AKP តាកែវ ថ្ងៃទី១០ ខែតុលា ឆ្នាំ២០២៦ -- រដ្ឋបាលខេត្តតាកែវរៀបចំពិធីបញ្ចុះបឋមសិលាសាងសង់អគារមណ្ឌលសុខភាព ឯកឧត្តមបណ្ឌិតសភាចារ្យ ច័ន្ទ សារុន ជើងគួន និងពិធីប្រគល់រថយន្តសង្គ្រោះបន្ទាន់ ជូនមណ្ឌលសុខភាពខ្វាវ ក្រោមអធិបតីភាពឯកឧត្តម តាំង ជុងលី រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា លោក ញ៉ែម ស្រស់ អភិបាលរងនៃគណៈអភិបាលខេត្តតាកែវ និងលោកជំទាវ សុខ កែវ ច័ន្ទសារុន ព្រមទាំងបុត្រាបុត្រ ដោយមានការអញ្ជើញចូលរួមពីថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ រដ្ឋបាលខេត្តតាកែវ រដ្ឋបាលស្រុកសំរោង អាជ្ញាធរមូលដ្ឋានឃុំ ភូមិ តំណាងស្ថាប័នពាក់ព័ន្ធ លោកគ្រូ អ្នកគ្រូ សិស្សានុសិស្ស យុវជនកាកបាទក្រហមកម្ពុជា យុវជនកាយរឹទ្ធិកម្ពុជ យុវជនស.ស.យ.ក. និងប្រជាពលរដ្ឋក្នុងមូលដ្ឋាន ដោយពិធីនេះរៀបចំឡើងនៅក្នុងបរិវេណមណ្ឌលសុខភាពឯកឧត្តមបណ្ឌិតសភាចារ្យ ច័ន្ទ សារុន ជើងគួន ស្ថិតនៅក្នុងឃុំជើងគួន ស្រុកសំរោង ខេត្តតាកែវ កាលពីថ្ងៃទី៩ ខែតុលា ឆ្នាំ២០២៦។

មានប្រសាសន៍សំណេះសំណាលក្នុងពេលនោះ ឯកឧត្តម តាំង ជុងលី រដ្ឋលេខាធិការក្រសួងសង្គមកិច្ចអតីតយុទ្ធនិងយុវនិតិសម្បទា បានថ្លែងថាពិធីដ៏មានអត្ថន័យនេះ មិនត្រឹមតែជាការចាប់ផ្តើមនៃការសាងសង់អគារមណ្ឌលសុខភាពថ្មី និងការប្រគល់មធ្យោបាយសង្គ្រោះបន្ទាន់ប៉ុណ្ណោះទេ ប៉ុន្តែថែមទាំងជាសក្ខីភាពនៃការយកចិត្តទុកដាក់ខ្ពស់ ចំពោះសុខុមាលភាពប្រជាពលរដ្ឋ និងការរួមចំណែកអភិវឌ្ឍវិស័យសុខាភិបាលនៅមូលដ្ឋានឱ្យកាន់តែមានប្រសិទ្ធភាព សមធម៌ និងចីរភាព។

ឯកឧត្តម តាំង ជុងលី បានមានប្រសាសន៍បន្តថា ការមានមណ្ឌលសុខភាពដែលមានហេដ្ឋារចនាសម្ព័ន្ធសមស្រប និងមធ្យោបាយសង្គ្រោះបន្ទាន់គ្រប់គ្រាន់ គឺជាកត្តាសំខាន់ក្នុងការលើកកម្ពស់ គុណភាពសេវាថែទាំសុខភាព និងការឆ្លើយតបចំពោះតម្រូវការរបស់ប្រជាពលរដ្ឋ ឱ្យបានទាន់ពេលវេលា។ ជាពិសេសរថយន្តសង្គ្រោះបន្ទាន់ នឹងរួមចំណែកសម្រួលដល់ការដឹកជញ្ជូនអ្នកជំងឺ និងអ្នកដែលត្រូវការសង្គ្រោះបន្ទាន់ ទៅកាន់ទីតាំងសុខាភិបាលដែលមានសមត្ថភាពសមស្រប។ខណៈដែលអគារមណ្ឌលសុខភាពថ្មីសាងសង់រួច នឹងក្លាយជាមូលដ្ឋានដ៏សំខាន់សម្រាប់ការផ្តល់សេវាពិនិត្យ ព្យាបាល ថែទាំ និងលើកកម្ពស់សុខភាពជូនប្រជាពលរដ្ឋក្នុងតំបន់សេវា។

ឯកឧត្តម តាំង ជុងលី បានមានប្រសាសន៍បន្ថែមថា ការអភិវឌ្ឍហេដ្ឋារចនាសម្ព័ន្ធ និងការបំពាក់មធ្យោបាយបម្រើសេវាសុខាភិបាល គឺជាការវិនិយោគលើសុខភាព និងជីវិតរបស់ប្រជាពលរដ្ឋ។ព្រោះសេវាសុខាភិបាលនៅជិតប្រជាពលរដ្ឋ ដែលមានគុណភាព និងអាចឆ្លើយតបបានទាន់ពេលវេលា គឺជាកត្តារួមចំណែកកាត់បន្ថយហានិភ័យនៃផលវិបាកធ្ងន់ធ្ងរ និងលើកកម្ពស់ទំនុកចិត្ត របស់ប្រជាពលរដ្ឋលើប្រព័ន្ធសុខាភិបាលសាធារណៈ។

លោកឱសថការី ផាន់ វ៉ាន់ ប្រធានមន្ទីរសុខាភិបាលខេត្តតាកែវ បានសម្តែងការកោតសរសើរ និងអំណរគុណចំពោះការយកចិត្តទុកដាក់ក្នុងការគាំទ្រ និងការចូលរួមចំណែករបស់ថ្នាក់ដឹកនាំ គ្រប់លំដាប់ថ្នាក់ អាជ្ញាធរមូលដ្ឋាន និងសប្បុរសជន ដែលបានរួមគ្នាជំរុញការអភិវឌ្ឍវិស័យសុខាភិបាល។ដើម្បីបម្រើផលប្រយោជន៍សាធារណៈ និងឆ្លើយតបនឹងតម្រូវការសុខភាពរបស់ប្រជាពលរដ្ឋ។ជាមួយគ្នានេះមន្ទីរសុខាភិបាលខេត្តតាកែវ នឹងបន្តយកចិត្តទុកដាក់ លើការពង្រឹងសមត្ថភាពមូលដ្ឋានសុខាភិបាល ការលើកកម្ពស់គុណភាពសេវា ការពង្រឹងសមត្ថភាពឆ្លើយតបសង្គ្រោះបន្ទាន់ និងការបម្រើប្រជាពលរដ្ឋដោយវិជ្ជាជីវៈ ក្រមសីលធម៌ សមធម៌ និងការទទួលខុសត្រូវ។ ដើម្បីធានាថាប្រជាពលរដ្ឋគ្រប់រូបអាចទទួលបានសេវាសុខាភិបាលសមស្រប និងមានទំនុកចិត្ត។ ពង្រឹងសេវាសុខាភិបាលនៅមូលដ្ឋាន គឺពង្រឹងការការពារសុខភាពប្រជាពលរដ្ឋ និងការសង្គ្រោះជីវិតមនុស្ស។

ក្នុងឱកាសនោះ លោកជំទាវ សុខ កែវ ច័ន្ទសារុន ព្រមទាំងបុត្រា បុត្រី បានប្រគល់រថយន្តសង្គ្រោះបន្ទាន់ (Ambulance) ចំនួន១គ្រឿង ជូនដល់មណ្ឌលសុខភាពខ្វាវ ស្ថិតនៅក្នុងឃុំខ្វាវ ស្រុកសំរោង ខេត្តតាកែវ ដើម្បីបម្រើដល់ការឆ្លើយតប និងសង្គ្រោះជីវិតប្រជាពលរដ្ឋឱ្យបានទាន់ពេលវេលា៕

ដោយ អ៊ុច សៀង