AKP បន្ទាយមានជ័យ ថ្ងៃទី១៣ ខែតុលា ឆ្នាំ២០២៦--ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានអញ្ជើញជូនដំណើរបងប្អូនប្រជាពលរដ្ឋដែលបានធ្វើដំណើរមកលេងស្រុកកំណើតក្នុងឱកាសពិធីបុណ្យភ្ជុំបិណ្ឌ ឱ្យវិលត្រឡប់ទៅរាជធានីភ្នំពេញ និងតាមបណ្តាខេត្តនានាវិញប្រកបដោយសុវត្ថិភាព ខណៈដែលប្រជាពលរដ្ឋជាច្រើនបានប្រើប្រាស់សេវារថយន្តក្រុងដែលរាជរដ្ឋាភិបាលផ្តល់ជូនដោយឥតគិតថ្លៃ ដើម្បីសម្រាលបន្ទុកចំណាយក្នុងការធ្វើដំណើរ។

ពិធីជូនដំណើរនេះបានធ្វើឡើងនៅព្រឹកថ្ងៃទី១៣ ខែតុលា ឆ្នាំ២០២៦ នៅចំណតរថយន្តក្រុងក្នុងក្រុងសិរីសោភ័ណ ដោយមានការអញ្ជើញចូលរួមពីលោក ឃ្លោក នួយ និងលោក ហ៊ឹល រ៉ាយ៉ា អភិបាលរងខេត្ត លោក ស្រេង សុផល អភិបាល នៃគណៈអភិបាលក្រុងសិរីសោភ័ណ ព្រមទាំងមន្ត្រីរាជការពាក់ព័ន្ធ។

ក្នុងឱកាសនោះ ឯកឧត្តម អ៊ុំ រាត្រី បានសំណេះសំណាល និងជូនពរបងប្អូនប្រជាពលរដ្ឋដែលត្រូវធ្វើដំណើរត្រឡប់ទៅកាន់លំនៅឋាន និងកន្លែងបំពេញការងាររៀងៗខ្លួនឱ្យទទួលបានសុខសុវត្ថិភាពតាមផ្លូវ និងជួបប្រទះតែសេចក្តីសុខចម្រើនក្នុងការរស់នៅ ក៏ដូចជាការប្រកបរបរចិញ្ចឹមជីវិត។

ឯកឧត្តមអភិបាលខេត្តបានអំពាវនាវដល់អ្នកបើកបរគ្រប់ប្រភេទយានយន្ត និងប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នក្នុងពេលធ្វើដំណើរ គោរពច្បាប់ចរាចរណ៍ផ្លូវគោក និងស្លាកសញ្ញាចរាចរណ៍ ព្រមទាំងចេះយោគយល់អធ្យាស្រ័យគ្នាទៅវិញទៅមក ដើម្បីបង្ការគ្រោះថ្នាក់ចរាចរណ៍ដែលអាចកើតមានជាយថាហេតុ ជាពិសេសក្នុងអំឡុងពេលដែលចរាចរណ៍មានសភាពមមាញឹកក្រោយបញ្ចប់ពិធីបុណ្យភ្ជុំបិណ្ឌ។

ឯកឧត្តមក៏បានលើកទឹកចិត្តឱ្យប្រជាពលរដ្ឋចូលរួមអនុវត្តវិធានការសុវត្ថិភាពចរាចរណ៍ ដោយអ្នកបើកបរត្រូវពិនិត្យស្ថានភាពយានយន្តឱ្យបានត្រឹមត្រូវ មិនបើកបរលើសល្បឿនកំណត់ មិនបើកបរពេលស្រវឹង និងត្រូវពាក់មួកសុវត្ថិភាពចំពោះអ្នកជិះម៉ូតូ ព្រមទាំងពាក់ខ្សែក្រវ៉ាត់សុវត្ថិភាពចំពោះអ្នកជិះរថយន្ត ដើម្បីធានាថា ការធ្វើដំណើររបស់បងប្អូនប្រជាពលរដ្ឋប្រព្រឹត្តទៅដោយរលូន និងមានសុវត្ថិភាព។

ជាក់ស្តែង នៅចំណតរថយន្តក្រុងក្នុងក្រុងសិរីសោភ័ណ នាព្រឹកថ្ងៃដដែលនេះ មានសកម្មភាពមមាញឹកក្នុងការរៀបចំដឹកជញ្ជូនប្រជាពលរដ្ឋចេញពីខេត្តបន្ទាយមានជ័យឆ្ពោះទៅរាជធានីភ្នំពេញ និងតាមបណ្តាខេត្តផ្សេងៗ បន្ទាប់ពីបានចំណាយពេលជួបជុំក្រុមគ្រួសារ និងញាតិមិត្តនៅស្រុកកំណើតក្នុងឱកាសបុណ្យភ្ជុំបិណ្ឌ។

ទិដ្ឋភាពនៅចំណតរថយន្តបានបង្ហាញពីការធ្វើដំណើររបស់ប្រជាពលរដ្ឋជាបន្តបន្ទាប់ ដោយអ្នកខ្លះមានឥវ៉ាន់ និងសម្ភារៈប្រើប្រាស់តាមខ្លួន ខណៈអ្នកខ្លះទៀតកំពុងរៀបចំឡើងរថយន្ត ដើម្បីធ្វើដំណើរទៅកាន់រាជធានីភ្នំពេញវិញ និងត្រៀមចូលបំពេញការងារតាមមុខរបររៀងៗខ្លួន។

អ្វីដែលគួរឱ្យកត់សម្គាល់នោះ គឺស្នាមញញឹម និងភាពរីករាយរបស់ប្រជាពលរដ្ឋដែលបានទទួលសេវាដឹកជញ្ជូនតាមរថយន្តក្រុងដោយឥតគិតថ្លៃ។ ការផ្តល់សេវានេះមិនត្រឹមតែជួយសម្រួលដល់ការធ្វើដំណើរប៉ុណ្ណោះទេ ប៉ុន្តែថែមទាំងជួយកាត់បន្ថយការចំណាយរបស់គ្រួសារ ជាពិសេស អ្នកដែលត្រូវធ្វើដំណើរទៅមកក្នុងឱកាសបុណ្យទាន ដែលមានការចំណាយច្រើនលើការធ្វើដំណើរ និងការជួបជុំក្រុមគ្រួសារ។

ប្រជាពលរដ្ឋដែលបានប្រើប្រាស់សេវារថយន្តក្រុងដោយឥតគិតថ្លៃបានបង្ហាញចំណាប់អារម្មណ៍ថា ការផ្តល់ជូននេះបានជួយសម្រាលបន្ទុកចំណាយក្នុងគ្រួសារ និងផ្តល់ភាពងាយស្រួលដល់ការធ្វើដំណើរត្រឡប់ទៅកន្លែងធ្វើការវិញ។ ពួកគាត់មានភាពរីករាយចំពោះការទទួលបានសេវាដឹកជញ្ជូនដែលមិនចាំបាច់បង់ថ្លៃធ្វើដំណើរ ព្រមទាំងអាចរៀបចំផែនការចំណាយសម្រាប់តម្រូវការចាំបាច់ផ្សេងៗរបស់គ្រួសារបានកាន់តែប្រសើរ។

ប្រជាពលរដ្ឋក៏បានបង្ហាញការពេញចិត្តចំពោះភាពងាយស្រួលក្នុងការធ្វើដំណើរជាក្រុមគ្រួសារ និងការរៀបចំសេវាដឹកជញ្ជូនដែលជួយឱ្យពួកគាត់អាចវិលត្រឡប់ទៅកាន់គោលដៅបានតាមផែនការ។ ការផ្តល់សេវាដោយឥតគិតថ្លៃនេះ គឺជាជំនួយជាក់ស្តែងមួយសម្រាប់ប្រជាពលរដ្ឋក្នុងឱកាសដែលពួកគាត់ធ្វើដំណើរឆ្លងកាត់ចម្ងាយឆ្ងាយ ដើម្បីជួបជុំឪពុកម្តាយ បងប្អូន និងសាច់ញាតិនៅស្រុកកំណើត។

គួរបញ្ជាក់ថា ថ្ងៃទី១៣ ខែតុលា ឆ្នាំ២០២៦ នេះ គឺជាថ្ងៃចុងក្រោយនៃការផ្តល់សេវាដឹកជញ្ជូនតាមរថយន្តក្រុងដោយឥតគិតថ្លៃ សម្រាប់ការធ្វើដំណើរត្រឡប់ពីស្រុកកំណើតទៅរាជធានីភ្នំពេញ និងគោលដៅពាក់ព័ន្ធ បន្ទាប់ពីបញ្ចប់ពិធីបុណ្យភ្ជុំបិណ្ឌ។ ដូច្នេះ ប្រជាពលរដ្ឋជាច្រើនបានមកប្រើប្រាស់សេវានេះ ដើម្បីត្រឡប់ទៅបំពេញការងារ និងបន្តជីវភាពប្រចាំថ្ងៃរបស់ខ្លួន។

ជារៀងរាល់ឆ្នាំ ក្នុងឱកាសពិធីបុណ្យភ្ជុំបិណ្ឌ និងពិធីបុណ្យចូលឆ្នាំប្រពៃណីជាតិខ្មែរ រាជរដ្ឋាភិបាលកម្ពុជាតែងតែផ្តល់សេវាដឹកជញ្ជូនតាមរថយន្តក្រុងដោយឥតគិតថ្លៃ ដើម្បីសម្រួលដល់ការធ្វើដំណើររបស់ប្រជាពលរដ្ឋដែលចាកចេញពីរាជធានីភ្នំពេញទៅស្រុកកំណើត និងវិលត្រឡប់មកវិញ។ គោលបំណងសំខាន់ គឺជួយកាត់បន្ថយបន្ទុកចំណាយរបស់ប្រជាពលរដ្ឋ និងសម្រួលដល់ការធ្វើដំណើរក្នុងឱកាសបុណ្យប្រពៃណីជាតិ។

ការធ្វើដំណើរត្រឡប់ទៅកាន់រាជធានីភ្នំពេញ និងតាមបណ្តាខេត្តក្រោយពិធីបុណ្យភ្ជុំបិណ្ឌ គឺជាដំណាក់កាលដែលត្រូវការការយកចិត្តទុកដាក់ខ្ពស់ចំពោះសុវត្ថិភាពចរាចរណ៍។ ក្នុងន័យនេះ ការចូលរួមគោរពច្បាប់ចរាចរណ៍ពីសំណាក់អ្នកបើកបរ និងអ្នកប្រើប្រាស់ផ្លូវទាំងអស់ គួបផ្សំនឹងការប្រុងប្រយ័ត្ន និងការយោគយល់គ្នា នឹងជួយកាត់បន្ថយហានិភ័យ និងធានាឱ្យប្រជាពលរដ្ឋបានទៅដល់គោលដៅប្រកបដោយសុវត្ថិភាព។

ស្នាមញញឹមរបស់ប្រជាពលរដ្ឋនៅចំណតរថយន្តក្រុងក្នុងក្រុងសិរីសោភ័ណ នាព្រឹកថ្ងៃទី១៣ ខែតុលា នេះ បានឆ្លុះបញ្ចាំងពីភាពងាយស្រួលក្នុងការធ្វើដំណើរ និងការសន្សំសំចៃថវិកាគ្រួសារតាមរយៈសេវាដឹកជញ្ជូនដោយឥតគិតថ្លៃ ខណៈការអំពាវនាវរបស់អភិបាលខេត្តបន្ទាយមានជ័យក៏ជាការរំលឹកដល់អ្នកធ្វើដំណើរគ្រប់រូបឱ្យយកចិត្តទុកដាក់លើសុវត្ថិភាព ដើម្បីឱ្យការវិលត្រឡប់ក្រោយបញ្ចប់ពិធីបុណ្យប្រពៃណីជាតិប្រព្រឹត្តទៅដោយរលូន និងគ្មានគ្រោះថ្នាក់ចរាចរណ៍៕

ដោយ៖ ឈុន សារ៉ាត