AKP សៀមរាប ថ្ងៃទី១០ ខែតុលា ឆ្នាំ២០២៦ -- បុណ្យភ្ជុំបិណ្ឌ ជាពិធីបុណ្យមួយដែលធំជាងគេ  នៅក្នុងចំណោមពិធីបុណ្យទាំងអស់ ចំពោះអ្នកកាន់ព្រះពុទ្ធសាសនា។ ជារៀងរាល់ឆ្នាំនៅពេលដល់ថ្ងៃខែ ដែលត្រូវប្រារព្ធពិធីបុណ្យភ្ជុំបិណ្ឌ គ្រប់បងប្អូន កូនចៅ សាច់ញាតិសន្ដានទាំងអស់ ទោះនៅទីជិត ឬទីឆ្ងាយ តែងតែធ្វើដំណើរទៅជួបជុំគ្នា ជាពិសេសឪពុកម្ដាយនៅស្រុកកណើត ដើម្បីរៀបចំម្ហូបអាហារ បាយសម្ល ចង្ហាន់យកទៅប្រគេនព្រះសង្ឃ ដែលគង់​នៅវត្តអារាម​។ ការរៀបចំម្ហូបអាហារទាំងនេះ គឺជាទម្លាប់មួយដែលគេនិយមធ្វើតៗគ្នា របស់ជនជាតិខ្មែរ ជាយូរលង់មកហើយ​។

សម្រាប់ពិធីបុណ្យកាន់បិណ្ឌនិងភ្ជុំបិណ្ឌឆ្នាំ២០២៦នេះ ប្រព្រឹត្តទៅចាប់ពីថ្ងៃ១រោច ដល់ថ្ងៃ ១៥រោច ខែភទ្របទ ដែលបងប្អូនប្រជាពលរដ្ឋ ក៏ដូចជាពុទ្ធបរិស័ទ នៅទូទាំងប្រទេសបាននាំគ្នាធ្វើម្ហូបអាហារ បាយទឹក នំចំណី និងចង្ហាន់ ដើម្បីយកទៅប្រគេនព្រះសង្ឃនៅវត្ដ ជាពិសេសសម្រាប់បុណ្យកាន់បិណ្ឌ និងភ្ជុំបិណ្ឌនេះ គឺក្នុងគោលដៅរម្លឹកគុណ និងឧទ្ទិសដល់បុព្វបុរស បុព្វការីជន ឪពុកម្ដាយ ជីដូនជីតា មាតិកាទាំង៧សន្ដាន ដែលបានចែកឋានទៅហើយ។

បើតាមមន្រ្ដីធម្មការ និងសាសនាខេត្ដសៀមរាបបានឱ្យដឹងថា តាមការកត់សម្គាល់ឃើញថា ក្នុងឆ្នាំនេះ នៅខេត្ដ សៀមរាប ពិធីបុណ្យកាន់បិណ្ឌ និងភ្ជុំបិណ្ឌ បងប្អូនប្រជាពលរដ្ឋ ដែលមកធ្វើបុណ្យទាននៅតាមវត្ដ​អារាម ហាក់មានចំនួនច្រើន និងអ៊ូអរជាងឆ្នាំមុនៗ។

លោក ធឿន វុឌ្ឍី មន្រ្តី នៃមន្ទីរធម្មការ និងសាសនា ខេត្តសៀមរាប បានឱ្យដឹងថា សម្រាប់ឆ្នាំនេះ ទិដ្ឋភាពទូទៅយើងឃើញមានប្រជាពលរដ្ឋពុទ្ធបរិស័ទអញ្ជើញទៅធ្វើបុណ្យនៅតាមវត្តនានា ក្នុងខេត្តហាក់ដូចជាច្រើនជាងឆ្នាំមុន ហើយការមកធ្វើបុណ្យនៅតាមវត្ដច្រើននេះ ប្រហែលជាឆ្នាំមុនយើងមានសង្គ្រាមនៅព្រំដែន ចឹងទៅហាក់ដូចរាងស្ងាត់បន្តិច។ លោកបានបញ្ជាក់ថា៖ «ប៉ុន្តែឆ្នាំនេះ បញ្ហានៅព្រំដែនស្ងប់ស្ងាត់ យើងឃើញប្រជាពលរដ្ឋពុទ្ធបរិស័ទមកវត្តច្រើន បើយើងប្រៀបធៀបទៅនឹងឆ្នាំមុន»។   លោក ធឿន វុឌ្ឍីបានបន្តថា បុណ្យភ្ជុំបិណ្ឌនេះ មានប្រវត្តិដើមទាក់ទងតាំងពីសម័យបុរាណមក ហើយគ្រាន់តែពេលហ្នឹងការប្រើប្រាស់ពាក្យនេះខុសគ្នាបន្តិច។ លោកបានពន្យល់ថា នៅសម័យនោះគេច្រើនប្រើប្រាស់ពាក្យបុណ្យទំនប់បម្រុង ចំពោះព្រះសង្ឃក្នុងរដូវចូលវស្សាគឺរយៈពេល៣ខែ ពីថ្ងៃចូលវស្សាដល់ចេញវស្សា ហើយក្រោយមកក៏យើងសល់ត្រឹម១៥ថ្ងៃ ដោយរាប់ពីថ្ងៃ១រោច មក រហូតដល់ថ្ងៃ១៥រោច។ លោកបានលើក​ឡើងថា៖ «វត្ថុបំណងសំខាន់នៃពិធីបុណ្យនេះ គឺដើម្បីនឹកដល់ពួកញាតិទាំងឡាយដែលបានស្លាប់ទៅ តាម​រយៈការធ្វើទានតាមរយៈការថ្វាយទានចំពោះសង្ឃ។ ពុទ្ធបរិស័ទអាចឧទ្ទិសនូវផលនៃទាននេះដល់ជនទាំងឡាយដែលបានចែកឋានទៅ។ ទាំងយូរហើយក្ដី ថ្មីនេះក្ដី ត្រូវជាញាតិជិតដិតក្ដី ឬក៏ញាតិឆ្ងាយក្ដី គឺបានទទួលចំណែកនៃបុណ្យនេះ»។

លោក ធឿន វុឌ្ឍី បានបន្ថែមថា នេះក៏ជាឱកាសជូនបងប្អូនប្រជាពលរដ្ឋ បានជួបជុំក្រុមគ្រួសារ ធ្វើបុណ្យធ្វើទាន ធ្វើបដិការគុណ គោរព តបស្នងសងគុណមាតាបិតា ជីដូនជីតា អាណាព្យាបាល តាមជំនឿ និងបានរួមចំណែកថែរក្សា នូវប្រពៃណី ទំនៀមទម្លាប់ ជំនឿសាសនា វប្បធម៌ អរិយធម៌ ដែលជាអត្តសញ្ញាណដ៏ថ្លៃថ្លារបស់ជាតិឱ្យបានគង់វង្ស។

ទាក់ទងនឹងការចូលរួមរបស់បងប្អូនប្រជាពលរដ្ឋ ក៏ដូចជាពុទ្ធបរិស័ទ ដែលបានមកធ្វើបុណ្យកាន់បិណ្ឌ និងភ្ជុំបិណ្ឌតាមវត្ដអារាមនេះដែរ ព្រះសច្ចានុបាល នឿម វុទ្ធី ព្រះចៅអធិការវត្តស្វាយរមៀត ស្ថិតនៅភូមិបន្ទាយឈើ សង្កាត់ទឹកវិលក្រុងសៀមរាប ខេត្តសៀមរាប បានមានថេរដីការឱ្យដឹងថា សម្រាប់វត្តបារាយណ៍មហានទីរតនារាម(ស្វាយរមៀត)នេះឃើញថា ប្លែកជាងឆ្នាំមុន គឺពុទ្ធបរស័ទយកចង្ហាន់មកប្រគេនព្រះសង្ឃ ដូចជាកើនជាងឆ្នាំមុន។ ព្រះអង្គបានអះអាងថា ចំពោះពុទ្ធបរិស័ទជិតឆ្ងាយដែលអញ្ជើញមកបំពេញបុណ្យកុសល យកចង្ហាន់មកប្រគេនព្រះសង្ឃជារៀងរាល់ព្រឹកឥឡូវនេះ ​គឺតាំងពីវេនទីមួយរហូតដល់ថ្ងៃនេះ គឺសម្រាប់ពុទ្ធបរិស័ទទូទៅ គឺឃើញមានភាពអ៊ូអរ ។  ចំពោះទិដ្ឋភាព សកម្មភាព ពីទឹកមុខប្រជាពុទ្ធបរិស័ទ ដែលអញ្ជើញយកចង្ហាន់មកប្រគេនព្រះសង្ឃ ក៏ថាឃើញទឹកមុខគាត់ស្រស់ស្រាយ សប្បាយចិត្តមិនដូចកាលពីឆ្នាំ២០២៥នោះទេ។ ព្រះអង្គបានអះអាងបញ្ជាក់ថា៖ «ព្រោះកាលពីឆ្នាំ២០២៥ គឺយើងជួបវិបត្តិសង្គ្រាមនៅព្រំដែន ដោយសារបច្ចាមិត្តឈ្លានពានបូរណភាពទឹកដី។ អីញ្ចឹងទៅពួកគាត់មានការព្រួយបារម្ភ គិតដល់បងប្អូនបុព្វវីរៈកងទ័ពរបស់យើង បងប្អូននគរបាល ដែលការពារព្រំដែនរបស់យើង   គាត់អាណិតអាសូរ ហើយក៏សោកស្តាយ ដោយសារមានបច្ចាមិត្ត ចោរឈ្លានពានបូរណភាពទឹកដីរបស់យើង។ ប៉ុន្តែឆ្នាំនេះឃើញថា ទឹកមុខគាត់ស្រស់ស្រាយ ដោយបានធ្វើបុណ្យស្ងប់ចិត្តព្រោះនៅព្រំដែននៅមានភាពស្ងប់ស្ងាត់​។»

ជាមួយគ្នានេះ ព្រះសច្ចានុបាល នឿម វុទ្ធី បានមានសង្ឃដីកាឱ្យដឹងបន្ថែមថា៖ «សម្រាប់បុណ្យកាន់បិណ្ឌ និងភ្ជុំបិណ្ឌឆ្នាំនេះ ពុទ្ធបរិស័ទពេលដែលគាត់បានប្រគេនចង្ហាន់ព្រះសង្ឃរួចហើយ ក៏ឃើញដុតធូបថ្វាយព្រះពុទ្ធបដិមា ទៅបូជាផ្កាហើយ និងដាក់បាត្រឧទ្ទិសកុសលជូនដល់មាតាបិតាជីដូនជីតារបស់គាត់ ឧទ្ទិសកុសលជូនដល់បុព្វវីរៈកងទ័ព បុព្វវីរៈនគរបាលយើង ដែលបានពលីជីវិតដើម្បីបុព្វហេតុជាតិមាតុភូមិកម្ពុជារបស់យើងផងដែរ»៕

ដោយ៖ ឃុត សៅ