត្តិការណ៍ផ្សព្វផ្សាយទេសចរណ៍ជាបន្តបន្ទាប់ អាចជួយបង្កើនការស្គាល់ និងជំរុញឱ្យតំបន់នេះក្លាយជាជម្រើសកម្សាន្តដ៏សំខាន់មួយសម្រាប់ប្រជាពលរដ្ឋក្នុងខេត្ត និងភ្ញៀវមកពីតំបន់ផ្សេងៗ។

លោក ហី រីហាំង បានឱ្យដឹងបន្ថែមថា ក្នុងឱកាសបុណ្យភ្ជុំបិណ្ឌនេះ ស្ថានភាពសន្តិសុខ សុវត្ថិភាព និងសណ្តាប់ធ្នាប់សាធារណៈ ត្រូវបានធានាបានល្អប្រសើរ ដើម្បីបង្កលក្ខណៈងាយស្រួល និងផ្តល់ភាពកក់ក្តៅជូនភ្ញៀវទេសចរដែលមកលេងកម្សាន្តនៅរមណីយដ្ឋានអាងត្រពាំងថ្ម ក៏ដូចជានៅតាមទីកន្លែងកម្សាន្តផ្សេងៗ និងវត្តអារាមដែលមានការរៀបចំពិធីបុណ្យទាន។ ការយកចិត្តទុកដាក់លើសន្តិសុខ សុវត្ថិភាព និងសណ្តាប់ធ្នាប់សាធារណៈ គឺជាកត្តាសំខាន់ក្នុងការរក្សាបរិយាកាសកម្សាន្តប្រកបដោយភាពសប្បាយរីករាយ និងជួយបង្កើនទំនុកចិត្តដល់ភ្ញៀវទេសចរ។ ជាមួយគ្នានេះ ការចូលរួមថែរក្សាអនាម័យ បរិស្ថាន និងសម្បត្តិធម្មជាតិពីសំណាក់អាជ្ញាធរ អាជីវករ និងភ្ញៀវទេសចរផ្ទាល់ ក៏មានសារៈសំខាន់ក្នុងការរក្សាភាពទាក់ទាញរបស់រមណីយដ្ឋានឱ្យបានយូរអង្វែង។

ជារួម ចំនួនភ្ញៀវទេសចរជិត ១ម៉ឺននាក់ក្នុងរយៈពេលត្រឹមតែបីថ្ងៃ នៃពិធីបុណ្យភ្ជុំបិណ្ឌឆ្នាំ២០២៦ បានបង្ហាញពីភាពទាក់ទាញ និងឱកាសអភិវឌ្ឍទេសចរណ៍របស់រមណីយដ្ឋានអាងទឹកត្រពាំងថ្ម ស្រុកភ្នំស្រុក ខេត្តបន្ទាយមានជ័យ។ ការបន្តលើកកម្ពស់សេវាកម្មទេសចរណ៍ ការរៀបចំព្រឹត្តិការណ៍កីឡា និងការថែរក្សាបរិស្ថាន គួបផ្សំនឹងការធានាសន្តិសុខ សុវត្ថិភាព និងសណ្តាប់ធ្នាប់ល្អប្រសើរ នឹងជាកត្តារួមចំណែកធ្វើឱ្យតំបន់នេះកាន់តែមានភាពទាក់ទាញ និងចូលរួមជំរុញសេដ្ឋកិច្ចសហគមន៍មូលដ្ឋាននាពេលអនាគត៕

ដោយ៖ ឈុន សារ៉ាត